ព័ត៌មានអន្ដរជាតិ

លោក ត្រាំ ថា ពេលឈ្នះ អាមេរិកអាចយកថ្លៃសេវាកប៉ាល់ដឹកប្រេងឆ្លងកាត់ច្រក Hormuz

បានផុស

៣ ខែ មុន

នៅ

ថ្ងៃអង្គារ ៧ មេសា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងថា សហរដ្ឋអាមេរិក អាចត្រួតពិនិត្យមើលលើការយកថ្លៃសេវាសម្រាប់ការឆ្លងកាត់កប៉ាល់ដឹកប្រេងតាមច្រកសមុទ្រហ័រមូស (Hormuz) បន្ទាប់ពីសង្គ្រាម ដែលទំនងតម្រូវឱ្យមានការគ្រប់គ្រងដោយផ្ទាល់ពីយោធាអាមេរិកលើផ្លូវទឹកយុទ្ធសាស្ត្រនេះ។ នេះបើយោងតាមសារព័ត៌មាន Al Jazeera ផ្សាយថ្ងៃទី៦ ខែមសា ឆ្នាំ២០២៦ ។

ពេលអ្នកយកព័ត៌មានសួរប្រធានាធិបតីអាមេរិកក្នុងសន្និសីទសារព័ត៌មាន ដោយលើកឡើងថា៖ « តើលោកនឹងទទួលយកកិច្ចព្រមព្រៀងមួយដែលនឹងអនុញ្ញាតឱ្យអ៊ីរ៉ង់យកថ្លៃសេវាពីកប៉ាល់ ដើម្បីឆ្លងកាត់ច្រកសមុទ្រនេះដែរឬទេ»?

លោក ត្រាំ ឆ្លើយថា៖ « ចុះបើយើងគិតថ្លៃសេវាវិញ? ខ្ញុំចង់ធ្វើបែបនោះជាជាងអនុញ្ញាតឱ្យពួកគេ [អ៊ីរ៉ង់] ធ្វើវា។ ហេតុអ្វីយើងមិនគួរធ្វើ? យើងជាអ្នកឈ្នះ។ យើងឈ្នះហើយ»។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បញ្ជាក់ជាថ្មីថា អ៊ីរ៉ង់បានបរាជ័យខាងយោធាហើយ។ នេះជាការអះអាងរបស់លោកតាំងពីដំបូងនៃសង្គ្រាម ទោះបីជាមានការវាយប្រហារដោយដ្រូននិងមីស៊ីលជាបន្តបន្ទាប់របស់អ៊ីរ៉ង់នៅទូទាំងតំបន់មជ្ឈិមបូព៌ានិងការបិទផ្លូវជាបន្តបន្ទាប់នៅច្រកសមុទ្រ Hormuz ក៏ដោយ។

លោក ត្រាំ ប្រាប់អ្នកយកព័ត៌មានថា៖ « រឿងតែមួយគត់ដែលពួកគេជឿគឺថា អូ! យើងនឹងទម្លាក់គ្រាប់មីនចូលក្នុងទឹក។ មិនអីទេ! ទេ! ខ្ញុំចង់មានន័យថា យើងមានគំនិតមួយដែលយើងនឹងគិតថ្លៃសេវា»។

គួរបញ្ជាក់ថា ច្រកសមុទ្រ Hormuz ជាច្រកមួយភ្ជាប់តំបន់ឈូងសមុទ្រពែរ្សទៅនឹងមហាសមុទ្រឥណ្ឌា ភាគច្រើនដែនទឹកគឺស្ថិតនៅក្នុងប្រទេសអូម៉ង់និងអ៊ីរ៉ង់។ ប្រេងប្រហែល ២០ភាគរយនិងឧស្ម័នធម្មជាតិរាវ (LNG) របស់ពិភពលោកបានឆ្លងកាត់ច្រកនេះនៅមុនសង្គ្រាម។

ប្រធានាធិបតីអាមេរិក បានប្រាប់អ្នកយកព័ត៌មានកាលពីថ្ងៃចន្ទថា កិច្ចព្រមព្រៀងណាមួយជាមួយអ៊ីរ៉ង់ ត្រូវតែរួមបញ្ចូលការបើកច្រកសមុទ្រ Hormuz ឡើងវិញ។

លោកបន្តថា៖ « យើងត្រូវតែមានកិច្ចព្រមព្រៀងមួយដែលអាចទទួលយកបានសម្រាប់ខ្ញុំ! ហើយផ្នែកមួយនៃកិច្ចព្រមព្រៀងនោះគឺយើងចង់ឱ្យចរាចរណ៍ដឹកប្រេងដោយសេរី»៕

ប្រែសម្រួល៖ ណឺ មិនា