រុស្ស៊ី សន្យាថា មិនវាយឆ្មក់អ៊ុយក្រែន នៅថ្ងៃបោះឆ្នោតទេ

រុស្ស៊ីត្រៀមខ្លួនរួចជាស្រេចដើម្បីធានាថា នឹងមិនមានការវាយប្រហារតាមអាកាសក្នុងថ្ងៃបោះឆ្នោតនៅអ៊ុយក្រែនទេ ប្រសិនបើទីក្រុងកៀវសម្រេចចិត្តធ្វើការបោះឆ្នោត នេះបើយោងតាមអនុរដ្ឋមន្ត្រីការបរទេសរុស្ស៊ី លោក Mikhail Galuzin បាននិយាយនៅក្នុងបទសម្ភាសន៍ជាមួយទីភ្នាក់ងារ TASS កាលពីថ្ងៃទី១៥ ខែកុម្ភៈ ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីរុស្ស៊ី  វ្ល៉ាឌីមៀរ ពូទីន បានបង្ហាញថា ទីក្រុងមូស្គូត្រៀមខ្លួនរួចជាស្រេចដើម្បីពិចារណាបញ្ឈប់ការវាយប្រហារតាមអាកាសចូលទៅក្នុងប្រទេសអ៊ុយក្រែននៅថ្ងៃបោះឆ្នោត ប្រសិនបើការបោះឆ្នោតត្រូវបានធ្វើឡើងនៅទីនោះ។ លោកក៏បានកត់សម្គាល់ផងដែរថា ប្រជាជនអ៊ុយក្រែន ៥-ទៅ១០ លាននាក់ដែលរស់នៅក្នុងប្រទេសរុស្ស៊ី គួរតែមានសិទ្ធិបោះឆ្នោតដូចគ្នាដែរ។

លោក Mikhail Galuzin អនុរដ្ឋមន្ត្រីការបរទេសរុស្ស៊ីបាននិយាយថា ជាការពិតណាស់ សេចក្តីថ្លែងការណ៍របស់ប្រធានាធិបតីរុស្ស៊ីនៅតែមានសុពលភាព។ ប៉ុន្តែ ដូចដែលខ្ញុំបានកត់សម្គាល់ពីមុនមក មិនទាន់មានការពិភាក្សាអំពីការរៀបចំការបោះឆ្នោតជាក់ស្តែង នៅអ៊ុយក្រែននូវឡើយទេ។

អនុរដ្ឋមន្ត្រីការបរទេសបានរំលឹកឡើងវិញនូវការវាយប្រហារដោយយន្តហោះគ្មានមនុស្សបើករបស់អ៊ុយក្រែនលើទឹកដីរុស្ស៊ី ក្នុងអំឡុងពេលយុទ្ធនាការបោះឆ្នោត។ លោកមានប្រសាសន៍ថា «ខ្ញុំចង់ទាញចំណាប់អារម្មណ៍ទៅលើបទពិសោធន៍មួយកាលពីខែមីនា ឆ្នាំ២០២៤ ការបោះឆ្នោតប្រធានាធិបតីត្រូវបានធ្វើឡើងនៅក្នុងប្រទេសរុស្ស៊ី ហើយការិយាល័យបោះឆ្នោតនៅតែបើកនៅក្នុងតំបន់ជិតខ្សែត្រៀមជួរមុខ ទោះបីជាប្រតិបត្តិការយោធាកំពុងបន្តក៏ដោយ។ទីក្រុងកៀវបានព្យាយាមគ្រប់មធ្យោបាយដែលអាចធ្វើទៅបាន ដើម្បីរំខានដល់ដំណើរការបោះឆ្នោតនៅក្នុងតំបន់ជួរមុខ ដោយមិនគេចវេះពីការប្រើប្រាស់មធ្យោបាយភេរវកម្ម និងការបំផ្លិចបំផ្លាញឡើយ។ ទោះជាយ៉ាងណា វាបានបង្ហាញថា មិនអាចសម្រេចបាននូវគោលដៅរបស់ខ្លួនទេ» ។

លោកបានសង្កត់ធ្ងន់ថា ប្រទេសរុស្ស៊ី នឹងមិនចុះចូលនឹងការអនុវត្តរបស់ទីក្រុងកៀវទេ ហើយនឹងអនុញ្ញាតឲ្យប្រជាជនអ៊ុយក្រែនអនុវត្តសិទ្ធិបោះឆ្នោតរបស់ពួកគេដែលមានចែងក្នុងរដ្ឋធម្មនុញ្ញយ៉ាងពេញលេញ និងកំណត់ដោយឯករាជ្យនូវការអភិវឌ្ឍនាពេលអនាគតរបស់ប្រទេសរបស់ពួកគេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

​អាមេរិកជំរុញ​ឱ្យ​អ៊ុយ​ក្រែន រៀប​ចំ​ការ​បោះ​ឆ្នោត​ជាតិ​លឿនបំផុត តាម​ដែល​អាច​ធ្វើ​បាន​