បេសកជន​រុស្ស៊ី​ ឲ្យអង់គ្លេស និង​អឺរ៉ុប​ ចេះ​ទទួលស្គាល់កំហុស ហើយងាកទៅប្រើប្រេង​រុស្ស៊ីវិញ

លោក Kirill Dmitriev បេសកជនពិសេសរបស់ប្រធានាធិបតី​ពូទីន និងជានាយកប្រតិបត្តិមូលនិធិវិនិយោគផ្ទាល់របស់រុស្ស៊ី (RDIF) បានជំរុញឲ្យមន្ត្រីអង់គ្លេស និងសហភាពអឺរ៉ុប (EU) «ទទួលស្គាល់កំហុសរបស់ពួកគេ» ហើយត្រលប់ទៅទិញ និងប្រើប្រាស់ប្រេង ព្រមទាំងឧស្ម័នរបស់រុស្ស៊ីឡើងវិញ។ នេះបើយោងតាមទីភ្នាក់ងារសារព័ត៌មាន TASS បានរាយការណ៍កាលពីថ្ងៃទី ២ ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Dmitriev បានសរសេរនៅលើបណ្ដាញសង្គម X របស់ខ្លួនថា «ការលុបបំបាត់ ការកាត់បន្ថយភាពតានតឹងដែលកំពុងកើតឡើង ការស្តារ​ឡើងវិញនូវបង្ហូរឧស្ម័ន Nord Stream 2 ដោយចំណាយផ្ទាល់ខ្លួន នោះនឹងទទួលបានប្រេង ឧស្ម័ន ជី អេលីយ៉ូម (helium) និងទំនិញសំខាន់ៗផ្សេងទៀតពីប្រទេសរុស្ស៊ីក្នុងតម្លៃសមរម្យ និងអាចទុកចិត្តបាន»។

ការបង្ហោះរបស់លោក Dmitriev ត្រូវបានធ្វើឡើងនៅពេលដែលប្រធានាធិបតីអាមេរិក ដូណាល់ ត្រាំ ថ្លែងនៅក្នុង​​សារ​ទៅកាន់​ប្រជាជាតិមួយដោយប្រកាសថា សហរដ្ឋអាមេរិកមិនចាំបាច់ពឹងផ្អែកលើច្រកសមុទ្រ Hormuz ទេ ហើយបានណែនាំថា ប្រទេសដែលកំពុងនាំចូលប្រេងតាមរយៈច្រក​នោះ​ ត្រូវដោះស្រាយបញ្ហាសន្តិសុខដែនសមុទ្រដោយខ្លួនឯង ឬប្តូរទៅទិញប្រេងពីទីក្រុងវ៉ាស៊ីនតោនវិញ។

ភាពតានតឹងផ្នែកថាមពលសកលបានកើតឡើងបន្ទាប់ពីអាមេរិក និងអ៊ីស្រាអែលបានបើកយុទ្ធនាការយោធាប្រឆាំងនឹងអ៊ីរ៉ង់ចាប់ពីចុងខែកុម្ភៈ បន្ទាប់មកដោយការវាយប្រហារសងសឹកយ៉ាងខ្លាំងពីកងឆ្មាំបដិវត្តន៍អ៊ីស្លាមអ៊ីរ៉ង់។ មូលដ្ឋានយោធាអាមេរិកមួយចំនួននៅមជ្ឈិមបូព៌ាត្រូវបានវាយប្រហារ ខណៈដែលនាវាដឹកប្រេងជាច្រើនប្រឈមនឹងហានិភ័យនៅពេលឆ្លងកាត់ច្រកHormuz។

ជាថ្នូរវិញ អាជ្ញាធរអ៊ីរ៉ង់បានសម្រេចចិត្តបិទច្រកសមុទ្រ ចំពោះកប៉ាល់ដែលមានទំនាក់ទំនងជាមួយអាមេរិក អ៊ីស្រាអែល និងប្រទេសដែលគាំទ្រការឈ្លានពានប្រឆាំងនឹងសាធារណរដ្ឋអ៊ីស្លាម។ ក្នុងអំឡុងពេលជម្លោះ នាវាដឹកប្រេងជាច្រើនគ្រឿងត្រូវបានវាយប្រហារ ដោយសារតែឆ្លងកាត់ច្រកដោយគ្មានការអនុញ្ញាតពីទីក្រុងតេហេរ៉ង់។ ក្រោយមក រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ប្រទេសរបស់លោកនៅតែអនុញ្ញាតឲ្យកប៉ាល់នៃប្រទេសជាមិត្ត ដូចជារុស្ស៊ី ចិន ឥណ្ឌា អ៊ីរ៉ាក់ និងប៉ាគីស្ថានឆ្លងកាត់៕

អត្ថបទ៖ សាង ស្រីល័ក្ខ