ប្រយ័ត្ន!​ ក្មេងៗអាយុ៨ខែដល់១៤ឆ្នាំ ងាយឆ្លងវីរុសបំប្លែងខ្លួនបំផុត

ពេលនេះវីរុសបំប្លែងខ្លួនថ្មី មិនត្រឹមតែនាំឱ្យមានផលវិបាកធ្ងន់ធ្ងរចំពោះមនុស្សពេញវ័យប៉ុណ្ណោះទេ ប៉ុន្តែវាកំពុងបង្កគ្រោះថ្នាក់ចំពោះកុមារដូចគ្នា ជាពិសេសក្មេងៗចន្លោះពី ៨ ខែដល់ ១៤ ឆ្នាំ។

បើតាមការដកស្រង់សម្ដីពីអ្នកជំនាញបានឱ្យដឹងថា វីរុសកូវីដបំប្លែងខ្លួនអាចឆ្លងទៅកុមារយ៉ាងងាយស្រួល ខណៈមកដល់ឥឡូវមិនទាន់មានវ៉ាក់សាំងណាមួយត្រូវបានអនុម័តឱ្យប្រើប្រាស់ចំពោះកុមារនៅឡើយ។

តាមរបាយការណ៍ថ្មីដែលចុះផ្សាយដោយ TIME បានឱ្យដឹងថា វីរុសបំប្លែងថ្មីកំពុងរាលដាលយ៉ាងឆាប់រហ័សក្នុងចំណោមកុមារចាប់ពីអាយុ ៨ ខែដល់ ១៤ ឆ្នាំ នៅក្នុងប្រទេសឥណ្ឌា។

ទោះបីស្ថានភាពបច្ចុប្បន្ន កុមារមិនទាន់ប្រឈមហានិភ័យខ្លាំងក៏ពិតតមែន ប៉ុន្តែវាចាំបាច់ណាស់ដែលត្រូវយកចិត្តទុកដាក់ដល់កុមារនិងសម្គាល់រោគសញ្ញាទូទៅនៃវីរុសបំប្លែងថ្មីទៅលើពួកគេ។

យោងតាមរបាយការណ៍ដែលបោះពុម្ពផ្សាយដោយសាកលវិទ្យាល័យ Harvard Health និយាយថា កុមារដែលឆ្លងវីរុសបំប្លែងខ្លួនថ្មីអាចមានរោគសញ្ញាខុសគ្នាទាំងស្រុងពីមនុស្សពេញវ័យ។ ក្មេងខ្លះអាចគ្មានរោគសញ្ញា ខណៈក្មេងខ្លះទៀតមានរោគសញ្ញាគ្រុនក្ដៅតិចតួចប៉ុណ្ណោះ។

យ៉ាងណាមិញ រោគសញ្ញាទូទៅរួមមាន គ្រុនក្តៅ ឈឺក្បាល ក្អក និងផ្ដាសាយ។ ចំណែកកម្ដៅដែលបញ្ជាក់ថាកុមារកំពុងគ្រុនក្តៅគឺសីតុណ្ហភាពចាប់ពី ៣៩-៤០ អង្សាសេ ក្នុងរយៈពេល ៤-៥ ថ្ងៃជាប់គ្នា។ មួយវិញទៀត សូម្បីតែហៀរសំបោរក៏អាចបញ្ជាក់ថាកុមារបានផ្ទុកវីរុសនៅក្នុងខ្លួនបានដែរ។ ចំណែករោគសញ្ញាបន្ថែមផ្សេងៗរួមមាន បបូរមាត់ឡើងក្រហមឬស្ងួតប្រេះ ឬស្បែកមុខប្រែជាំ ឆាប់ខឹង គេងតិច និងបាត់បង់ចំណង់អាហារ។

ប្រសិនបើក្មេងមានរោគសញ្ញាកាន់តែធ្ងន់ធ្ងរនិងអូសបន្លាយរយៈពេលយូរ វាអាចប៉ះពាល់ដល់សួតរបស់ពួកគេ ឬអាចបណ្ដាលឱ្យមានជំងឺរលាកសួត។ បន្ថែមពីលើនេះ វាក៏អាចមានផលប៉ះពាល់លើសរីរាង្គផ្សេងទៀតរបស់កុមារដូចជា បេះដូង សួត សរសៃឈាម តម្រងនោម ប្រព័ន្ធរំលាយអាហារ ខួរក្បាល ស្បែក ឬភ្នែក។

ដូច្នេះ ត្រូវយកចិត្តទុកដាក់ និងតាមដានសុខភាពក្មេងៗឱ្យបានដិតដល់ ប្រសិនបើមានករណីសង្ស័យ សូមពិគ្រោះជាមួយគ្រូពេទ្យជាបន្ទាន់៕

ប្រែសម្រួល៖ សន្យា

ប្រភព៖ TIME

ចុចអាន៖ មក​ដឹង​ពី​កន្លែង​​មាន​ហានិភ័យ​ឆ្លង​ជំងឺ​កូវីដ​ច្រើន​ជាង​គេ ដែល​អ្នក​គួរ​ប្រុងប្រយ័ត្ន

ចុចអាន៖ ប្រភេទវីរុសកូវីដបំប្លែងថ្មី និងឥទ្ធិពលលើសុខភាព យើងគួរដឹង