តើបន្ទប់សុវត្ថិភាពរបស់លោក ម៉ាឌូរ៉ូ ពិសេសកម្រិតណា?

ពិតជារឿងដ៏អស្ចារ្យដែលកងកម្លាំងពិសេសអាមេរិក Delta Force បើកប្រតិបត្តិការចាប់ខ្លួនប្រធានាធិបតីវ៉េណេស៊ុយអេឡា នីកូឡាស់ ម៉ាឌូរ៉ូនិងភរិយា ដោយចំណាយពេលខ្លីបំផុត ធ្វើឲ្យអ្នកទាំងពីរគ្មានឱកាសរត់ចូលបន្ទប់សុវត្ថិភាពទាន់ពេលនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាជាបន្ទប់ដ៏អាថ៌កំបាំងនិងសម្ងាត់បំផុត ប៉ុន្តែត្រូវបានលាតត្រដាងដោយកងទ័ពអាមេរិក ក្រោយប្រតិបត្តិការ «Operation Absolute Resolve» កាលពីថ្ងៃសៅរ៍ទី៣ខែមករាឆ្នាំ២០២៦។

យោងតាមប្រភពព័ត៌មានបរទេសមួយចំនួនដូចជា New York Times បានឲ្យដឹងថា បន្ទប់សុវត្ថិភាព (Safe Room) ឬវិមានក្រោមដីរបស់លោក ម៉ាឌូរ៉ូ គឺជាបន្ទាយដែកថែបដ៏រឹងមាំបំផុតមួយ ដែលសង់ឡើងដើម្បីការពារលោកពីការធ្វើរដ្ឋប្រហារ ការលបធ្វើឃាត និងសូម្បីតែការវាយប្រហារតាមអាកាសខ្នាតធំពីសហរដ្ឋអាមេរិក។

បន្ទប់សុវត្ថិភាពដែលស្ថិតនៅក្នុងវិមានរបស់លោកម៉ាឌូរ៉ូផ្ទាល់ មិនមែនត្រឹមតែជាបន្ទប់ធម្មតានោះទេ ប៉ុន្តែវាមានស្រោបដោយដែកថែបក្រាស់ៗ ដែលអាចទប់ទល់នឹងគ្រាប់បែក និងការផ្ទុះពីខាងក្រៅបានយ៉ាងមានប្រសិទ្ធភាព។ ទ្វារបន្ទប់នោះមានទម្ងន់ធ្ងន់ណាស់ និងក្រាស់ខ្លាំង រហូតដល់កងទ័ពអាមេរិកត្រូវត្រៀម «ម៉ាស៊ីនកាត់ដែកខ្នាតយក្ស» ដើម្បីកាត់ទម្លុះ ប្រសិនបើលោក ម៉ាឌូរ៉ូ ចូលទៅក្នុងនោះទាន់ពេល។

ក្រៅពីបន្ទប់សុវត្ថិភាពក្នុងវិមាន លោក ម៉ាឌូក៏មានជម្រកក្រោមដីសម្ងាត់ (Bunker) ដែលមានលក្ខណៈពិសេសអស្ចារ្យផងដែរ។ វាមានជម្រៅរហូតដល់ ៤០ ម៉ែត្រ ក្រោមដី និងមានចំនួន ៥ ជាន់។

បន្ទប់មានទំហំប្រហែល ១៥ ០០០ ម៉ែត្រការ៉េ ដែលអាចផ្ទុកមនុស្សបានដល់ទៅ ១៥០ នាក់។ ក្នុងនោះមានស្តុកអាហារសម្រាប់បរិភោគបាន ៤ ខែ និងមានប្រព័ន្ធផលិតអុកស៊ីសែនដោយខ្លួនឯងដែលអាចប្រើប្រាស់បាន ២៥ ថ្ងៃ ទោះបីជាត្រូវគេកាត់ផ្តាច់ខ្យល់ពីខាងក្រៅក៏ដោយ។

លើសពីនេះ ខាងក្នុងនោះមានទាំងកន្លែងហាត់ប្រាណ បន្ទប់បញ្ជាការដែលមានប្រព័ន្ធវីដេអូខនហ្វេរិន (VTC) និងបន្ទប់សម្រាកសម្រាប់មន្ត្រីជាន់ខ្ពស់ទៀតផង។

គេបានរកឃើញអាហារកំប៉ុងគុណភាពខ្ពស់ និងស្រាថ្លៃៗដែលនាំចូលពីអឺរ៉ុប, មានម៉ាស៊ីនចម្រោះខ្យល់កម្រិតមន្ទីរពិសោធន៍ ដែលអាចការពារពីការវាយប្រហារដោយអាវុធគីមី ឬជីវសាស្ត្រ, មានឧបករណ៍សង្គ្រោះបន្ទាន់ ឱសថ និងឈាមបម្រុង ដែលត្រូវនឹងប្រភេទឈាមរបស់លោក ម៉ាឌូរ៉ូ និងក្រុមគ្រួសារ។

យោងតាមរបាយការណ៍ខ្លះ គេបានឃើញមានប្រអប់ដាក់មាសដុំ និងសាច់ប្រាក់ដុល្លារអាមេរិកយ៉ាងច្រើនសន្ធឹកសន្ធាប់ ដែលត្រៀមទុកសម្រាប់ប្រើប្រាស់ក្នុងករណីត្រូវភៀសខ្លួនទៅក្រៅប្រទេស។ ក៏មានឯកសារសំខាន់ៗជាច្រើនពាក់ព័ន្ធនឹងកិច្ចព្រមព្រៀងប្រេងកាត និងបញ្ជីឈ្មោះមន្ត្រីជិតស្និទ្ធផងដែរ។

មិនត្រឹមប៉ុណ្ណឹង នៅក្នុងនោះមានស្តុកទុកនូវកាំភ្លើងខ្លី និងកាំភ្លើងស្វ័យប្រវត្តិជាច្រើនដើម ដែលសុទ្ធតែជាប្រភេទទំនើបៗសម្រាប់ការពារខ្លួនក្នុងដំណាក់កាលចុងក្រោយ។

អ្វីដែលពិសេសបំផុត គឺវាមាន ផ្លូវក្រោមដីតភ្ជាប់ដោយផ្ទាល់ ទៅកាន់ចំណតយន្តហោះប្រធានាធិបតីនៅអាកាសយានដ្ឋាន Maiquetía ដើម្បីឲ្យលោកអាចឡើងយន្តហោះភៀសខ្លួនចេញពីប្រទេសបានភ្លាមៗ ក្នុងករណីមានអាសន្ន៕

អត្ថបទ៖ សុខ សុវណ្ណ