ត្រឹម២ថ្ងៃ អាមេរិក-អ៊ីស្រាអែល វាយប្រហារទីក្រុងរបស់អ៊ីរ៉ង់ជាង១៣០ សម្លាប់មនុស្ស ៥៥៥នាក់

យោងតាមទិន្នន័យពីអឌ្ឍចន្ទក្រហមអ៊ីរ៉ង់, មនុស្សចំនួន៥៥៥នាក់បានស្លាប់ត្រឹម២ថ្ងៃ បន្ទាប់ពីអាមេរិកនិងអ៊ីស្រាអែល បើកប្រតិបត្តិការយោធាទ្រង់ទ្រាយធំនៅថ្ងៃសៅរ៍។

BBC បានដកស្រង់របាយការណ៍ពីអឌ្ឍចន្ទក្រហម ដោយផ្សាយនៅថ្ងៃចន្ទទី២ខែមីនាថា ក្នុងចំណោមអ្នកស្លាប់ គឺមានច្រើនបំផុតនៅឯសាលារៀនមួយក្នុងតំបន់ Minab ភាគខាងត្បូង ដែលអ៊ីស្រាអែលវាយប្រហារសម្លាប់មនុស្ស១៥៣នាក់ មានទាំងកុមារផងដែរ។

របាយការណ៍ដដែលនោះបានឲ្យដឹងទៀតថា ត្រឹម២ថ្ងៃ (សៅរ៍និងអាទិត្យ), អាមេរិក-អ៊ីស្រាអែល បានវាយប្រហារលើទីក្រុងជាង១៣០ នៅទូទាំងប្រទេសអ៊ីរ៉ង់។ លើសពីនេះ កម្លាំងជួយសង្គ្រោះជាង ១០០ ០០០នាក់ ត្រូវបានដាក់ពង្រាយទូទាំងប្រទេស។

សូមជម្រាបជាថ្មី សហរដ្ឋអាមេរិកនិងអ៊ីស្រាអែល បានបើកការវាយប្រហាររួមគ្នាទ្រង់ទ្រាយធំលើប្រទេសអ៊ីរ៉ង់កាលពីថ្ងៃទី ២៨ ខែកុម្ភៈ បន្ទាប់ពីកិច្ចចរចានុយក្លេអ៊ែរ បរាជ័យ។

ការវាយប្រហារបានផ្ដោតសំខាន់លើទីតាំងនុយក្លេអ៊ែរ ឃ្លាំងមីស៊ីល-ដ្រូន និងទីបញ្ជាការដ្ឋានរបស់កងឆ្មាំបដិវត្តន៍អ៊ីរ៉ង់ (IRGC) ហើយឈានដល់ការសម្លាប់មេដឹកនាំកំពូលអ៊ីរ៉ង់ Ayatollah Ali Khamenei ថែមទៀតផង។

ជាការសងសឹក អ៊ីរ៉ង់បានបាញ់មីស៊ីលរាប់រយគ្រាប់ទៅលើប្រទេសអ៊ីស្រាអែល និងមូលដ្ឋានទ័ពអាមេរិកនៅក្នុងតំបន់ឈូងសមុទ្រដូចជាបារ៉ែន កាតា គុយវ៉ែត ហ្សកដានី អារ៉ាប់រួមនិងអារ៉ាប៊ីសាអូឌីត៕

អត្ថបទ៖ សុខ សុវណ្ណ