ព័ត៌មានអន្ដរជាតិ

រុស្ស៊ីផ្តើមធ្វើតេស្តវ៉ាក់សាំងព្យាបាលជំងឺមហារីកលើមនុស្ស ក្រោយជោគជ័យលើសត្វ

បានផុស

៣ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

ក្រសួងសុខាភិបាលរុស្ស៊ី បានលើកឡើងក្នុងសេចក្តីថ្លែងការណ៍មួយទៅកាន់សារព័ត៌មាន TASS កាលពីថ្ងៃពុធថា អ្នកកើតជំងឺមហារីកស្បែកប្រភេទ melanoma កម្រិតខ្ពស់ជនជាតិរុស្ស៊ីម្នាក់ទទួលវ៉ាក់សាំងមហារីកផ្ទាល់ខ្លួនដំបូងគេ ខណៈប្រទេសនេះសង្ឃឹមថា ការរកឃើញនេះជារបកគំហើញថ្មីមួយក្នុងការព្យាបាលជំងឺមហារីក។

កាលពីឆ្នាំមុន ក្រសួងសុខាភិបាលរុស្ស៊ី បានអនុម័តថ្នាំពីរប្រភេទដែលផលិតក្នុងស្រុកពីរប្រភេទ ទី១ «ថ្នាំ Neooncovac» សម្រាប់វ៉ាក់សាំង mRNA ប្រើលើជំងឺមហារីកស្បែកប្រភេទ melanoma កម្រិតខ្ពស់ និងទី២ «ថ្នាំ Oncopept» ជាការព្យាបាលដោយជាលិកា peptide ក្នុងការកំណត់គោលដៅលើដុំសាច់ពោះវៀនធំដ៏កាចសាហាវ។ ថ្នាំទាំងពីរនេះចាប់ផ្តើមសាកល្បងលើមនុស្សនៅឆ្នាំ២០២៥ ។

វ៉ាក់សាំងព្យាបាលស្បែក។ រូបភាព៖ ក្រសួងសុខាភិបាលនៃសហព័ន្ធរុស្ស៊ី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម លោក Aleksandr Ginzburg នាយកវិទ្យាសាស្ត្រនៃវិទ្យាស្ថានស្រាវជ្រាវរោគរាតត្បាតនិងជីវសាស្ត្រ Gamaleya ឱ្យដឹងកាលពីថ្ងៃអង្គារថា «ថ្នាំ Neooncovac » ត្រូវបានផ្តល់ទៅឱ្យអ្នកជំងឺគ្លីនិកដំបូងរបស់លោកដែលជាបុរសអាយុ ៦០ឆ្នាំម្នាក់ និងមានជំងឺមហារីកស្បែកដំណាក់កាលទី៣។

លោក បានប្រាប់សារព័ត៌មានរុស្ស៊ី Gazeta.ru កាលពីថ្ងៃពុធថា៖ « រហូតមកដល់ពេលនេះ គាត់មានសុខភាពល្អ។ មិនមានប្រតិកម្មអ្វីចំពោះថ្នាំនេះទេ។ គាត់មានអាយុ ៦០ឆ្នាំ ហើយមានជំងឺមហារីកស្បែកដំណាក់កាលទី៣ ដែលជាដំណាក់កាលនៃការរីករាលដាល។ វ៉ាក់សាំងនេះជួយប្រយុទ្ធប្រឆាំងនឹងការរីករាលដាលជាពិសេស»។

លោក Andrey Kaprin ប្រធានមជ្ឈមណ្ឌលស្រាវជ្រាវវេជ្ជសាស្ត្រជាតិផ្នែកវិទ្យុសកម្មនៅក្រសួងសុខាភិបាលរុស្ស៊ី បានលើកឡើងថា វិធីសាស្រ្តនេះតំណាងឱ្យវិធីសាស្រ្តព្យាបាលថ្មីមួយ។

លោក Kaprin ប្រាប់សារព័ត៌មាន TASS កាលពីថ្ងៃពុធថា៖ « នេះគឺជាវិធីសាស្រ្តខុសគ្នាជាមួយការព្យាបាលមូលដ្ឋាន វាមិនមែនគ្រាន់តែព្យាបាលជំងឺនោះទេ ប៉ុន្តែជាការបណ្តុះបណ្តាលប្រព័ន្ធភាពស៊ាំឱ្យស្គាល់ថ្នាំនិងបំផ្លាញកោសិកាណាដែលបង្កការគំរាមកំហែង»។

គួរបញ្ជាក់ថាអ្នកជំងឺនឹងត្រូវផ្តល់ថ្នាំចំនួន ៨-៩ដូសក្នុងចន្លោះពេល ២-៣សប្តាហ៍ ដោយមើលការឆ្លើយតបនៃប្រព័ន្ធភាពស៊ាំរបស់អ្នកជំងឺបន្ទាប់ពីការចាក់ថ្នាំម្តងៗ។

ចំណែកលទ្ធផលពេទ្យរំពឹងថានឹងកើតឡើង បន្ទាប់ពីទទួលការព្យាបាលរយៈពេលបីខែ៕

ប្រែសម្រួល៖ ណឺ មិនា