ថៃ យកវិធានការសម័យកូវីដ-១៩ មកអនុវត្តជាថ្មី ដើម្បីទប់ស្កាត់ ការឆ្លងរាលដាល វីរុសនីប៉ាហ៍

ស្របពេលមានការព្រមានអំពីហានិភ័យផ្ទុះវីរុសនីប៉ាហ៍ (Nipah), ប្រទេសថៃកំពុងរឹតបណ្តឹងការទប់ស្កាត់ ដោយពេលនេះបានយកវិធានការសម័យកូវីដ-១៩ មកអនុវត្តជាថ្មី ដូចជាការស្កេនកម្តៅនិងចត្តាឡីស័កអ្នកដែលចេញរោគសញ្ញាសង្ស័យ។

កាសែត Bangkok Post បានដកស្រង់សម្តីនាយករដ្ឋមន្ត្រី អនុទីន ឆាន់វីរៈគុល ដែលនិយាយថា៖ «ប្រព័ន្ធត្រួតពិនិត្យសុខភាពសាធារណៈត្រូវបានកែសម្រួល ដោយផ្អែកលើគំរូដែលយើងប្រើប្រាស់ក្នុងអំឡុងពេលនៃការផ្ទុះឡើងនៃជំងឺរាតត្បាតកូវីដ-១៩ នៅប្រទេសថៃ។ ដ្បិតមិនទាន់មានករណីមេរោគ Nipah នៅថៃក៏ដោយ ប៉ុន្តែវិធានការការពារត្រូវតែពង្រឹងឲ្យលើសពីកម្រិតធម្មតា ពីព្រោះមិនទាន់មានទាំងថ្នាំព្យាបាល ឬវ៉ាក់សាំងប្រឆាំងវីរុសនេះនៅឡើយទេ»។

ស្របពេលជាមួយគ្នានោះ នាយកដ្ឋានគ្រប់គ្រងជំងឺឆ្លងថៃ បានពង្រឹងវិធានការទប់ស្កាត់នៅអាកាសយានដ្ឋាន សុវណ្ណភូមិ ដុនមឿង និងភូកេត ជាពិសេសស្កេនអ្នកដំណើរមកពីប្រទេសឥណ្ឌា។

វិធានការនេះកើតឡើងបន្ទាប់ពីអ្នកជំនាញផ្នែកវីរុស ព្រមានថា ប្រទេសថៃកំពុងមានហានិភ័យខ្ពស់ក្នុងការផ្ទុះជំងឺនេះផងដែរ ព្រោះវាជាវីរុសឆ្លងតាមរយៈសត្វប្រចៀវស៊ីផ្លែឈើ ដែលជាសត្វមានវត្តមាននៅពាសពេញប្រទេសថៃតែម្តង។

តាមការផ្សាយរបស់ Bangkok Post ដដែល, វេជ្ជបណ្ឌិត Yong Poovorawan ប្រធានមជ្ឈមណ្ឌលជំនាញផ្នែកវីរុសវិទ្យាក្លីនិកនៃសាកលវិទ្យាល័យជូឡាឡុងកន បានបង្ហោះ Facebook ថា៖ មេរោគ នីប៉ាហ៍ កើតឡើងតាមធម្មជាតិនៅក្នុងសត្វប្រចៀវស៊ីផ្លែឈើ ដែលមានវត្តមាននៅទូទាំងប្រទេស ជាពិសេសក្នុងសហគមន៍ វត្តអារាម និងចម្ការហូបផ្លែ ដែលហានិភ័យមានកម្រិតខ្ពស់ជាងមុន ដោយសារតែបរិស្ថាន និងចំណីអាហារដែលមានប្រឡាក់ទឹកមាត់ និងទឹកនោមរបស់ប្រចៀវ។ ប្រទេសថៃមានកត្តាកសិកម្ម និងការបរិភោគមួយចំនួន ដែលអាចបង្កើនហានិភ័យនៃការឆ្លងមេរោគពីសត្វមកមនុស្ស។ ជាឧទាហរណ៍ ចម្ការហូបផ្លែដែលនៅជិតសហគមន៍ ការដែលប្រជាជនបរិភោគផ្លែឈើស្រស់ ឬផឹកទឹកផ្លែឈើស្រស់ និងមនុស្សនៅក្នុងតំបន់ខ្លះបរិភោគអាហារឆៅ ឬចម្អិនមិនបានឆ្អិនល្អ។

ស្របពេលជាមួយគ្នានោះ លោកក៏លើកឡើងអំពីឧស្សាហកម្មចិញ្ចឹមជ្រូកដ៏ធំនៅក្នុងប្រទេសថៃផងដែរ ដោយបញ្ជាក់ថា៖ ប្រសិនបើសត្វទាំងនេះឆ្លងមេរោគ ពួកវាអាចក្លាយជាភ្នាក់ងារចម្លងកាន់តែខ្លាំង។ ដ្បិតហានិភ័យនៃការផ្ទុះឆ្លងនៅមានកម្រិតទាបក្នុងពេលបច្ចុប្បន្នក៏ដោយ ប៉ុន្តែការផ្ទុះឡើងជាក់ស្តែងណាមួយ អាចមានផលប៉ះពាល់យ៉ាងធ្ងន់ធ្ងរដល់សុខភាពសាធារណៈ និងសេដ្ឋកិច្ច៕

អត្ថបទ៖ សុខ សុវណ្ណ