លោកត្រាំ ព្រមាន​ថា​អាច​ចាត់ការ កូឡុំប៊ី និងម៉ិកស៊ិក បន្ទាប់ពីការចាប់ខ្លួនលោកម៉ាឌូរ៉ូ

លោក ដូណាល់ ត្រាំ បានមានប្រសាសន៍​​ថា ប្រទេសកូឡុំប៊ី និងម៉ិកស៊ិក ក៏អាចប្រឈមនឹងសកម្មភាពយោធា​ដូច​វ៉េណេស៊ុយអេឡា​ផងដែរ បើពួកគេបរាជ័យក្នុងការទប់ស្កាត់លំហូរគ្រឿងញៀនខុសច្បាប់ចូលទៅកាន់​ទឹក​ដី​​​អាមេរិក។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន Reuters នា​ចន្ទ​ទី​៥​ខែ​មករា​ឆ្នាំ​២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះបានធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពីប្រតិបត្តិការយោធាអាមេរិកដ៏អស្ចារ្យមួយដែលមានឈ្មោះថា «Operation Absolute Resolve» បានឈានទៅដល់ការចាប់ខ្លួនប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ និងភរិយា លោកស្រី Cilia Flores ក្នុងទីក្រុងការ៉ាកាស កាល​ពី​ថ្ងៃ​សៅរ៍។

ថ្លែងទៅកាន់ក្រុមអ្នកយកព័ត៌មាននៅលើយន្តហោះ Air Force One លោកត្រាំ បាន​ប្រាប់​ថា «ប្រតិបត្តិការកូឡុំប៊ី (Operation Colombia) ស្តាប់ទៅហាក់ដូចជាល្អសម្រាប់ខ្ញុំ»។ លោកបានបន្ថែមថា ចំណែក​ឯ​ប្រទេសគុយបា ដែលជាសម្ព័ន្ធមិត្តជិតស្និទ្ធរបស់វ៉េណេស៊ុយអេឡា «មើលទៅហាក់ដូចជាជិត​ដួលរលំ» ដោយ​ខ្លួនឯង ដោយមិនចាំបាច់ប្រើកម្លាំងយោធា​អាមេរិកផ្ទាល់​ឡើយ។

ទន្ទឹម​នោះ ប្រធានាធិបតី​អាមេរិក ក៏​បាន​ព្រមាន​ថា ​ក្រុង​វ៉ាស៊ីនតោន​អាចនឹងបើកការវាយប្រហារយោធាលើកទីពីរលើប្រទេសវ៉េណេស៊ុយអេឡា បើសមាជិកដែលនៅសេសសល់នៃរដ្ឋបាលរបស់ប្រធានាធិបតី​ម៉ាឌូរ៉ូ មិនសហការជាមួយទីក្រុងវ៉ាស៊ីនតោន ដែលការលើកឡើងនេះបានបង្កឲ្យមានការភ័យខ្លាចអំពីការជ្រៀតជ្រែកយោធាដ៏ធំរបស់អាមេរិកនៅទូទាំងតំបន់អាមេរិកឡាទីន។

បច្ចុប្បន្ន លោកម៉ាឌូរ៉ូ កំពុងត្រូវបានឃុំខ្លួនក្នុងទីក្រុងញូវយ៉ក មុនពេលបង្ហាញខ្លួននៅចំពោះមុខតុលាការពីបទចោទប្រកាន់ពាក់ព័ន្ធនឹងគ្រឿងញៀន បន្ទាប់ពីអ្វីដែលមន្ត្រី​អាមេរិកបានពណ៌នាថាជាប្រតិបត្តិការអនុវត្តច្បាប់។ ការចាប់ខ្លួននេះ បានក្លាយជាការជ្រៀតជ្រែកដ៏ចម្រូងចម្រាសបំផុតរបស់ទីក្រុងវ៉ាស៊ីនតោននៅក្នុងតំបន់អាមេរិកឡាទីន ចាប់តាំងពីការឈ្លានពានប្រទេសប៉ាណាម៉ាកាលពីឆ្នាំ​១៩៨៩។

លោកត្រាំ បានបញ្ជាក់ថា រដ្ឋបាលរបស់លោកនឹងស្វែងរកកិច្ចសហប្រតិបត្តិការពីមន្ត្រីវ៉េណេស៊ុយអេឡាដែលនៅសេសសល់ ដើម្បីប្រយុទ្ធប្រឆាំងនឹងការជួញដូរគ្រឿងញៀន និងរៀបចំរចនាសម្ព័ន្ធឧស្សាហកម្មប្រេងរបស់ប្រទេសនេះឡើងវិញ ជាជាងការជំរុញ​ឲ្យ​មានការបោះឆ្នោតភ្លាមៗ។

មន្ត្រីវ៉េណេស៊ុយអេឡាបានថ្កោលទោសការឃុំខ្លួនលោកម៉ាឌូរ៉ូ ថាជាការចាប់ជំរិត និងបានចោទប្រកាន់ទីក្រុងវ៉ាស៊ីនតោនថាចង់គ្រប់គ្រងលើធនធានប្រេងរបស់ប្រទេសខ្លួន។ អនុប្រធានាធិបតី លោកស្រី Delcy Rodríguez បានឡើងកាន់តំណែងជាអ្នកដឹកនាំបណ្តោះអាសន្ន ដោយមានការគាំទ្រពីតុលាការកំពូលរបស់វ៉េណេស៊ុយអេឡា ទោះបីជាលោកស្រីបានបដិសេធចំពោះការអះអាងដែលថា លោកស្រីមានឆន្ទៈធ្វើការជាមួយ​អាមេរិកក៏ដោយ៕

ប្រែសម្រួល៖ ឈាង