ធ្លាប់តែជួយផ្តល់ឧបករណ៍ធ្វើតេស្តនិងម៉ាស់ទៅឲ្យអាមេរិក ពេលនេះកូរ៉េខាងត្បូង សុំឲ្យក្រុងវ៉ាស៊ីនតោនជួយផ្តល់វ៉ាក់សាំងវិញផងព្រោះខ្លួនកំពុងខ្វះខាត

រដ្ឋមន្ត្រីការបរទេសកូរ៉េខាងត្បូងបាននិយាយនៅថ្ងៃពុធទី២១ខែមេសានេះថា លោកសង្ឃឹមថា សហរដ្ឋអាមេរិកនឹងជួយដោះស្រាយបញ្ហាកង្វះវ៉ាក់សាំងកូវីដរបស់ខ្លួនវិញ ជាការតបស្នងទៅនឹងឧបករណ៍ធ្វើតេស្តនិងម៉ាស់ ដែលខ្លួនបានផ្តល់ឲ្យទីក្រុងវ៉ាស៊ីនតោន នៅពេលរោគរាតត្បាតផ្ទុះឡើងដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំនេះបានធ្វើឡើង ស្របពេលរដ្ឋាភិបាលកូរ៉េខាងត្បូងកំពុងរងការរិះគន់ពីប្រព័ន្ធផ្សព្វផ្សាយក្នុងស្រុក សម្រាប់ការធ្វើមិនបានគ្រប់ជ្រុងជ្រោយ ដើម្បីទទួលវ៉ាក់សាំងឲ្យបានគ្រប់គ្រាន់។ ប្រទេសនេះបានចាក់វ៉ាក់សាំងដល់ប្រជាជនរបស់ខ្លួន ត្រឹមតែ៣ភាគរយប៉ុណ្ណោះ ដោយសារតែការផ្គត់ផ្គង់របស់ពិភពលោក និងការទទួលបានមានកំណត់។

លោក Chung Eui-yong បានប្រាប់ Kwanhun Club ដែលជាសមាគមតំណាងអ្នកសារព័ត៌មាននៅកូរ៉េខាងត្បូងថា “យើងបានសង្កត់ធ្ងន់ទៅសហរដ្ឋអាមេរិកថា មិត្តភក្តិគឺពិតជាត្រូវការមែន”។

លោកនិយាយថា ប្រទេសកូរ៉េខាងត្បូង បានប្រគល់ឧបករណ៍ធ្វើតេស្តរកមេរោគ និងម៉ាស់ក្នុងបរិមាណដ៏ច្រើនទៅឲ្យទីក្រុងវ៉ាស៊ីនតោន នៅដំណាក់កាលដំបូងនៃជំងឺរាតត្បាតកូវីដ-១៩ ក្នុងស្មារតីនៃសម្ព័ន្ធមិត្តពិសេស កូរ៉េខាងត្បូង-អាមេរិក បើទោះបីជាការផ្គត់ផ្គង់ក្នុងស្រុកមានសភាពតឹងណែនក៏ដោយ។

យើងសង្ឃឹមថា សហរដ្ឋអាមេរិកនឹងជួយយើងវិញ ក្នុងការប្រឈមមុខជាមួយបញ្ហាវ៉ាក់សាំង ដោយផ្អែកលើសាមគ្គីភាពដែលយើងបានបង្ហាញកាលពីឆ្នាំមុន។

ទោះបីជាយ៉ាងណាក៏ដោយ ស្ថានទូតអាមេរិកប្រចាំនៅទីក្រុងសេអ៊ូល មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ Reuters ទេ។

ប្រជាជនប្រមាណ១.៧៧លាននាក់នៅក្នុងប្រទេសកូរ៉េខាងត្បូង បានចាក់វ៉ាក់សាំង AstraZeneca ឬ Pfizer ដូសទី១។ អត្រានៃការចាក់ថ្នាំបង្ការនេះគឺទាបណាស់ បើប្រៀបធៀបជាមួយអត្រាចាក់វ៉ាក់សាំង ៤០ភាគរយនៅសហរដ្ឋអាមេរិក។

គួរបញ្ជាក់ថា គិតត្រឹមម៉ោង៣រសៀលថ្ងៃពុធទី២១ខែមេសា ប្រទេសកូរ៉េខាងត្បូង បានកត់ត្រាករណីឆ្លងជំងឺកូវីដ-១៩សរុប ១១៥,៩២៦ករណី ស្លាប់១,៨០៦នាក់ និងជាសះស្បើយ១០៥,៨៧៧នាក់៕

ប្រែសម្រួលដោយ៖ Vann Vann

ប្រភព៖ Asian One

ចុចអាន៖ អង់គ្លេស៖ មានអ្នកចាក់វ៉ាក់សាំងរួចត្រឹម៣២នាក់ប៉ុណ្ណោះ ក្នុងចំណោមមនុស្សជាង៧ម៉ឺននាក់ ដែលត្រូវបញ្ជូនទៅមន្ទីរពេទ្យជាមួយជំងឺកូវីដ