សារធាតុពុល Cereulide នៅក្នុងម្សៅទឹកដោះគោទារក អាចធ្វើឲ្យក្អួត និងខ្សោយថ្លើម

ក្រុមហ៊ុនផលិតផលិតផលទឹកដោះគោធំៗ រួមទាំងក្រុមហ៊ុនយក្សឧស្សាហកម្ម Nestle និង Danone និងក្រុមហ៊ុនឯកជន Lactalis បានចេញការប្រមូលផលិតផលម្សៅទឹកដោះគោទារកដោយប្រុងប្រយ័ត្ន ដោយសារក្តីបារម្ភថា វាអាចនឹងមានការបំពុលជាមួយនឹងជាតិសេរូលៃដ៍ (cereulide) បង្កឡើងដោយបាក់តេរី បាស៊ីលុស សេរៀស (Bacillus cereus) ដែលរីករាលដាលនៅក្នុងបរិស្ថាន និងនៅក្នុងវត្ថុធាតុដើមអាហារឆៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Reuters សារធាតុសេរូលៃដ៍ វាបង្កើតឡើងនៅក្នុងអាហារនៅពេលដែលបាក់តេរីកើនឡើង ជាធម្មតាដោយសារតែអាហារឆ្អិនត្រូវបានទុកចោលយូរពេកនៅសីតុណ្ហភាពបន្ទប់។ គេរកឃើញវាជាញឹកញាប់នៅក្នុងបាយដែលចម្អិនរួច ហើយបន្ទាប់មកចុះត្រជាក់យូរ បណ្តាលឲ្យមានជំងឺដែលពាក់ព័ន្ធនេះមានឈ្មោះក្រៅផ្លូវការថា «រោគសញ្ញាបាយឆា» fried rice syndrome។ ទោះជាយ៉ាងណាក៏ដោយ វាក៏ត្រូវអ្នកជំនាញឃើញនៅក្នុងអាហារដែលមានម្សៅដូចជាប៉ាស្តា និងដំឡូង ក៏ដូចជាផលិតផលទឹកដោះគោ អាហារសមុទ្រ និងបន្លែផងដែរ ប្រសិនបើរក្សាទុកមិនបានល្អឬត្រឹមត្រូវ។

ចំពោះរោគសញ្ញាវិញ ជាធម្មតាមនុស្សមានអារម្មណ៍ឈឺក្នុងរយៈពេល ៣០ នាទី ទៅ៥ម៉ោង បន្ទាប់ពីញ៉ាំអាហារដែលមានមេរោគ។ រោគសញ្ញាសំខាន់ៗគឺចង្អោរ និងក្អួតម្តងហើយម្តងទៀត ជួនកាលអមដោយការឈឺពោះ ដែលមនុស្សភាគច្រើនមានអារម្មណ៍ធូរស្រាលក្នុងរយៈពេល ២៤ ម៉ោង។ ក្នុងករណីធ្ងន់ធ្ងរ វាអាចរួមបញ្ចូលការខ្សោយថ្លើមស្រួចស្រាវ។

ដោយឡែក នៅពេលដែលសារធាតុពុល សេរូលៃដ៍ ស្ថិតនៅក្នុងអាហារ ការចម្អិនធម្មតាឬការកំដៅឡើងវិញ មិនអាចលុបបំបាត់វាចោលទាំងស្រុងបានទេ ដោយសារតែជាតិពុលនេះមានភាពធន់នឹងកម្ដៅ មានន័យថា វាអាចរស់រានមានជីវិតពីសីតុណ្ហភាពដែលជាធម្មតាសម្លាប់បាក់តេរី។

ដូច្នេះហើយ ម្សៅទឹកដោះគោទារកច្រើនតែរួមបញ្ចូលប្រេងដែលមានផ្ទុកអាស៊ីត arachidonic (ARA) ដើម្បីធ្វើឲ្យវាស្រដៀងនឹងទឹកដោះម្តាយ។ បាក់តេរី បាស៊ីលុស សេរៀស អាចរស់រានមានជីវិតនៅក្នុងគ្រឿងផ្សំស្ងួតដែលប្រើសម្រាប់ម្សៅទឹកដោះគោទារក ហើយក្រោមលក្ខខណ្ឌជាក់លាក់ក្នុងអំឡុងពេលកែវច្នៃ ឬដំណើរការគ្រឿងផ្សំ អាចលូតលាស់ និងផលិតសេរូលៃដ៍ ។ ដោយសារតែជាតិពុលមានស្ថេរភាពកម្ដៅ ការកម្ដៅឡើងវិញនឹងមិនបំផ្លាញវាទេ តែអនុញ្ញាតឲ្យវានៅតែស្ថិតក្នុងរូបមន្តដដែល។

មិនតែប៉ុណ្ណោះ អាហារផ្សេងទៀតក៏អាចប្រឈមនឹងហានិភ័យផងដែរ ប្រសិនបើវាត្រជាក់ ឬត្រូវបានរក្សាកំដៅមិនត្រឹមត្រូវ នោះវាអាចលូតលាស់ និងផលិតសេរូលៃដ៍បានដោយងាយស្រួលបំផុត។ ជាកស្ដែង សូម្បីតែ បាយ ឬប៉ាស្តាមានជាតិម្សៅដែលទុកនៅលើចង្ក្រានក្តៅ ឬអាហារប៊ូហ្វេ គឺជាចំណុចហានិភ័យទូទៅដែលមនុស្សជាច្រើនតែងមើលរំលង។

គួរបញ្ចាក់ដែរថា នៅក្នុងប្រទេសកម្ពុជា អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា «ក.ប.ប. នៃក្រសួងពាណិជ្ជកម្ម បានប្រកាសប្រមូលផលិតផលទឹកដោះគោម្សៅម៉ាក Babybio Optima 1 ដែលកំពុងចែកចាយនៅលើទីផ្សារមកវិញ ដោយសង្ស័យថា អាចមានវត្តមាន TOXIN ឈ្មោះ Cereulide នៅក្នុងផលិតផលនេះ ក្នុងគោលបំណងធានាសុវត្ថិភាពសុខភាពទារក និងកុមារ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

វៀតណាមត្រួតពិនិត្យម្សៅទឹកដោះគោ Aptamil ទូទាំងប្រទេស ដោយបារម្ភពីការ​ផ្ទុកសារធាតុគ្រោះថ្នាក់ដល់ទារក