អ៊ុយក្រែន នឹងបើកមជ្ឈមណ្ឌលនាំចេញអាវុធចំនួន ១០ នៅ អឺរ៉ុប

លោកប្រធានាធិបតី វ៉ូឡូឌីមៀរ ហ្សេលេនស្គី បានប្រកាសកាលពីថ្ងៃទី ៨ ខែកុម្ភៈថា អ៊ុយក្រែននឹងបើកមជ្ឈមណ្ឌលនាំចេញអាវុធចំនួន ១០ នៅអឺរ៉ុប រួមទាំងនៅក្នុងប្រទេសបាល់ទិក និងបណ្តាប្រទេសនៅអឺរ៉ុបខាងជើង នាឆ្នាំ ២០២៦ ស្របពេលដែលលោកក៏ប្រកាសពីការផលិតយន្តហោះគ្មានមនុស្សបើករបស់អ៊ុយក្រែន នៅអាល្លឺម៉ង់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទៅភ្នាក់ងារ kyivindependent ប្រមុខរដ្ឋាភិបាលទីក្រុងកៀវបានសរសេរនៅលើ Telegram ថា «នៅពាក់កណ្តាលខែកុម្ភៈ យើងនឹងឃើញការផលិតយន្តហោះគ្មានមនុស្សបើករបស់យើងនៅប្រទេសអាល្លឺម៉ង់។ ខ្ញុំនឹងទទួលបានយន្តហោះគ្មានមនុស្សបើកដំបូងគេបង្អស់។ នេះគឺជាខ្សែសង្វាក់ផលិតកម្មដែលដំណើរការពេញលេញ។ នៅចក្រភពអង់គ្លេស ខ្សែសង្វាក់ផលិតកម្មស្រដៀងគ្នានេះកំពុងដំណើរការរួចហើយ។ ទាំងនេះគឺជាបច្ចេកវិទ្យាអ៊ុយក្រែនទាំងអស់»។

លោក ហ្សេលេនស្គី បានបញ្ចាក់នៅក្នុងសេចក្តីប្រកាសដដែលនោះថា សព្វថ្ងៃនេះ សន្តិសុខរបស់អឺរ៉ុបត្រូវបានបង្កើតឡើងដោយផ្អែកលើបច្ចេកវិទ្យា និងយន្តហោះគ្មានមនុស្សបើក។ ​​មានគម្រោងផ្សេងៗគ្នាជាច្រើន ទាំងអស់នេះនឹងផ្អែកលើបច្ចេកវិទ្យាអ៊ុយក្រែន និងអ្នកឯកទេសអ៊ុយក្រែនជាចម្បង។

ការផ្លាស់ប្តូរទៅនាំចេញបច្ចេកវិទ្យាការពារជាតិ និងបើកខ្សែផលិតកម្មទៅក្រៅប្រទេស គឺជាផ្នែកមួយនៃកិច្ចខិតខំប្រឹងប្រែងដ៏ធំមួយ ដើម្បីធ្វើអន្តរជាតូបនីយកម្មឧស្សាហកម្មអាវុធរបស់ទីក្រុងកៀវ។ ការសម្រេចចិត្តនេះដែរ កើតចេញពីភាពផ្ទុយគ្នាខាងសេដ្ឋកិច្ចសម័យសង្គ្រាម សមត្ថភាពផលិតយន្តហោះគ្មានមនុស្សបើករបស់អ៊ុយក្រែនឥឡូវនេះ គឺហួសពីសមត្ថភាពហិរញ្ញវត្ថុរបស់រដ្ឋាភិបាលក្នុងការទិញ។

ការប្រកាសចុងក្រោយនេះទៀតសោត កើតឡើងបន្ទាប់ពីការណែនាំរបស់លោក ហ្សេលេនស្គី កាលពីខែតុលា សម្រាប់ក្រសួងការពារជាតិ ដើម្បីចាប់ផ្តើមការនាំចេញអាវុធអ៊ុយក្រែនដែលគ្រប់គ្រងទៅក្រៅប្រទេស ដោយចាប់ផ្តើមនៅខែវិច្ឆិកា ឆ្នាំ២០២៥។ ក្រោមប្រព័ន្ធដែលបានស្នើឡើង អ៊ុយក្រែនត្រូវបានអនុញ្ញាតឲ្យនាំចេញឧបករណ៍យោធាដែលមានសមត្ថភាពផលិតលើស ដើម្បីរកប្រាក់ចំណូលបរទេស ហើយបន្ទាប់មកប្រើប្រាស់ប្រាក់ចំណេញនេះ ដើម្បីវិនិយោគឡើងវិញលើអាវុធសំខាន់ៗផ្សេងទៀត ដែលយោធាខ្វះខាត៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកហ្សេលេនស្គី ចោទ រុស្ស៊ី វាយប្រហារលើហេដ្ឋារចនាសម្ព័ន្ធថាមពលដ៏សំខាន់អ៊ុយក្រែន