កុមារកាន់តែច្រើនបានឆ្លងកូវីដ នេះជារោគសញ្ញាដែលត្រូវប្រយ័ត្នចំពោះក្មេង

យោងតាមទិន្នន័យនាពេលកន្លងមក កុមារមិនត្រូវបានរាប់បញ្ចូលទៅក្នុងក្រុមប្រឈមហានិភ័យខ្ពស់បណ្ដាលមកពីវីរុសកូវីដ-១៩ទេ។ គេឃើញករណីឆ្លងរោគលើក្មេងៗមានចំនួនតិចតួច ​ទើបឪពុកម្ដាយមិនសូវជាបាម្ភចំពោះកូនៗប៉ុន្មានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណា ក្នុងពេលថ្មីៗនេះ តួលេខអ្នកជំងឺកូវីដក្នុងចំណោមក្មេងតូច នៅក្នុងប្រទេសឥណ្ឌាមានការកើនឡើង ជាហេតុគួរយកចិត្តទុកដាក់ខ្ពស់ចំពោះកូនតូច។ ក្នុងនោះកុមារកម្ពុជាក៏ត្រូវបានតេស្តវិជ្ជមានកូវីដជាច្រើននាក់ផងដែរ។

ថ្វីត្បិតមិនទាន់មានទិន្នន័យច្បាស់លាស់ដែលបង្ហាញចំនួនកុមារកាន់តែច្រើនកំពុងឆ្លងវីរុសកូវីដ-១៩នៅទូទាំងពិភពលោកក៏ដោយ តែគ្រូពេទ្យជំនាញនិយាយថា ករណីថ្មីចំពោះក្មេងបានកើនឡើងតួលេខខ្ពស់ជាងមុន ហើយ ៩៥% នៃអ្នកជំងឺវ័យក្មេងទំនងជាមានរោគសញ្ញាស្រាល​ពិបាកកំណត់ថាមានផ្ទុកវីរុស។

ស្របពេលគ្នាដែរ គ្រូពេទ្យកុមារ ៣ នាក់ក្នុងចំណោម ៤ នាក់ផ្ដល់បទសម្ភាសន៍ជាមួយសារព័ត៌មាន ET Now របស់អង់គ្លេសប្រចាំនៅឥណ្ឌាថា បច្ចុប្បន្នពួកគេរកឃើញកុមារជាច្រើននាក់មានជំងឺ Cov-19 បើប្រៀបធៀបទៅនឹងឆ្នាំមុន។

ដោយឡែក ក្រុមប្រឹក្សាស្រាវជ្រាវវេជ្ជសាស្រ្តឥណ្ឌាឬ ICMR និយាយថា ទោះមិនមានភ័ស្តុតាងណាមួយដែលបង្ហាញថា យុវជនឬក្មេងមានហានិភ័យខ្ពស់ក៏ដោយ តែត្រូវប្រយ័ត្នចំពោះពួកគេសម្រាប់តាមដានរោគសញ្ញានៃជំងឺ ដើម្បីជួយសង្រ្គោះទាន់ពេលវេលា។

វេជ្ជបណ្ឌិត Anupam Sibal នៃមន្ទីរពេទ្យ Apollo មានប្រសាសន៍ថា ក្មេងៗឆ្លងកូវីដ-១៩អាចបង្ហាញអា​ការដូចជា រាគ ក្អក ផ្ដាសាយ និងគ្រុនក្តៅ។

បន្ថែមពីលើនោះ វេជ្ជបណ្ឌិត Tushar Maniar នៃមន្ទីរពេទ្យ Nanavati ប្រទេសឥណ្ឌា និយាយថា ក្មេងអាយុក្រោម ១០ ឆ្នាំនឹងបង្ហាញរោគសញ្ញាកូវីដដូចខាងលើ។ រីឯក្មេងអាយុលើស ១០ ឆ្នាំជាធម្មតាបង្ហាញសញ្ញា គ្រុនក្តៅរយៈពេល ២ ទៅ ៣ ថ្ងៃ ។

ក្រៅពីនោះ ក្នុងចំណោមរោគសញ្ញាដែលគ្រូពេទ្យដាក់ចេញផ្សេងទៀតរួមមាន៖ កម្ដៅលើសពី ៣៩ អង្សារ ដកដង្ហើមញាប់ នោមតិចជាង ៦ ដងក្នុងមួយថ្ងៃ ញ៉ាំអាហារតិច កន្ទួល ក្អកញឹក ឆាប់ខឹង និងឈឺក្បាល។

វេជ្ជបណ្ឌិតក៏ជំរុញឱ្យកុមារធ្វើតេស្តភ្លាមៗ ប្រសិនបើសមាជិកគ្រួសារមានផ្ទុកកូវីដ-១៩ ក្នុងនោះកុំរង់ចាំរហូតទាល់តែមានរោគសញ្ញាលេចឡើង​ទើបធ្វើតេស្ត ព្រោះថាកុមារ ៩៨% អាចវិជ្ជមានកូវីដរួចទៅហើយក្រោយ ៣៦ ម៉ោងបន្ទាប់សមាជិកក្នុងផ្ទះ ដោយពួកគេបង្ហាញតែអាការ គ្រុនក្តៅកម្រិតស្រាល និងហៀរសំបោរប៉ុណ្ណោះ៕

ប្រែសម្រួល៖ សន្យា

ប្រភព៖ timesnownews

ចុចអាន៖ ការសិក្សាមួយរកឃើញថា​អ្នកមាន​វីរុសកូវីដមិនអាច​ចម្លងទៅអ្នកផ្សេង​ក្រោយ​ឆ្លង​១១ថ្ងៃ

ចុចអាន៖ ប្រយ័ត្ន!​ ក្មេងៗអាយុ៨ខែដល់១៤ឆ្នាំ ងាយឆ្លងវីរុសបំប្លែងខ្លួនបំផុត