វៀតណាម ប្រកាសឲ្យប្រយ័ត្ន ម្សៅទឹកដោះគោ​ ៥​ប្រភេទ​ ព្រោះមានផ្ទុកសារធាតុពុល គ្រោះថ្នាក់ដល់កុមារ 

ក្រសួងសុខាភិបាលវៀតណាម បានចេញសេចក្តីប្រកាសឲ្យប្រយ័ត្ន ហើយប្រមូលមកវិញនិងផ្អាកលក់ជាបន្ទាន់នូវម្សៅទឹកដោះគោទារកចំនួន៥ប្រភេទ ដោយសង្ស័យថាមានផ្ទុកសារធាតុពុល Cereulide ដែលជាជាតិពុលចេញពីបាក់តេរី Bacillus cereus។

សារធាតុ Cereulide គឺជាជាតិពុលចេញពីបាក់តេរី Bacillus cereus ដែលអាចបណ្តាលឲ្យទារកក្អួតចង្អោរខ្លាំង និងរាករូសក្នុងរយៈពេលខ្លីបន្ទាប់ពីទទួលទាន។ អ្វីដែលគ្រោះថ្នាក់បំផុតនោះគឺជាតិពុលនេះអាចធន់នឹងកម្ដៅ ទោះបីជាដាំឲ្យពុះក៏មិនបាត់បង់ជាតិពុលដែរ។

តាមការផ្សាយរបស់ VN Express កាលពីថ្ងៃអង្គារទី២៧ខែមករាឆ្នាំ២០២៦ ម្សៅទឹកដោះគោដែលត្រូវប្រមូលត្រឡប់មកវិញនេះ រួមមាន៖

• Babybio Optima 1 របស់ក្រុមហ៊ុន Vitagermine លេខកូដ ៨៩៤៤០៨ កម្រិតវេចខ្ចប់ ៨០០ក្រាម
• Babybio Optima 1 របស់ក្រុមហ៊ុន Vitagermine លេខកូដ ៩០០០៣៥ កម្រិតវេចខ្ចប់ ៨០០ក្រាម
• Babybio Optima 1 របស់ក្រុមហ៊ុន Vitagermine លេខកូដ ៩០០៩៣២ កម្រិតវេចខ្ចប់ ៤០០ក្រាម
• Alula Gold Reflux របស់ក្រុមហ៊ុន Sanulac Nutritionals Australia Pty Ltd លេខកូដ ៨០០០០០៣៣៨៧ កម្រិតវេចខ្ចប់ ៩០០ក្រាម
• Alula Colic & Constipation របស់ក្រុមហ៊ុន Sanulac Nutritionals Australia Pty Ltd លេខកូដ ៨០០០០០៣៤០៧ កម្រិតវេចខ្ចប់ ៨៥០ក្រាម

ភ្នាក់ងាររដ្ឋបាលសុវត្ថិភាពចំណីអាហារវៀតណាមរកឃើញថា ផលិតផលទាំងនេះកំពុងត្រូវបានដាក់លក់នៅលើបណ្តាញលក់ទំនិញអនឡាញធំៗ ដូចជា Shopee, Lazada និង Ausmart ជាដើម។

សេចក្តីប្រកាសនេះធ្វើឡើង បន្ទាប់ពីអាជ្ញាធរសុវត្ថិភាពចំណីអាហារហុងកុង (CFS) និងអាជ្ញាធរសុវត្ថិភាពចំណីអាហារអូស្ត្រាលី និងនូវែលសេឡង់ (FSANZ) សុទ្ធតែបញ្ជាក់ថា ផលិតផលទាំងនេះមានផ្ទុកជាតិពុល Cereulide ដែលបង្កហានិភ័យដោយផ្ទាល់ដល់សុខភាពកុមារតូចៗ។

សេចក្តីប្រកាសនេះទៀតសោត កើតឡើងបន្ទាប់ពីក្រសួងក៏បញ្ជាឲ្យមាន​ការត្រួតពិនិត្យឡើងវិញទូទាំងប្រទេសផងដែរ លើផលិតផលម្សៅទឹកដោះគោទារក Aptamil ក្រោយក្រុមហ៊ុនបារាំងដែលផលិតម្សៅទឹកដោះគោម៉ាកនេះ បាន​ប្រកាសប្រមូលវា​មកវិញនៅប្រទេសអង់គ្លេស បន្ទាប់ពីរកឃើញថា មាន​ផ្ទុក​សារធាតុដូចគ្នានេះ៕

អត្ថបទ៖ សុខ សុវណ្ណ