សង្រ្គាមនៅឆ្ងាយ ប៉ុន្តែផលវិបាកនៅកៀកបង្កើយ! អាស៊ានកំពុង​ប្រឈមនឹងវិបត្តិថាមពល

អាស៊ីអាគ្នេយ៍កំពុងត្រៀមខ្លួនទប់ទល់នឹងការ​ដួល​រលំ​ផ្នែកសេដ្ឋកិច្ចយ៉ាងធ្ងន់ធ្ងរ ខណៈដែលការបិទច្រកសមុទ្រ Hormuz បានឈានចូលដល់សប្តាហ៍ទីពីរហើយ។ បន្ទាប់ពីការផ្ទុះឡើងនៃប្រតិបត្តិការ «Epic Fury» កាលពីថ្ងៃទី២៨ ខែកុម្ភៈ ឆ្នាំ២០២៦ ច្រកសមុទ្រដ៏សំខាន់បំផុតមួយនេះត្រូវបានកាត់ផ្ដាច់ស្ទើរតែទាំងស្រុង ដែលធ្វើ​ឲ្យ​បណ្តាប្រទេសអាស៊ានដែលពឹងផ្អែកលើថាមពល កំពុងប្រឈមនឹងការហក់ឡើងនៃតម្លៃប្រេង និងហ្គាសពិភពលោកយ៉ាងគំហុក។

គិតត្រឹមថ្ងៃទី៥ ខែមីនា នេះ ក្រុមហ៊ុនធានារ៉ាប់រងនាវាចរណ៍បានលុបចោលការធានារ៉ាប់រងលើហានិភ័យសង្រ្គាមក្នុងតំបន់ ដែលបង្ខំ​ឲ្យ​ក្រុមហ៊ុនដឹកជញ្ជូនយក្សដូចជា Maersk ត្រូវដាក់ចេញនូវកម្រៃសេវាបន្ថែមបន្ទាន់រហូតដល់ ៣ ៨០០​ដុល្លារ ក្នុងមួយ​កុងតឺន័រ។ សម្រាប់អាស៊ាន នេះគឺជាពេលវេលាដ៏អាក្រក់បំផុត ព្រោះថាជាង ៨០% នៃប្រេងឆៅ និងហ្គាសធម្មជាតិ (LNG) របស់តំបន់នេះ ត្រូវដឹកជញ្ជូនឆ្លងកាត់ច្រកសមុទ្រដែលកំពុងរងការគំរាមកំហែងដោយដ្រូន និងមីស៊ីលរបស់អ៊ីរ៉ង់។

ថៃ និង ហ្វីលីពីន៖ រង​ផល​ប៉ះពាល់​ខ្លាំង​ជាង​គេ​​នៃអតិផរណា

តាម​ការ​ផ្សាយ​របស់ The Star ប្រទេសថៃត្រូវបានអ្នកវិភាគមើលឃើញថា ជាសេដ្ឋកិច្ចដែលងាយរងគ្រោះបំផុតក្នុងប្លុកអាស៊ាន។ ការកើនឡើង ១២-១៥% នៃតម្លៃប្រេងឆៅប្រភេទ Brent ក្នុងសប្តាហ៍នេះ កំពុងគំរាមកំហែងដល់ការងើបឡើងវិញនៃសេដ្ឋកិច្ចក្រោយជំងឺរាតត្បាត។ មន្ត្រីនៅទីក្រុងបាងកកមានការព្រួយបារម្ភថា ការកើនឡើងតម្លៃប្រេងយន្តហោះនឹងធ្វើ​ឲ្យ​វិស័យទេសចរណ៍ដែលជាឆ្អឹងខ្នងសេដ្ឋកិច្ចជាតិ ត្រូវជួបការរអាក់រអួលយ៉ាងខ្លាំង។

ចំណែក​ឯ​នៅទីក្រុងម៉ានីល រដ្ឋមន្ត្រីថាមពលហ្វីលីពីន លោកស្រី Sharon Garin បានព្រមានអំពី​ផល​ប៉ះពាល់ ដែលកំពុងចាប់ផ្តើមរង្គោះរង្គើដល់ជីវភាពប្រជាជន។ នេះ​​យោង​តាម​សារព័ត៌មាន Business World។ តម្លៃដឹកជញ្ជូនក្នុងស្រុកត្រូវបានរំពឹងថានឹងហក់ឡើងខ្ពស់ ដែលបង្ខំ​ឲ្យ​រដ្ឋាភិបាលត្រូវពិចារណាលើការផ្តល់ឧបត្ថម្ភធនប្រេងបន្ទាន់ ដើម្បីបង្ការភាពចលាចលក្នុងសង្គម។

វៀតណាម និងឥណ្ឌូណេស៊ី៖ ហានិភ័យផ្នែកឧស្សាហកម្ម

របាយការណ៍​ពី​សារព័ត៌មាន Vietnam News បាន​បង្ហាញ​ថា វិស័យផលិតកម្មរបស់វៀតណាម​ក៏​កំពុងប្រឈមនឹងបញ្ហាផង​ដែរ។ ទោះបីជាភាគហ៊ុនថាមពលក្នុងស្រុកមានការកើនឡើងបណ្ដោះអាសន្ន ប៉ុន្តែវិស័យឧស្សាហកម្មទាំងមូលកំពុងរងគ្រោះដោយសារការកើនឡើងភ្លាមៗនៃថ្លៃដឹកជញ្ជូន។ ចំណែកឥណ្ឌូណេស៊ីវិញ ទោះបីជាអាចចំណេញខ្លះពីការនាំចេញធ្យូងថ្មដើម្បីជំនួសថាមពល ប៉ុន្តែសម្ពាធអតិផរណាលើទំនិញប្រើប្រាស់ និងសារធាតុគីមីដែលនាំចូល នឹងធ្វើ​ឲ្យ​ប្រាក់ Rupiah ធ្លាក់ថ្លៃយ៉ាងខ្លាំង។ នេះ​បើ​ផ្អែក​លើ​អត្ថបទ​ព័ត៌មាន​ចេញ​ផ្សាយ​របស់ Think Ing។

ម៉ាឡេស៊ី៖ អ្នកចំណេញក្នុងវិបត្តិ

ម៉ាឡេស៊ីគឺជាប្រទេសតែមួយគត់ក្នុងតំបន់ដែលទទួលបានផលចំណេញផ្នែកហិរញ្ញវត្ថុ។ ការ​ស្រាវជ្រាវ​មួយ​​ធ្វើ​ឡើង​ដោយ MIDF Research បាន​ឲ្យ​ដឹង​ថា ក្នុងនាមជាប្រទេសនាំចេញប្រេង និងហ្គាស ការហក់ឡើងនៃតម្លៃប្រេងដែលជិតដល់ ១០០ដុល្លារ​ក្នុងមួយបារ៉ែល កំពុងផ្តល់ប្រាក់ចំណូលយ៉ាងច្រើនដល់រដ្ឋាភិបាល​ម៉ាឡេស៊ី។ ទោះជាយ៉ាងណាក៏ដោយ អ្នកសេដ្ឋកិច្ចព្រមានថា «លាភសំណាង» នេះអាចនឹងមានរយៈពេលខ្លី ប្រសិនបើវិបត្តិដឹកជញ្ជូនសកលធ្វើ​ឲ្យពាណិជ្ជកម្មជាមួយចិន និងបស្ចិមលោកជួបការបង្អង់។

ចំណុចរបត់ដ៏សំខាន់

ដោយសារមិនទាន់មានសញ្ញានៃការបញ្ចប់សង្រ្គាម មេដឹកនាំអាស៊ានត្រូវបានរំពឹងថានឹងបើកកិច្ចប្រជុំបន្ទាន់មួយ ដើម្បីពិភាក្សាអំពីសន្តិសុខថាមពលក្នុងតំបន់ និងការបញ្ចេញប្រេងបម្រុងយុទ្ធសាស្ត្រជាតិ។ វិបត្តិនេះកំពុងក្លាយជាការសាកល្បងដ៏ធំបំផុតសម្រាប់អាស៊ាន ចាប់តាំងពីទសវត្សរ៍ឆ្នាំ១៩៧០មក និងជាសញ្ញាដាស់តឿន​ឲ្យ​តំបន់នេះពន្លឿនការផ្លាស់ប្តូរទៅរកថាមពលកកើតឡើងវិញ​ឲ្យ​បានកាន់តែឆាប់រហ័ស៕

អត្ថបទ៖ ឈាង