អាមេរិក បាញ់ទម្លាក់ដ្រូន អ៊ីរ៉ង់ ដែលហោះសំដៅមក នាវាផ្ទុកយន្តហោះ ក្នុងសមុទ្រអារ៉ាប់

ស្ថានការណ៍តានតឹងរឹតខ្លាំងហើយ ខណៈអាមេរិក បានបាញ់ទម្លាក់ដ្រូនអ៊ីរ៉ង់ ដែលហោះសំដៅមកនាវាផ្ទុកយន្តហោះរបស់ខ្លូននៅក្នុងសមុទ្រអារ៉ាប់។

តាមការផ្សាយរបស់ Reuters, រឿងនេះកើតឡើងនៅថ្ងៃអង្គារទី៣ខែកុម្ភៈឆ្នាំ២០២៦ ដោយយន្តហោះចម្បាំង F-35C បានបាញ់ទម្លាក់ដ្រូន Shahed-139 ដែលកំពុងហោះទៅជិត នាវាផ្ទុកយន្តហោះ USS Abraham Lincoln ជាមួយបំណងមិនល្អ។

ព័ត៌មាននេះត្រូវបានបញ្ជាក់ដោយអ្នកនាំពាក្យបញ្ជាការដ្ឋានកណ្តាលនៃកងទ័ពសហរដ្ឋអាមេរិក (CENTCOM) វរសេនីយ៍ឯក Tim Hawkins ប៉ុន្តែលោកអះអាងថា គ្មានជនជាតិអាមេរិកណាម្នាក់ រងគ្រោះថ្នាក់ទេ។

ហេតុការណ៍ចុងក្រោយបំផុតនេះ បានរុញសភាពការណ៍ឲ្យកាន់តែក្តៅ ស្របពេលអាមេរិកបញ្ជូនកងនាវាទៅកាន់តំបន់មជ្ឈិមបូព៌ា ក្នុងគោលបំណងដាក់សម្ពាធអ៊ីរ៉ង់និងកម្លាបើកការវាយប្រហារឆាប់ៗ។

យ៉ាងណា ក៏មានសញ្ញាល្អខ្លះដែរ ខណៈសារព័ត៌មាន NHK រាយការណ៍ថា កិច្ចចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់ គ្រោងធ្វើឡើងនៅចុងសប្តាហ៍នេះ ក្នុងប្រទេសតួកគី។

តាមប្រភពដដែល លោក Steve Witkoff បេសកជនពិសេសអាមេរិក ជាមួយលោក Jared Kushner និងរដ្ឋមន្ត្រីការបរទេសអ៊ីរ៉ង់ Abbas Araghchi នឹងជួបគ្នានៅទីក្រុងអ៊ីស្តង់ប៊ុល ក្នុងកិច្ចខិតខំប្រឹងប្រែងដើម្បីស្តារការទូតឡើងវិញលើជម្លោះដ៏យូរអង្វែងអំពីកម្មវិធីនុយក្លេអ៊ែរអ៊ីរ៉ង់។

ប្រសិនបើកើតឡើងមែន វានឹងក្លាយជាកិច្ចប្រជុំលើកដំបូង រវាងភាគីទាំងពីរ ចាប់តាំងពីការចរចាលើកមុនត្រូវរលាយ និងជាលើកដំបូងចាប់តាំងពីការវាយប្រហារយោធាកាលពីខែមិថុនាឆ្នាំមុន៕

អត្ថបទ៖ សុខ សុវណ្ណ