ហេសបូឡា ត្រៀមខ្លួនក្នុងសមរភូមិដ៏វែងឆ្ងាយ ខណៈអុីស្រាអែល គំរាមបំផ្លាញ ហេដ្ឋារចនាសម្ព័ន្ធលីបង់

មេដឹកនាំហេសបូឡា លោក Naim Qassem បាននិយាយកាលពីថ្ងៃសុក្រ​ ទី១៣​ ខែមីនាថា ក្រុមរបស់លោកបានត្រៀមខ្លួនរួចជាស្រេចសម្រាប់ការប្រឈមមុខដាក់គ្នាដ៏វែងឆ្ងាយជាមួយអុីស្រាអែល ខណៈដែលទីក្រុងយេរូសាឡឹមបានគំរាមកំហែងថា នឹងធ្វើឱ្យប្រទេសលីបង់ រងការខូចខាតកាន់តែ «ខ្លាំង» លើហេដ្ឋារចនាសម្ព័ន្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម CNN លោក Qassem បាននិយាយនៅក្នុងសុន្ទរកថាតាមទូរទស្សន៍លើកទីពីរ គិតចាប់តាំងពីសង្គ្រាមចុងក្រោយបានចាប់ផ្តើមថា៖ «យើងបានរៀបចំខ្លួនសម្រាប់ការប្រឈមមុខដាក់គ្នាដ៏យូរអង្វែង ហើយប្រសិនបើព្រះជាម្ចាស់អនុញ្ញាត ពួកគេ (ជនជាតិអុីស្រាអែល) នឹងភ្ញាក់ផ្អើលនៅលើសមរភូមិជាក់ជាមិនខានឡើយ ហើយនេះគឺជាសមរភូមិអត្ថិភាព មិនមែនជាសមរភូមិមានកំណត់ ឬសាមញ្ញនោះទេ»។

អុីស្រាអែល កាលពីថ្ងៃមិលមិញ បានបំផ្លាញស្ពានមួយឆ្លងកាត់ទន្លេ Litani រវាងទីក្រុង Zrariyeh និង Tayr Falsay។ នេះបើយោងតាមទីភ្នាក់ងារព័ត៌មានជាតិដែលគ្រប់គ្រងដោយរដ្ឋលីបង់។ ទន្លេនេះបែងចែកភាគខាងត្បូងលីបង់ ពីខាងកើតទៅខាងលិច។

នៅក្នុងសេចក្តីថ្លែងការណ៍មួយ យោធាអុីស្រាអែល បានចាត់ទុកស្ពាននេះថា​ ជា «ចំណុចឆ្លងកាត់ដ៏សំខាន់» សម្រាប់ក្រុមហេសបូឡា ពីភាគខាងជើងទៅភាគខាងត្បូងលីបង់ ដើម្បីកសាងអំណាចរបស់ខ្លួន និងត្រៀមខ្លួនសម្រាប់ការប្រយុទ្ធ។ ការវាយប្រហារនេះគឺជាការវាយលើកដំបូងលើហេដ្ឋារចនាសម្ព័ន្ធសាធារណៈលីបង់ បើគិតចាប់តាំងពីការចាប់ផ្តើមនៃសង្គ្រាមមជ្ឈិមបូព៌ា ហើយក៏ត្រូវបានទទួលស្គាល់ដោយអុីស្រាអែល ផងដែរ។

រដ្ឋមន្ត្រីក្រសួងការពារជាតិអុីស្រាអែល លោក Israel Katz បាននិយាយកាលពីម្សិលមិញថា៖ «នេះគ្រាន់តែជាការចាប់ផ្តើមប៉ុណ្ណោះ ហើយរដ្ឋាភិបាលលីបង់ និងរដ្ឋនឹងត្រូវខាតបង់ខ្ពស់លើការខូចខាតដល់ហេដ្ឋារចនាសម្ព័ន្ធជាតិលីបង់ ដែលប្រើប្រាស់ដោយភេរវករហេសបូឡា។ ជាពិសេស លីបង់នឹងរង «ការបាត់បង់ទឹកដី រហូតដល់ប្រទេសនេះមានការប្តេជ្ញាចិត្តក្នុងដកហូតអាវុធពីក្រុមហេសបូឡា»។

កាលពីដើមសប្តាហ៍នេះ ប្រធានាធិបតីលីបង់ លោក Joseph Aoun បានស្នើចរចាដោយផ្ទាល់ជាមួយអុីស្រាអែល ប៉ុន្តែកាលពីម្សិលមិញ លោកបាននិយាយថា ខ្លួនមិនទាន់ទទួលបានការឆ្លើយតបនៅឡើយទេ។ មិនតែប៉ុណ្ណោះ កាលពីថ្ងៃព្រហស្បតិ៍ នាយករដ្ឋមន្ត្រីអុីស្រាអែល លោក Benjamin Netanyahu បាននិយាយថា លោកបានប្រាប់រដ្ឋាភិបាលលីបង់រួចហើយថា «ពួកគេកំពុងលេងជាមួយភ្លើង ប្រសិនបើពួកគេបន្តអនុញ្ញាតឲ្យក្រុមហេសបូឡាដំណើរការ មិនព្រមដកហូតអាវុធ»។

គួរបញ្ចាក់ដែរថា ប្រទេសលីបង់ត្រូវបានអូសទាញចូលទៅក្នុងសង្គ្រាមមជ្ឈិមបូព៌ាកាលពីសប្តាហ៍មុន នៅពេលដែលក្រុមសកម្មប្រយុទ្ធដែលគាំទ្រដោយទីក្រុងតេហេរ៉ង់ បានវាយប្រហារអុីស្រាអែល ដើម្បីឆ្លើយតបទៅនឹងការសម្លាប់មេដឹកនាំកំពូលអុីរ៉ង់ លោក Ayatollah Ali Khamenei ក្នុងការវាយប្រហាររវាងសហរដ្ឋអាមេរិក និងអុីស្រាអែល៕

អត្ថបទ៖ សាង ស្រីល័ក្ខ