រុស្ស៊ី បាញ់មីស៊ីលបាលិស្ទិកច្រើន​បំផុតមិនធ្លាប់មានទៅលើអ៊ុយក្រែនក្នុងរយៈពេល១ខែ

កងកម្លាំងរុស្ស៊ីបានបាញ់បង្ហោះមីស៊ីលបាលិស្ទិក ក្នុងចំនួនកំណត់ត្រាគឺ ៩១គ្រាប់ ទៅលើប្រទេសអ៊ុយក្រែនពេញមួយខែមករាឆ្នាំ២០២៦ ដែលជា​តួ​លេខ​ខ្ពស់បំផុតប្រចាំខែចាប់តាំងពីជម្លោះបានផ្ទុះឡើង។ នេះ​បើ​​តាម​ការ​ចេញ​ផ្សាយ​របស់ AFP។

យោងតាមអ្នកវិភាគយោធាអ៊ុយក្រែន លោក Alexander Kovalenko ចំនួននេះបានកើនលើសកម្រិតកំពូលពីមុនគឺ ៨៩គ្រាប់ ដែលបានកត់ត្រាកាលពីខែតុលាឆ្នាំ២០២៥។ ការកើនឡើងនេះ បញ្ជាក់ពីការផ្លាស់ប្តូរយុទ្ធសាស្ត្ររបស់ទីក្រុងមូស្គូ ដោយមីស៊ីលបាលិស្ទិក ជាពិសេសប្រភេទ Iskander-M និងមីស៊ីលការពារអាកាស S-300 ដែលត្រូវបានកែច្នៃ បាននិងកំពុងចូលមកជំនួសមីស៊ីលគ្រូស ដែលមានល្បឿនយឺតដូចជាប្រភេទ Kh-101 និង Kalibr ដោយសារវាលឿន និងពិបាកក្នុងការស្ទាក់ចាប់។

ប្រព័ន្ធការពារអាកាសរបស់អ៊ុយក្រែន បានប្រឈមមុខនឹងសម្ពាធយ៉ាងខ្លាំងក្នុងអំឡុងពេលនៃការវាយប្រហារពេញមួយខែនេះ ដោយអត្រានៃការស្ទាក់ចាប់មានការប្រែប្រួលយ៉ាងខ្លាំង។ ក្នុងសប្តាហ៍ដំបូងនៃខែមករា មានមីស៊ីលបាលិស្ទិកតែមួយគ្រាប់ប៉ុណ្ណោះក្នុងចំណោម ១៨គ្រាប់ ត្រូវបានបាញ់ទម្លាក់ដោយជោគជ័យ។ ទោះបីជាសមត្ថភាពការពារមានភាពប្រសើរឡើងនៅសប្តាហ៍បន្តបន្ទាប់ ដោយបានបាញ់ទម្លាក់ ១៤គ្រាប់ ក្នុងចំណោម ២៣គ្រាប់ក្នុងសប្តាហ៍ទីបីក៏ដោយ ក៏មន្ត្រីបានរាយការណ៍ថា អង្គភាពការពារចល័ត និងប្រព័ន្ធទំនើបៗដូចជា Patriot កំពុងត្រូវបានប្រើប្រាស់ដល់កម្រិតកំណត់របស់ពួកគេហើយ។ អ្នកជំនាញបានកត់សម្គាល់ថា បច្ចុប្បន្នមីស៊ីលបាលិស្ទិកត្រូវបានប្រើប្រាស់ញឹកញាប់ជាងមីស៊ីលគ្រូសដល់ទៅ ២,៥ដង ដែលជាបញ្ហាប្រឈមដ៏ធំបំផុតសម្រាប់ខែលការពារអាកាស​របស់ទីក្រុង​កៀវ​ក្នុងឆ្នាំ​២០២៦។

ភាពខ្លាំងក្លានៃការវាយប្រហារនេះ បាននាំ​ឲ្យ​មានការខ្វះខាតគ្រាប់រំសេវយ៉ាងធ្ងន់ធ្ងរសម្រាប់ប្រព័ន្ធស្ទាក់ចាប់ទំនើបរបស់អ៊ុយក្រែន ដូចជា គ្រាប់ PAC-3 MSE ដែលប្រើប្រាស់ដោយប្រព័ន្ធ Patriot ជាដើម។ ទោះបីជាទទួលបានជំនួយពីលោកខាងលិច រួមមានប្រព័ន្ធ IRIS-T និង NASAMS ក៏ដោយ ក៏អង្គភាពការពារអាកាសជាច្រើនបានក្លាយជាគោលដៅនៃការវាយប្រហារ​​​យ៉ាង​សង្គ្រុប​របស់រុស្ស៊ី។ ក្រុមអ្នកវិភាគបានព្រមានថា យុទ្ធសាស្ត្ររបស់រុស្ស៊ីក្នុងការប្រើប្រាស់ «មីស៊ីលខ្មោចឆៅ (S-300 ចាស់ៗដែលយកមកប្រើសម្រាប់ការវាយប្រហារលើដី)» រួមជាមួយមីស៊ីល Iskander ទំនើបៗ គឺមានបំណងធ្វើ​ឲ្យ​ប្រព័ន្ធរ៉ាដារបស់អ៊ុយក្រែនដំណើរការមិនទាន់ និងបំផ្លាញស្តុកគ្រាប់មីស៊ីលស្ទាក់ចាប់ដែលមានតម្លៃថ្លៃរបស់អ៊ុយក្រែន៕

ប្រែសម្រួល៖ ឈាង