បុគ្គលល្បីៗនៅអាមេរិករូបណាខ្លះ ជាប់ពាក់ព័ន្ធរឿងអាស្រូវផ្លូវភេទ របស់មហាសេដ្ឋី Epstein

ក្រសួងយុត្តិធម៌សហរដ្ឋអាមេរិកកាលពីថ្ងៃសៅរ៍បានទម្លាយបញ្ជីឈ្មោះតារាល្បីៗ អ្នកនយោបាយ និងមេដឹកនាំអាជីវកម្មចំនួន ៣០០ នាក់ ដែលបង្ហាញខ្លួននៅក្នុងឯកសារស្តីពីមហាសេដ្ឋី Jeffrey Epstein ល្បីល្បាញឈ្មោះ​ក្នុងករណីជួញដូរមនុស្ស និងឧក្រិដ្ឋកម្មផ្លូវភេទ រួមទាំងការជួញដូរផ្លូវភេទលើក្មេងៗ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីទីភ្នាក់ងារ CNN ក្នុងចំណោមឯកសារដែលបានដាក់ជូនសភា មានបញ្ជីឈ្មោះអ្នកនយោបាយ មេដឹកនាំអាជីវកម្ម និងឥស្សរជនសាធារណៈប្រហែល ៣០០ នាក់ដែលបានបង្ហាញខ្លួននៅក្នុងឯកសារ Epstein នៅក្នុងចំណោមពួកគេមានប្រធានាធិបតីអាមេរិក ដូណាល់ ត្រាំ, អតីតប្រធានាធិបតី បារ៉ាក់ អូបាម៉ា, អតីតស្ត្រីទីមួយ មីសែល អូបាម៉ា, អតីតប្រធានាធិបតី ប៊ីល គ្លីនតុន និងភរិយារបស់គាត់ ហ៊ីលឡារី គ្លីនតុន, មហាសេដ្ឋី ប៊ីល ហ្គេត, មហាសេដ្ឋី អេឡុន ម៉ាស ព្រមទាំង ព្រះអង្គម្ចាស់ហារី និងអ្នកផ្សេងទៀតជាច្រើន។

សូម្បីតែអតីតតារាសម្ដែងនិងច្រៀងនិងបុគ្គលល្បីៗមួយចំនួនទៀតដែលបានទទួលមរណភាពអស់រយៈពេលជាយូរ ក៏ត្រូវបានលើកឡើងផងដែរដូចជា តារាចម្រៀង Elvis Presley, ព្រះនាងឌីអាណា, តារាសម្ដែង Marilyn Monroe និងតារាប្រុស Kurt Cobain។

ក្រសួងយុត្តិធម៌សហរដ្ឋអាមេរិកបានបញ្ជាក់បន្ថែមទៀតថា បុគ្គលមួយចំនួនលេចឡើងតែរយៈពេលខ្លីនៅក្នុងឯកសារ ហើយបានបញ្ជាក់ជាថ្មីថា ការមានឈ្មោះនៅក្នុងឯកសារមិនមានន័យថា ពួកគេទាំងនោះបានប្រព្រឹត្តបទឧក្រិដ្ឋ ឬទំនាក់ទំនងជាមួយ Epstein នោះទេ។

យ៉ាងណាមិញ ឯកសាររបស់ Epstein បន្ទាប់ពីការចេញផ្សាយនៅលើប្រព័ន្ធផ្សព្វផ្សាយ បានបង្កឲ្យមានសន្ទុះនៃការលាលែងពីតំណែងពីមន្ត្រីជាច្រើនមានទំនាក់ទំនងជាមួយមហាសេដ្ឋីប្រព្រឹត្តអំពើរំលោភសេពសន្ថវៈលើកុមារ។ Epstein កើតនៅឆ្នាំ ១៩៥៣ ត្រូវបានចាប់ខ្លួននៅទីក្រុងញូវយ៉កក្នុងខែកក្កដា ឆ្នាំ ២០១៩ ពីបទល្បួងអនីតិជនរាប់សិបនាក់ ដោយប្រែក្លាយពួកគេទៅជាជនរងគ្រោះនៃការរំលោភបំពានផ្លូវភេទ។ អ្នកជំនួញរូបនេះប្រឈមមុខនឹងការជាប់ពន្ធនាគាររហូតដល់ ៤៥ ឆ្នាំ ប្រសិនបើត្រូវបានកាត់ទោស។ ក្រោយមក លោកបានបដិសេធរាល់ការចោទប្រកាន់ទាំងអស់ ហើយត្រូវបានឃុំខ្លួននៅក្នុងពន្ធនាគារ Manhattan ទីក្រុងញូវយ៉ក ខណៈពេលកំពុងរង់ចាំការកាត់ក្តី ជនសង្ស័យបានចងកសម្លាប់ខ្លួននៅក្នុងបន្ទប់ឃុំឃាំង កាលពីខែសីហា ឆ្នាំ ២០១៩៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កាណាដា និងអូស្ត្រាលី ជំរុញវិស័យការពារជាតិខ្លួនឯង ដោយលែងពឹងផ្អែកអាមេរិក