ព័ត៌មានអន្ដរជាតិ

ជប៉ុននិងបារាំង សន្យារួមគ្នាសម្របសម្រួលបញ្ចប់ជម្លោះនៅមជ្ឈិមបូព៌ា ឆ្ពោះទៅបើកច្រក Hormuz

បានផុស

៣ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

ខណៈសង្រ្គាមនៅតំបន់មជ្ឈិមបូព៌ានៅតែបន្តអូសបន្លាយឈានចូលខែទី២ ធ្វើឱ្យតម្លៃប្រេងនៅទូទាំងពិភពលោកកើនឡើងឥតឈប់ នាយករដ្ឋមន្រី្តជប៉ុន លោកស្រី សាណាអេ តាកាអ៊ិឈិ (Sanae Takaichi) បានលើកឡើងថា ជប៉ុន និងបារាំង បានព្រមព្រៀងគ្នានៅថ្ងៃពុធក្នុងការដើរតួនាទីធ្វើជាអ្នកសម្របសម្រួលយ៉ាងជិតស្និទ្ធ ជំរុញឱ្យភាគីសហរដ្ឋអាមេរិកនិងអ៊ីស្រាអែលជាមួយអ៊ីរ៉ង់បញ្ចប់សង្គ្រាមនៅមជ្ឈិមបូព៌ា និងបើកច្រកសមុទ្រ Hormuz ឡើងវិញសម្រាប់នាវាដឹកប្រេងនិងឧស្ម័នទៅកាន់ពិភពលោក។

ប្រធានាធិបតីបារាំង លោក ម៉ាក្រុង និង នាយករដ្ឋមន្រី្តជប៉ុន លោកស្រី តាកាអ៊ិឈិ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងាររ៉យទ័រផ្សាយថ្ងៃទី០១ ខែមេសា ឆ្នាំ២០២៦ លោកស្រី តាកាអ៊ិឈិ បានលើកឡើងថា បន្ទាប់ពីកិច្ចពិភាក្សាជាមួយប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) នៅទីក្រុងតូក្យូ ស្តីពីចំណងមិត្តភាពសន្តិសុខ និងកិច្ចសហប្រតិបត្តិការឧស្សាហកម្ម ជប៉ុននិងបារាំងត្រូវតែរកដំណោះស្រាយមួយឱ្យសមស្រប។

នាយករដ្ឋមន្ត្រីជប៉ុន បន្តថា៖ « ដោយសារតែស្ថានភាពអន្តរជាតិប្រឈមខ្លាំង! ខ្ញុំជឿថារឿងនេះមានសារៈសំខាន់យ៉ាងខ្លាំង ចំពោះមេដឹកនាំជប៉ុននិងបារាំង ក្នុងការពង្រឹងចំណងមិត្តភាពផ្ទាល់ខ្លួន និងធ្វើឱ្យកិច្ចសហប្រតិបត្តិការរបស់យើងកាន់តែរឹងមាំ»។

ដោយសារជម្លោះនៅមជ្ឈិមបូព៌ាបច្ចុប្បន្នឈានដល់សប្តាហ៍ទី៥ ហើយ ចំណែកប្រទេសជប៉ុន បារាំង ក៏ដូចជាប្រទេសដទៃទៀត កំពុងតស៊ូជាមួយនឹងការកើនឡើងនៃតម្លៃថាមពលខ្ពស់។

គួរបញ្ជាក់ថា ប្រទេសជប៉ុនជាធម្មតាទទួលប្រេងប្រហែល ៩០% ពីមជ្ឈិមបូព៌ា តែចាប់តាំងពីសង្រ្គាមកើតឡើង ប្រទេសនេះចាប់ផ្តើមទាញយកប្រេងបម្រុងមកប្រើប្រាស់ ដើម្បីទប់ទល់នឹងផលប៉ះពាល់នៃសេដ្ឋកិច្ចជាតិ។

ថ្លែងជាមួយ លោកស្រី តាកាអ៊ិឈិ ប្រធានាធិបតីបារាំង លោក ម៉ាក្រុង និយាយថា លោកបានចែករំលែកជំហររបស់មេដឹកនាំជប៉ុនលើតម្រូវការស្តារសេរីភាពនៃការធ្វើនាវាចរណ៍ក្នុងច្រកសមុទ្រ Hormuz ។

មិនតែប៉ុណ្ណោះ ប្រទេសបារាំងបានធ្វើកិច្ចពិភាក្សាជាមួយប្រទេសជាច្រើន ខណៈខ្លួនកំពុងស្វែងរកសំណើសម្រាប់បេសកកម្ម ដើម្បីបើកផ្លូវទឹកនេះឡើងវិញ ពេលដែលជម្លោះបញ្ចប់។

ចំណែកប្រទេសជប៉ុននិយាយថា ខ្លួនអាចពិចារណាបញ្ជូនយន្តហោះបោសសម្អាតមីន ទោះបីជាវិសាលភាពនៃតួនាទីណាមួយនឹងត្រូវបានកំណត់ដោយរដ្ឋធម្មនុញ្ញសន្តិភាពនិយមរបស់ប្រទេសខ្លួនក៏ដោយ៕

ប្រែសម្រួល៖ ណឺ មិនា