កូវីដ-១៩៖ ការរៀនតាមអនឡាញ អាចបណ្ដាលឱ្យកុមារប្រឈមបញ្ហាភ្នែកធ្ងន់ធ្ងរ

គ្រូពេទ្យភ្នែក សហរដ្ឋអាមេរិក និយាយថា បញ្ហាមើលមិនច្បាស់ចំពោះកុមារបានក្លាយជារឿងធម្មតាទៅហើយនៅមុនពេលមានរោគរាតត្បាត ប៉ុន្តែក្នុងអំឡុងវិបត្តិកូវីដ-១៩ វាបានក្លាយជាបញ្ហាកាន់តែអាក្រក់ខ្លាំងមួយកម្រិតទៀត។

រីឯ នៅក្នុងការស្រាវជ្រាវមួយនៅប្រទេសចិនក៏បានរកឃើញថា អត្រានៃការមើលមិនច្បាស់បានកើនឡើង ៣ ដងក្នុងឆ្នាំ ២០២០ សម្រាប់ក្មេងដែលមានអាយុពី ៦ ទៅ ៨ ឆ្នាំបើប្រៀបធៀបទៅនឹង ៥ ឆ្នាំមុន។ នេះក៏ដោយសារកុមារបានចំណាយពេលសឹងតែរាល់ថ្ងៃ នៅលើអនឡាញ ។

ដោយសារការបិទខ្ទប់ កុមាររាប់លាននាក់នៅទូទាំងពិភពលោក ចាប់ផ្ដើមរៀនតាមរយៈអ៊ិនធរណេត ដោយបានចំណាយពេលលើសលុបលើអេក្រង់មិនថា ស្មាតហ្វូន ថេបឡេត ឬកុំទ្យូទ័រឡើយ។

លទ្ធផលស្រាវជ្រាវរបស់អាមេរិកបង្ហាញថា ការសិក្សាតាមអ៊ិនធរណេតបណ្តាលឱ្យក្មេងជាច្រើនរៀនធ្លាក់ពិន្ទុ  ព្រមទាំងប្រឈមនឹងភាពតានតឹងកាន់តែខ្ពស់ ក៏ដូចជាមានជំងឺបាក់ទឹកចិត្តទៀតផង។

ទន្ទឹននឹងនោះ ក្នុងការស្រាវជ្រាវថ្មីៗបានបង្ហាញថា ការរៀនអនឡាញក៏អាចធ្វើឱ្យភ្នែករបស់កុមារមានបញ្ហាកាន់តែអាក្រក់ទៅៗផងដែរ។

នៅពេលកុមារសំឡឹងអេក្រង់រយៈពេលយូរ ពួកគេនឹងខ្សោះជាតិទឹកនៅក្នុងភ្នែក និងធ្វើឱ្យភ្នែកស្ងួត ហើយបណ្ដាលឱ្យមានបញ្ហាភ្នែកនៅពេលក្រោយដូចជា ជំងឺភ្នែកឡើងបាយ និងជំងឺដក់ទឹកក្នុងភ្នែក។ល។

ចំណែករោគសញ្ញាដែលសម្គាល់ថាក្មេងៗមានបញ្ហាភ្នែករួមមាន ស្រវាំងភ្នែក ឈឺភ្នែក ឈឺក្បាល និងព្រិលភ្នែកពេលកំពុងអាន។ 

ដើម្បីប្រឆាំងនឹងស្ថានភាពនេះ អ្នកជំនាញខាងចក្ខុនិងប្រស្រីភ្នែកបានណែនាំឱ្យកុមារចំណាយពេលសម្រាកឱ្យបានច្រើនពីលើអេក្រង់ និងរក្សាគម្លាតយ៉ាងហោច ៦០០ សង់ទីម៉ែត្ររវាងភ្នែកនិងអេក្រង់ ក៏ដូចជាប្រើឡេនការពារភ្នែក ឬទឹកបន្តក់ភ្នែកជាដើម៕

ប្រែសម្រួល៖ សន្យា

ប្រភព៖ Mail Daily

ចុចអាន៖ កូវីដ-១៩៖ ការបិទទ្វារសាលាបង្កផលប៉ះពាល់ ៣ ធំៗចំពោះកុមារ

ចុចអាន៖ ចម្ងល់៣ពាក់ព័ន្ធវ៉ាក់សាំងការពារកូវីដ ចំពោះកុមារវ័យក្រោម ១៦ ឆ្នាំ