ហេតុអ្វីបានជាក្រុមហ៊ូធី នៅ​មិន​ទាន់​លូក​ដៃ​​ជួយ​អ៊ីរ៉ង់​ក្នុង​សង្គ្រាមជាមួយ​អាមេរិក-អ៊ីស្រាអែល?

ភ្លើងសង្គ្រាមរវាងអ៊ីរ៉ង់ អ៊ីស្រាអែល និងសហរដ្ឋអាមេរិក កំពុងឆាបឆេះយ៉ាងសន្ធោសន្ធៅក្នុងខែមីនា ​ឆ្នាំ​២០២៦​នេះ ហើយ​ពិភពលោកទាំងមូលបានសម្លឹងទៅរកសមុទ្រក្រហម ដោយរំពឹងថានឹងមានការចូល​ជួយ​ភ្លាមៗពីសំណាក់ក្រុមហ៊ូធីក្នុងប្រទេសយេម៉ែន។ ក៏ប៉ុន្តែ ទោះបីជាមានផ្សែងហុយចេញពីទីក្រុងតេហេរ៉ង់ និងការបាញ់មីស៊ីលតបតគ្នានៅទូទាំងមជ្ឈិមបូព៌ាក៏ដោយ ក៏ក្រុមហ៊ូធីនៅតែរក្សាភាពស្ងប់ស្ងាត់គួរ​ឲ្យភ្ញាក់ផ្អើល។

ដ្បិត​ពួកគេបាននាំគ្នាចេញមកពាសពេញដង​ផ្លូវក្នុងទីក្រុងសាណា ដើម្បីបង្ហាញសាមគ្គីភាពជាមួយអ៊ីរ៉ង់ ប៉ុន្តែ​​ដ្រូន និងមីស៊ីលរបស់ពួកគេ មិនទាន់ត្រូវបានបង្ហោះចេញនៅឡើយទេ។ ភាពស្ងប់ស្ងាត់ខុសធម្មតានេះ បានធ្វើ​ឲ្យ​មនុស្សជាច្រើនឆ្ងល់ថា តើហេតុអ្វីបានជាក្រុមសកម្មប្រយុទ្ធដ៏ខ្លាំងក្លាមួយនេះ សុខចិត្តឈរមើលពីចម្ងាយ ស្រប​ពេល​ដែលសម្ព័ន្ធមិត្តរបស់ខ្លួនកំពុងស្ថិតក្នុងសមរភូមិដ៏ក្តៅគគុក?

មូលហេតុចម្បងនៃភាពរារែកនេះ គឺដោយសារការរក្សាតុល្យភាពអំណាចនៅក្នុងប្រទេសរបស់ខ្លួន។​ របាយការណ៍ស្រាវជ្រាវ​មួយ​ធ្វើ​ឡើង​ដោយ​វិទ្យាស្ថាន​សិក្សា​សន្តិសុខ​ជាតិ​ INSS របស់​អ៊ីស្រាអែល បាន​​ឲ្យ​ដឹង​ថា ប៉ុន្មានឆ្នាំចុងក្រោយនេះ ប្រទេសយេម៉ែនទើបតែទទួលបានសន្តិភាពដ៏ផុយស្រួយ បន្ទាប់ពីសង្គ្រាមស៊ីវិលដ៏រ៉ាំរ៉ៃ។ មេដឹកនាំក្រុមហ៊ូធីត្រូវបានគេរាយការណ៍ថា មានការប្រុងប្រយ័ត្នខ្ពស់ ព្រោះការលោតចូលទៅក្នុងសង្គ្រាមផ្ទាល់ជាមួយអាមេរិក និងអ៊ីស្រាអែល អាចនឹងដុតបញ្ឆេះ​ឲ្យ​អារ៉ាប៊ីសាអូឌីតចូលមកក្នុងសង្គ្រាមម្តងទៀត ដែលនឹងធ្វើ​ឲ្យ​យេម៉ែនធ្លាក់ក្នុងភ្នក់ភ្លើងសង្គ្រាមដែលពួកគេខំប្រឹងចាកចេញ។ ទន្ទឹម​នោះ ការនៅក្រៅខ្សែបន្ទាត់នៃការវាយប្រហារ​នេះ ជួយឲ្យ​ពួកគេរក្សាបាននូវសមិទ្ធផលក្នុងស្រុក ដូចជា ការបើកដំណើរការកំពង់ផែសំខាន់ៗ និងការហូរចូលនៃទំនិញចាំបាច់សម្រាប់ប្រជាជនរបស់ខ្លួន។

លើសពីនេះ អ្នកជំនាញយល់ថា ក្រុមហ៊ូធីកំពុងត្រូវបានអ៊ីរ៉ង់រក្សាទុកជា «សន្លឹកអាត់» បម្រុង។ នេះ​បើ​តាម​ការ​ចេញ​ផ្សាយ​របស់​ទីភ្នាក់ងារ​ព័ត៌មាន Xinhua។ ខណៈដែលក្រុមហេសបូឡា​កំពុងជាប់ដៃក្នុងសមរភូមិជាប់ព្រំដែនអ៊ីស្រាអែល ក្រុមហ៊ូធីវិញបានកាន់កាប់ទីតាំងយុទ្ធសាស្ត្រពិសេសនៅច្រកសមុទ្រ Bab el-Mandeb ដែលជាផ្លូវដឹកជញ្ជូនដ៏សំខាន់បំផុតមួយរបស់ពិភពលោក។ គេ​ជឿថា ទីក្រុង​តេហេរ៉ង់​កំពុងរក្សាផ្លូវនាវាចរណ៍​មួយ​នេះ​ទុកជា «ផែនការចុងក្រោយ» ប្រសិនបើសមរភូមិផ្សេងៗទៀតត្រូវបរាជ័យ ជាពិសេស​បើ​ការ​បិទ​ច្រក​សមុទ្រ Hormuz មិន​ទទួល​បាន​ផ្លែផ្កា ដើម្បី​ធ្វើ​ឲ្យ​តម្លៃថាមពលពិភពលោកហក់ឡើងខ្ពស់។

សម្រាប់​ហេតុផល​មួយ​ទៀត បើ​តាម​​ការ​ចុះ​ផ្សាយ​របស់​ Global Security Review ស្ថានភាពនេះត្រូវបានគេហៅថាជា «ភាពស្ងប់ស្ងាត់ជាយុទ្ធសាស្ត្រក្នុងភាពតានតឹង»​ របស់​ហ៊ូធី។ មេដឹកនាំក្រុមហ៊ូធី លោក Abdul-Malik al-Houthi បានព្រមានថា កងកម្លាំងរបស់លោក បានដាក់ម្រាមដៃលើកៃកាំភ្លើងរួចរាល់ហើយ ហើយរបាយការណ៍បានបង្ហាញថា ពួកគេបាននិងកំពុងមមាញឹកក្នុងការបង្កើនកម្លាំងមីស៊ីលនៅតាមឆ្នេររបស់ខ្លួន។ សម្រាប់ពេលនេះ ពួកគេកំពុងជ្រើសរើសលេងល្បែងយុទ្ធសាស្ត្រវែងឆ្ងាយ ដោយជឿជាក់ថា ការអត់ធ្មត់នៅថ្ងៃនេះ នឹងផ្តល់អំណាច​​ឲ្យ​ពួកគេវាយបកកាន់តែខ្លាំងនៅថ្ងៃស្អែក។

ពិភពលោក​កំពុង​នៅតែបន្តតាមដានសមុទ្រក្រហម ដោយដឹងយ៉ាងច្បាស់ថា បើទោះបីជាក្រុមហ៊ូធីមិនទាន់ចូលរួមក្នុងសង្គ្រាម ក៏មិនមែនមានន័យថាពួកគេស្ថិតនៅក្រៅរង្វង់សង្គ្រាមនោះដែរ៕

អត្ថបទ៖ ឈាង