ត្រាំ ថា ណាតូ «គ្មានបានការ» និងប្រាប់ឲ្យនៅឲ្យឆ្ងាយពីច្រក Hormuz

ពេញមួយសង្គ្រាមអ៊ីរ៉ង់ លោក ដូណាល់ ត្រាំ បានថាឲ្យអង្គការណាតូកប់ៗមាត់ ព្រោះតែមិនព្រមជួយអាមេរិក ហើយឥឡូវ ដល់ថ្នាក់ប្រមុខសេតវិមាន ហៅសម្ព័ន្ធភាពយោធាមួយនេះថា «គ្មានបានការ» និងប្រាប់ឲ្យនៅឲ្យឆ្ងាយពីច្រកសមុទ្រ Hormuz ថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បង្ហោះសារលើបណ្តាញសង្គម Truth Social កាលពីថ្ងៃសុក្រទី១៧ខែមេសាឆ្នាំ២០២៦ ប្រធានាធិបតីអាមេរិក សរសេរថា៖ «ឥឡូវ ពេលដែលស្ថានភាពនៅច្រកសមុទ្រ Hormuz បញ្ចប់ ខ្ញុំក៏ស្រាប់តែទទួលបានការហៅទូរស័ព្ទពីអង្គការ ណាតូ ដោយសួរថា តើយើងត្រូវការជំនួយខ្លះដែរឬទេ? ខ្ញុំបានប្រាប់ពួកគេវិញថា នៅឲ្យឆ្ងាយ! ពួកគេគ្មានប្រយោជន៍សោះនៅពេល យើងត្រូវការ។ ពិតជាខ្លាក្រដាសមែន!»។

ការបន្ទោសលើកនេះ គឺដូចទៅនឹងលើកមុនដែរ ដោយកាលពីដើមខែមេសាលោក  ត្រាំ បានស្តីឲ្យណាតូ ខ្លាំងៗរឿងសង្គ្រាមអ៊ីរ៉ង់ថា ណាតូ មិនបាននៅទីនោះទេ នៅពេលដែលយើងត្រូវការពួកគេ។

លោកត្រាំ ក៏ប្រកាសជាចំហដែរថា លោកកំពុង «ពិចារណាយ៉ាងម៉ឺងម៉ាត់» ក្នុងការដកសហរដ្ឋអាមេរិកចេញពីសម្ព័ន្ធភាពណាតូ។ ការថ្លែងបែបនេះបានធ្វើ​ឲ្យ​ពិភពលោកមានការភ្ញាក់ផ្អើលយ៉ាងខ្លាំង ខណៈដែលអង្គការមួយនេះទើបតែប្រារព្ធខួប​៧៧ឆ្នាំនៃវត្តមានរបស់ខ្លួន។

ភាពតានតឹងបានផ្ទុះឡើងខ្លាំង បន្ទាប់ពីបណ្តាប្រទេសជាសមាជិកណាតូនៅអឺរ៉ុប បានបដិសេធសំណើរបស់ទីក្រុងវ៉ាស៊ីនតោន ក្នុងការបញ្ជូនកងទ័ពជើងទឹកទៅកាន់ច្រកសមុទ្រ Hormuz ដើម្បីរួមដៃជាមួយអាមេរិក និងអ៊ីស្រាអែលក្នុងការប្រឈមមុខដាក់គ្នាជាមួយអ៊ីរ៉ង់។

លោក ដូណាល់ ត្រាំ បានសម្តែងការមិនពេញចិត្តយ៉ាងខ្លាំង ដោយលោកហៅអង្គការណាតូថាជា «ខ្លាក្រដាស» ដែលចាំតែយកប្រយោជន៍ពីអាមេរិក ប៉ុន្តែមិនព្រមជួយនៅពេលអាមេរិកត្រូវការ៕

អត្ថបទ៖ សុខ សុវណ្ណ