ជំងឺផ្តាសាយបំប្លែងខ្លួន កំពុងឆ្លងរាលដាលខ្លាំងនៅ ថៃ

ជំងឺផ្តាសាយបំប្លែងខ្លួនប្រភេទ A(H3N2) កំពុងឆ្លងរាលដាលនៅក្នុងប្រទេសថៃ ខណៈគ្រូពេទ្យជំនាញនៅសាកលវិទ្យាល័យជូឡាឡុងកន លោក Yong Poovorawan ព្រមានថា វាមានភាពធន់នឹងវ៉ាសាំង ប៉ុន្តែមិនទាន់បង្ហាញសញ្ញានៃការបង្ករោគសញ្ញាធ្ងន់ធ្ងរនោះទេ។ នេះបើតាមការផ្សាយរបស់ Bangkok Post កាលពីថ្ងៃព្រហស្បតិ៍ទី៨ខែមករាឆ្នាំ២០២៦។

តាមការឲ្យដឹងពីលោក Yong, បច្ចុប្បន្នវីរុសបំប្លែងខ្លួននេះ កំពុងរាលដាលខ្លាំងនៅភាគខាងជើងប្រទេស ហើយដោយសារតែមិនខ្លាចវ៉ាក់សាំង ទើបវាឆ្លងរាលដាលលឿនខុសធម្មតាបែបនេះ។

ចំពោះក្រុមមនុស្សដែលមានអត្រាឆ្លងខ្ពស់បំផុតគឺ កុមារអាយុចន្លោះពី ៥ ដល់ ៩ ឆ្នាំ និងមនុស្សចាស់ ដោយភាគច្រើនជាករណីឆ្លងជាចង្កោមនៅតាមសាលារៀន មណ្ឌលឃុំឃាំង និងកន្លែងដែលមានមនុស្សជួបជុំគ្នាច្រើន។

សម្រាប់ទិន្នន័យពេញមួយឆ្នាំ ២០២៥ រហូតមកដល់ដើមឆ្នាំ ២០២៦នេះ ចំនួនអ្នកឆ្លងជំងឺផ្ដាសាយធំសរុបនៅថៃបានហក់ឡើងលើស ៩៤០ ០០០ ករណី ដែលជាតួលេខខ្ពស់បំផុតមិនធ្លាប់មាន។

ក្នុងនោះក៏មានរបាយការណ៍មនុស្សស្លាប់យ៉ាងតិច១០០នាក់ផងដែរ ដោយភាគច្រើនជាមនុស្សចាស់ដែលមានអាយុជាមធ្យម ៦១ ឆ្នាំ និងកុមារតូចៗ៕

អត្ថបទ៖ សុខ សុវណ្ណ