ព័ត៌មានអន្ដរជាតិ

កូរ៉េខាងត្បូងនិងរដ្ឋអាមេរិកប្រកាសធ្វើសមយុទ្ធយោធារួមគ្នា១០ថ្ងៃនៅខែក្រោយ

បានផុស

៥ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

មន្ត្រីយោធាអាមេរិកនិងកូរ៉េខាងត្បូងនិយាយកាលពីថ្ងៃពុធថា កូរ៉េខាងត្បូង និងសហរដ្ឋអាមេរិកនឹងធ្វើសមយុទ្ធយោធារួមគ្នាដ៏សំខាន់ដែលមានឈ្មោះថា «Freedom Shield» ចាប់ពីថ្ងៃទី៩ ដល់ថ្ងៃទី១៩ក្នុងខែមីនា។ នេះបើយោងតាមរ៉យទ័រ នៅថ្ងៃទី២៥ ខែកុម្ភៈ ឆ្នាំ២០២៦ ។

លោក Jang Do-young នាយកកិច្ចការសាធារណៈនៃអគ្គសេនាធិការចម្រុះយោធាកូរ៉េខាងត្បូង និង លោក Ryan Donald (ស្តាំ) នាយកកិច្ចការសាធារណៈនៃបញ្ជាការអង្គការសហប្រជាជាតិ (UNC)។ រូប៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីយោធានៃប្រទេសទាំងពីរនិយាយក្នុងសន្និសីទសារព័ត៌មានមួយថា សមយុទ្ធប្រចាំឆ្នាំនេះមានលក្ខណៈការពារគ្នាទៅវិញទៅមក ទោះយ៉ាងណា ការរៀបចំឡើងមិនរារាំងសមយុទ្ធពីក្លាយជាចំណុចប្រឈមមុខក្តៅគគុកញឹកញាប់ជាមួយកូរ៉េខាងជើងដែលលើកឡើងជាយូរមកហើយថា សមយុទ្ធជាការហាត់សមសម្រាប់«ឈ្លានពាន»។

យោធាកូរ៉េខាងត្បូងនិងអាមេរិក លើកឡើងថាសមយុទ្ធនេះ នឹងបម្រើជាឱកាសមួយដើម្បីគាំទ្រដល់ការរៀបចំ (ផ្នែកយោធា) ជាបន្តបន្ទាប់ សម្រាប់ការផ្ទេរការគ្រប់គ្រងប្រតិបត្តិការសម័យសង្គ្រាមរបស់សហរដ្ឋអាមេរិកទៅឱ្យកូរ៉េខាងត្បូង។

មិនតែប៉ុណ្ណោះ សមយុទ្ធកន្លងមកមានទាំងការហ្វឹកហ្វឺនពហុដែន និងប៉ុស្តិ៍បញ្ជាការ ដែលមានគោលបំណងគាំទ្រដល់ការត្រៀមខ្លួននេះ។

កូរ៉េខាងត្បូងមានគោលបំណងបញ្ចប់ការផ្ទេរបញ្ជាការយោធាពីសហរដ្ឋអាមេរិក មុនពេលអាណត្តិរបស់ប្រធានាធិបតី លី ជេ ម្យ៉ុង(Lee Jae Myung) បញ្ចប់នៅឆ្នាំ ២០៣០។

មន្ត្រីកូរ៉េខាងត្បូង និងសហរដ្ឋអាមេរិកនិយាយថា សមយុទ្ធដោយសម្ព័ន្ធមិត្តនៅខែក្រោយនឹងរួមបញ្ចូលសេណារីយ៉ូទប់ស្កាត់ ទាក់ទងនឹងអាវុធនុយក្លេអ៊ែររបស់កូរ៉េខាងជើងផងដែរ។

យ៉ាងណា ប្រធានាធិបតី លោក លី បានស្វែងរកការកែលម្អទំនាក់ទំនងដ៏តានតឹងជាមួយកូរ៉េខាងជើង ទោះបីជាកិច្ចខិតខំប្រឹងប្រែងទាំងនោះ ត្រូវបានទីក្រុងព្យុងយ៉ាងបដិសេធរហូតមកដល់ពេលនេះក៏ដោយ។

គួរឱ្យដឹងថា ប្រទេសកូរ៉េខាងជើងបច្ចុប្បន្នកំពុងរៀបចំសមាជលើកទី៩ របស់គណបក្សពលករកំពុងកាន់អំណាច ដែលជាព្រឹត្តិការណ៍នយោបាយដ៏ធំបំផុតនៅក្នុងផែនការរបស់ពួកគេ ដើម្បីបង្ហាញពីសមត្ថភាពយោធាចុងក្រោយរបស់កូរ៉េខាងជើង៕

ប្រែសម្រួល៖ ណឺ មិនា