ព័ត៌មានអន្ដរជាតិ

លោក ស៊ី បង្ហាញចំណាប់អារម្មណ៍ដ៏កម្រ ក្រោយបោសសម្អាតពុករលួយក្នុងជួរទ័ព

បានផុស

២ ខែ មុន

នៅ

ថ្ងៃព្រហស្បតិ៍ ១២ កុម្ភៈ ២០២៦

ដោយ

ប្រធានាធិបតីចិន លោក ស៊ី ជីនពីង សាទរចំពោះការប្រយុទ្ធប្រឆាំងនឹងអំពើពុករលួយរបស់យោធា និងជាការទទួលស្គាល់យ៉ាងកម្រក្នុងមួយសប្តាហ៍ បន្ទាប់ពីទីក្រុងប៉េកាំងបានបង្កើនការបោសសំអាតដ៏ធំ និងធ្វើការស៊ើបអង្កេតលើឧត្តមសេនីយកំពូលរបស់ខ្លួន។ នេះបើតាមប្រព័ន្ធផ្សព្វផ្សាយរដ្ឋរាយការណ៍កាលពីថ្ងៃពុធ ថ្ងៃទី១១ ខែកុម្ភៈ។

ក្រសួងការពារជាតិរបស់ទីក្រុងប៉េកាំងបាននិយាយកាលពីខែមុនថា ខ្លួនកំពុងស៊ើបអង្កេត អនុប្រធានគណៈកម្មការយោធាកណ្តាលដ៏មានឥទ្ធិពល (CMC) លោក Zhang Youxia និងប្រធាននាយកដ្ឋានបុគ្គលិករួមរបស់ CMC លោក Liu Zhenli ដែលគ្រប់គ្រងលើផែនការប្រយុទ្ធ។

អ្នកទាំងពីរគឺជាមនុស្សចុងក្រោយបង្អស់ដែលជាប់ឈ្មោះក្រោមការលុបបំបាត់អំពើពុករលួយនៅគ្រប់កម្រិតនៃបក្សកុម្មុយនីស្តចិន និងក្នុងរដ្ឋចាប់តាំងពី លោក ស៊ី ជីនពីង ឡើងកាន់អំណាចជាងមួយទសវត្សរ៍មុន។

ថ្លែងទៅកាន់ក្រុមទាហានកាលពីថ្ងៃអង្គារ លោក ស៊ី បាននិយាយថា៖ «យោធាទាំងអស់ត្រូវតែប្រឆាំងដាច់ខាតនឹងអំពើពុករលួយ ជាមួយការពង្រឹងភាពស្មោះត្រង់ផ្ទាល់ខ្លួន និងក្នុងគណបក្ស»។

លោក ស៊ី បានបន្តថា៖ « កងទ័ពរំដោះប្រជាជនដែលជឿនលឿនគឺត្រូវការកែតម្រូវនយោបាយស៊ីជម្រៅ ហើយឆ្លើយតបប្រកបដោយប្រសិទ្ធភាពចំពោះហានិភ័យ និងបញ្ហាប្រឈមនានា»។ នេះបើយោងតាមការផ្សាយរបស់ទូរទស្សន៍រដ្ឋ CCTV ។

លោក ស៊ី បាននិយាយនៅក្នុងសុន្ទរកថារបស់ខ្លួនឆ្នាំមុនថា៖ «មានភាពមិនធម្មតាច្រើន ប៉ុន្តែកងទ័ពបានបង្ហាញឱ្យឃើញទាំងស្រុងនូវភាពជឿជាក់ និងគួរឱ្យទុកចិត្ត»។

ប្រែសម្រួល៖ ណឺ មិនា