ព័ត៌មានអន្ដរជាតិ

កូនសិស្សឥណ្ឌា ២០នាក់ ពុលអាហារដែលផ្តល់ក្រោមជំនួយរដ្ឋាភិបាល

បានផុស

៥ ខែ មុន

នៅ

ថ្ងៃសៅរ៍ ៣១ មករា ២០២៦

ដោយ

សិស្សជាង ២០នាក់ បានធ្លាក់ខ្លួនឈឺ នៅរដ្ឋ Telangana ភាគខាងត្បូងប្រទេសឥណ្ឌា បន្ទាប់ពីទទួលទានអាហារថ្ងៃត្រង់នៅសាលា ក្រោមកម្មវិធីអាហារថ្ងៃត្រង់ដោយឥតគិតថ្លៃរបស់រដ្ឋាភិបាលឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Telangana Today ឱ្យដឹងថា សិស្សទាំងនោះត្រូវបានបញ្ជូនទៅមន្ទីរពេទ្យ កាលពីថ្ងៃព្រហស្បតិ៍ បន្ទាប់ពីចេញរោគសញ្ញានានា ដែលសង្ស័យថាពុលអាហារ។ ពួកគេមានអាការៈ ឈឺពោះ ក្អួត និងចង្អោរ។

ហេតុការណ៍នេះ បានកើតឡើងនៅសាលាបឋមសិក្សា Mandal Parishad ក្នុងភូមិ Venkatapur ក្នុងសង្កាត់ Sangareddy ចំណែកបុគ្គលិកត្រូវបានចោទប្រកាន់ថា៖ «កម្តៅអាហារដែលនៅសល់ យកមកធ្វើជាអាហារថ្ងៃត្រង់»។

គួរឱ្យដឹងថាមានកុមារចំនួន ៤២នាក់ បានបរិភោគអាហារ និង ២២នាក់ បានធ្លាក់ខ្លួនឈឺ និងយកទៅព្យាបាលនៅមន្ទីរពេទ្យរដ្ឋ Narayankhed ។

មន្ត្រីប៉ូលិស តំបន់ Narayanked បានដកស្រង់សម្តីដោយទូរទស្សន៍ក្នុងស្រុក NDTV ថា៖ « សិស្សចំនួន ២២ នាក់ ត្រូវបានបញ្ជូនទៅមន្ទីរពេទ្យបន្ទាប់ពីទទួលទានសាំបា (sambar) និងបាយនៅរសៀលនេះ។ ពួកគេមានរោគសញ្ញាដូចជាឈឺក្រពះ ហើយត្រូវបានបញ្ជូនទៅកាន់មន្ទីរពេទ្យភ្លាមៗ ដើម្បីព្យាបាល»។

អាជ្ញាធរបានបើកការស៊ើបអង្កេត ហើយបុគ្គលិកដែលពាក់ព័ន្ធនឹងការរៀបចំអាហារថ្ងៃត្រង់នៅសាលា ត្រូវបានដកតំណែង។

ចំណែក មន្ត្រីអប់រំស្រុកបានចេញសេចក្តីជូនដំណឹង ដល់នាយកសាលា ជុំវិញការខ្វះផ្នែកត្រួតពិនិត្យលើការរៀបចំអាហារថ្ងៃត្រង់។

គួរបញ្ជាក់ថា នេះជាករណីចុងក្រោយនៃឆ្លងមេរោគពីអាហារ ដែលបម្រើក្រោមគម្រោងអាហារពាក់កណ្តាលរបស់រដ្ឋាភិបាលឥណ្ឌា ជាកម្មវិធីអាហារឥតគិតថ្លៃធំជាងគេមួយនៅក្នុងសាលា នៅលើពិភពលោក។

មិនតែប៉ុណ្ណោះ គម្រោងផ្តល់អាហារថ្ងៃត្រង់ដោយឥតគិតថ្លៃ ដល់កុមារនៅក្នុងសាលារដ្ឋ គឺបង្កើនកម្រិតអាហារូបត្ថម្ភ ការចុះឈ្មោះចូលរៀនរបស់សិស្ស និងកាត់បន្ថយអត្រាបោះបង់ការសិក្សា។

កម្មវិធីនេះផ្តល់អាហារឆ្អិនដល់កុមារចំនួន ១២០លាននាក់ នៅក្នុងសាលារៀនជាងមួយលានខ្នង នៅទូទាំងប្រទេស៕

ប្រែសម្រួល៖ ណឺ មិនា