អាមេរិកដាក់​បន្ត​ដាក់​ទណ្ឌកម្មលើបុគ្គល៦នាក់ និងអង្គភាព២ ដែលឆបោក​ក្រុមហ៊ុន​អាមេរិក​

ក្រសួងហិរញ្ញវត្ថុសហរដ្ឋអាមេរិក បាន​ឲ្យ​ដឹង​នៅថ្ងៃព្រហស្បតិ៍ទី១២មីនាថា ខ្លួនបានដាក់ទណ្ឌកម្មលើបុគ្គលចំនួន៦នាក់ និងអង្គភាពចំនួន២ ចំពោះតួនាទីរបស់ពួកគេនៅក្នុងគម្រោងបុគ្គលិកបច្ចេកវិទ្យាព័ត៌មាន (IT) ដែលរៀបចំឡើងដោយកូរ៉េខាងជើង ក្រោមការចោទប្រកាន់ពីបទបោកប្រាស់អាជីវកម្មអាមេរិក និងបង្កើតប្រាក់ចំណូលដើម្បីផ្តល់មូលនិធិដល់កម្មវិធីអាវុធរបស់ទីក្រុងព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម koreaherald ការិយាល័យគ្រប់គ្រងទ្រព្យសម្បត្តិបរទេស (OFAC) នៃក្រសួង​ហិរញ្ញវត្ថុ​សហរដ្ឋអាមេរិក បានប្រកាសពីវិធានការនេះ ដោយកត់សម្គាល់ថា ទណ្ឌកម្មចុងក្រោយបំផុតគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលទាំងមូល ដើម្បីទប់ទល់នឹងការ​ទទួល​បាន​ប្រាក់ចំណូល​​របស់​ទីក្រុងព្យុងយ៉ាង។

រដ្ឋមន្ត្រីក្រសួងហិរញ្ញាវត្ថុ លោក Scott Bessent ត្រូវបានដកស្រង់សម្តីថា «របបកូរ៉េខាងជើងកំណត់គោលដៅក្រុមហ៊ុនអាមេរិកតាមរយៈគម្រោងបោកប្រាស់ដែលអនុវត្តដោយប្រតិបត្តិករ​​បច្ចេកវិទ្យា​ព័ត៌មាន (IT) នៅក្រៅប្រទេសរបស់ខ្លួន ដែលប្រើប្រាស់ទិន្នន័យរសើប និងជំរិតទារប្រាក់ពីអាជីវកម្ម​​នូវ​ទឹក​ប្រាក់​យ៉ាងច្រើន»។

លោក បានបន្ថែមថា «ក្រោមការដឹកនាំរបស់ប្រធានាធិបតីត្រាំ ក្រសួងនឹងបន្តតាមដានប្រាក់នេះ ដើម្បីការពារអាជីវកម្មអាមេរិកពីសកម្មភាពព្យាបាទ និងធានាថា អ្នកដែលធ្វើខុសត្រូវត្រូវទទួលខុសត្រូវចំពោះរឿងនេះទាំងស្រុង»។

បន្ថែមទៅក្នុងបញ្ជីទណ្ឌកម្ម OFAC គឺលោក Yun Song-guk ដែលជាពលរដ្ឋកូរ៉េខាងជើង; លោក York Louis Celestino Herrera មកពីសាធារណរដ្ឋដូមីនីកែន; និងជនជាតិវៀតណាមបួននាក់គឺ Nguyen Quang Viet, Do Phi Khanh, Hoang Van Nguyen និង Hoang Minh Quang។

ដោយឡែក ចំពោះអង្គភាពពីរដែលត្រូវបានបន្ថែមទៅក្នុងបញ្ជីគឺក្រុមហ៊ុនអភិវឌ្ឍន៍បច្ចេកវិទ្យា Amnokgang ដែលជាក្រុមហ៊ុនកូរ៉េខាងជើង និងក្រុមហ៊ុនសេវាកម្មអន្តរជាតិ Quangvietdnbg ដែលជាក្រុមហ៊ុនដែលមានមូលដ្ឋាននៅប្រទេសវៀតណាម៕

អត្ថបទ៖ សាង ស្រីល័ក្ខ