ព័ត៌មានអន្ដរជាតិ

អាមេរិកបញ្ជូនយោធា១០០នាក់ ទៅកាន់អាហ្វ្រិក ដើម្បីបណ្តុះបណ្តាលកម្ចាត់ក្រុមភេរវករ

បានផុស

៥ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

សហរដ្ឋអាមេរិកបានបញ្ជូនកងកម្លាំងយោធាចំនួន ១០០នាក់ ទៅកាន់ភាគខាងជើងប្រទេសនីហ្សេរីយ៉ា ដើម្បីបណ្តុះបណ្តាល និងផ្តល់យោបល់ដល់កងកម្លាំងក្នុងតំបន់ ខណៈមានការគំរាមកំហែងកើនឡើង ពីក្រុមប្រដាប់អាវុធដូចជា Boko Haram ដែលមានទំនាក់ទំនងនឹងក្រុម ISIS។ (ក្រុមទាំងនេះសំដៅលើ ពួកភេរវករ ប្រើអំពើហិង្សាលើប្រជាជននីហ្សេរីយ៉ា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Samaila Uba អ្នកនាំពាក្យក្រសួងការពារជាតិនីហ្សេរីយ៉ា បានឱ្យដឹងថា ទាហានអាមេរិកមកដល់ប្រទេសនីហ្សេរីយ៉ាក្នុងតំបន់ភាគឦសាននៃទីក្រុង Bauchi កាលពីថ្ងៃចន្ទ។

លោកបាននិយាយថា៖«ពួកគេ (ទាហាន) នឹងផ្តល់ការគាំទ្រផ្នែកបច្ចេកទេសនិងចែករំលែកភាពប៉ិនប្រសព្វ ដើម្បីជួយកំណត់គោលដៅ កម្ចាត់អង្គការភេរវករ»។

មិនតែប៉ុណ្ណោះ សហរដ្ឋអាមេរិកក៏បានបញ្ជូនឧបករណ៍ពាក់ព័ន្ធ ដើម្បីគាំទ្របេសកកម្មនេះផងដែរ។

លោក Uba បានសង្កត់ធ្ងន់ថា៖«ទាហានអាមេរិកនឹងមិនដើរតួនាទីប្រយុទ្ធដោយផ្ទាល់នោះទេ ប៉ុន្តែនឹងចែករំលែកជំនាញបច្ចេកទេស ដើម្បីឱ្យកងកម្លាំងនីហ្សេរីយ៉ាជាអ្នកគ្រប់គ្រងយ៉ាងពេញលេញ»។

អ្នកនាំពាក្យយោធារូបនេះបានបន្តថា៖ «កងកម្លាំងប្រដាប់អាវុធនៃប្រទេសនីហ្សេរីយ៉ា នៅតែប្តេជ្ញាចិត្តយ៉ាងពេញទំហឹងក្នុងការចូលរួមនិងកម្ចាត់អង្គការភេរវករ ដែលគំរាមកំហែងដល់អធិបតេយ្យភាពរបស់ប្រទេស សន្តិសុខជាតិ និងសុវត្ថិភាពរបស់ប្រជាពលរដ្ឋ»។

គួរឱ្យដឹងថា កាលពីចុងសប្តាហ៍មុន ខ្មាន់កាំភ្លើងជិះម៉ូតូបានវាយប្រហារតាមភូមិចំនួន ៣ នៅភាគខាងជើងប្រទេសនីហ្សេរីយ៉ា ដោយបានសម្លាប់មនុស្សយ៉ាងតិច ៤៦ នាក់ និងចាប់ពង្រត់មនុស្សជាច្រើននាក់ផ្សេងទៀត។

ការវាយប្រហារបង្ហូរឈាមច្រើនបំផុតបានកើតឡើង នៅក្នុងភូមិ Konkoso ក្នុងរដ្ឋ Niger ដែលមានមនុស្សយ៉ាងហោចណាស់ ៣៨ នាក់ ត្រូវបានបាញ់សម្លាប់ និងត្រូវកាត់បំពង់ក។

លើសពីនេះ ការដាក់ពង្រាយកងកម្លាំងសហរដ្ឋអាមេរិក ធ្វើឡើងបន្ទាប់ពីការបន្ធូរបន្ថយភាពតានតឹងរវាងទីក្រុងវ៉ាស៊ីនតោន និងនីហ្សេរីយ៉ាកាលពីចុងឆ្នាំមុន ពេលប្រធានាធិបតីអាមេរិក លោក ដូណាល់ ត្រាំ បានចោទប្រកាន់ប្រទេសនេះថា មិនបានបញ្ឈប់ការសម្លាប់ប្រឆាំងនឹងគ្រិស្តបរិស័ទ និងគំរាមកំហែងធ្វើអន្តរាគមន៍ផ្នែកយោធា។

យ៉ាងណា រដ្ឋាភិបាលនីហ្សេរីយ៉ាបានច្រានចោលការចោទប្រកាន់របស់ លោក ដូណាល់ ត្រាំ។ ចំណែកអ្នកវិភាគនិយាយថា មនុស្សគ្រប់សាសនា មិនមែនតែគ្រិស្តបរិស័ទទេ គឺជាជនរងគ្រោះនៃអំពើហិង្សារបស់ក្រុមប្រដាប់អាវុធទាំងអស់៕

ប្រែសម្រួល៖ ណឺ មិនា