ព័ត៌មានអន្ដរជាតិ

អ៊ុយក្រែននិងរុស្ស៊ីឯកភាពបន្តប្រជុំនៅសប្តាហ៍ក្រោយ ខណៈការចរចាលើកនេះ«វិជ្ជមាន»

បានផុស

៣ ខែ មុន

នៅ

ថ្ងៃចន្ទ ២៦ មករា ២០២៦

ដោយ

ដោយមិនបង្អង់រង់ចាំយូរ ការចរចាស្វែងរកដំណោះស្រាយក្នុងជម្លោះរុស្ស៊ីនិងអ៊ុយក្រែនក្នុងក្របខ័ណ្ឌត្រីភាគី មានសហរដ្ឋអាមេរិកជាអ្នកសម្របសម្រួលនោះ នឹងបន្តធ្វើនៅសប្តាហ៍ក្រោយ យោងតាមអ្នកនាំពាក្យវិមានក្រឹមឡាំង ខណៈលទ្ធផលនៃកិច្ចប្រជុំចរចាកម្រិតខ្ពស់លើកដំបូងមិនត្រូវបានផ្សព្វផ្សាយឲ្យដឹងរហូតដល់ពេលនេះ។

តាមការចេញផ្សាយរបស់សារព័ត៌មានអ៊ុយក្រែន Kyiv Post និង UNN អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានប្រកាសថា កិច្ចប្រជុំនៃការចរចាត្រីភាគីរវាងប្រតិភូមកពីអ៊ុយក្រែននិងរុស្ស៊ី និងសហរដ្ឋអាមេរិក ត្រូវបានគ្រោងឡើងនៅសប្តាហ៍ក្រោយ។

ទោះបីជាការប្រកាសបែបនេះក៏ដោយ អ្នកនាំពាក្យរដ្ឋាភិបាលរុស្ស៊ីរូបនេះ មិនបានបញ្ជាក់នូវកាលបរិច្ឆេទជាក់លាក់សម្រាប់កិច្ចប្រជុំនោះទេ។

លោក ប៉េស្កូវ ត្រូវបានស្រង់សម្តី ដោយ UNN ដូចបាននិយាយថា៖ «នេះជាកិច្ចការស្មុគស្មាញមួយ បញ្ហាស្មុគស្មាញដែលមាននៅក្នុងរបៀបវារៈ។ ប៉ុន្តែការពិតខ្លាំងនៅត្រង់ថា ទំនាក់ទំនងទាំងនេះបានចាប់ផ្តើមក្នុងលក្ខណៈស្ថាបនាអាចវាយតម្លៃបានជាវិជ្ជមាន។ ប៉ុន្តែនៅមានការងារកាន់តែស្មុគស្មាញនៅខាងមុខ»។

យោងតាមលោក Peskov ផ្នែកទឹកដីតាម«រូបមន្ត Anchorage» គឺជាមូលដ្ឋានគ្រឹះសម្រាប់ប្រទេសរុស្ស៊ី។ លោកបានកត់សម្គាល់ថា វិមានក្រឹមឡាំងនឹងមិនពិភាក្សាជាសាធារណៈអំពីបទប្បញ្ញត្តិនីមួយៗនៃ «រូបមន្ត Anchorage» នោះទេ។

«រូបមន្ត Anchorage» គឺសំដៅដល់ការចរចាលើកដំបូងរវាងប្រធានាធិបតីរុស្ស៊ី លោក វ៉្លាឌីមៀរ ពូទីន និងប្រធានាធិបតីសហរដ្ឋអាមេរិក លោក ដូណាល់ ត្រាំ កាលថ្ងៃទី១៥ខែសីហាឆ្នាំ២០២៥ នៅរដ្ឋអាឡាស្កា។

យោងការផ្សាយរបស់ Newsweek រុស្ស៊ីកំពុងទាមទារឱ្យអ៊ុយក្រែនប្រគល់ការគ្រប់គ្រងតំបន់ Donbas ភាគខាងកើតរបស់អ៊ុយក្រែនទាំងអស់ ដែលរួមមានតំបន់ខេត្ត Donetsk និង Luhansk។ ប្រហែល៨០ភាគរយនៃតំបន់ Donbas ត្រូវបានកាន់កាប់ដោយកងកម្លាំងរុស្ស៊ី។ ប៉ុន្តែអ៊ុយក្រែននៅតែគ្រប់គ្រងទីក្រុងដែលមានរបាំងការពារមាំពីរនៅ Donetsk គឺ Kramatorsk និង Sloviansk ហើយអ្នកវិភាគនិយាយថា វាអាចចំណាយពេលរាប់ឆ្នាំទៀតសម្រាប់រុស្ស៊ីដើម្បីដណ្តើមកាន់កាប់តំបន់នោះពេញលេញ។

យោងតាមការផ្សាយរបស់ CNN ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានលើកឡើងថា ការពិភាក្សាត្រីភាគីលើកដំបូងប្រកបដោយការស្ថាបនា ដែលមានន័យថា ពួកគេមើលឃើញការរីកចម្រើនទៅមុខក្នុងការចរចារកដំណោះស្រាយទៅបញ្ចប់សង្គ្រាម ដែលបានចំណាយពេលជិត៤ឆ្នាំទៅហើយនោះ៕

រ៉ាន់ រើយ