បុរសទះកំផ្លៀងលោក Macron ថ្ងៃមុន ទទួលទោសជាប់ពន្ធនាគារ និងប្រាប់ពីមូលហេតុ

បុរសអាយុ២៨ឆ្នាំម្នាក់ ត្រូវបានកាត់ទោសឲ្យជាប់ពន្ធនាគាររយៈពេល ៤ ខែ បន្ទាប់ពីទះកំផ្លៀងប្រធានាធិបតីបារាំងលោក Emmanuel Macron។

លោក Damien Tarel ក៏ត្រូវបានផ្តល់ការព្យួរទោសរយៈពេល ១៤ ខែបន្ថែមទៀតផងដែរ ចំពោះបទល្មើស ដែលបានកើតឡើងកាលពីថ្ងៃអង្គារ ខណៈមេដឹកនាំបារាំង ទទួលបានការស្វាគមន៍ពីមនុស្សជាច្រើននៅទីក្រុង Tain-l’Hermitage ភាគអាគ្នេយ៍ប្រទេសបារាំង។

លោក Tarel ក៏ត្រូវបានហាមឃាត់មិនឲ្យធ្វើការក្នុងការិយាល័យសាធារណៈ និងមិនឲ្យកាន់កាប់អាវុធ រយៈពេល ៥ ឆ្នាំផងដែរ។

គាត់ត្រូវបានចាប់ខ្លួនភ្លាមៗ បន្ទាប់ពីទះកំផ្លៀងលោក Macron ខាងឆ្វេង និងត្រូវបានចោទប្រកាន់ពីបទប្រើអំពើហិង្សាប្រឆាំងនឹងបុគ្គលម្នាក់ ដែលបានវិនិយោគជាមួយអាជ្ញាធរសាធារណៈ។

នៅក្នុងតុលាការ លោក Tarel បានហៅខ្លួនគាត់ថាជាអ្នកស្នេហាជាតិស្តាំនិយម ឬស្នេហាជាតិជ្រុល និងជាសមាជិកនៃចលនាបាតុកម្មសេដ្ឋកិច្ច “អាវកាក់ពណ៌លឿង” ដែលចលនានេះ បានធ្វើឲ្យរង្គោះរង្គើតំណែងប្រធានាធិបតីរបស់លោក Macron ក្នុងឆ្នាំ ២០១៨ និង ២០១៩។

គាត់បានប្រាប់តុលាការក្រុង Valence ថា ទង្វើរបស់គាត់គឺមិនបានគ្រោងទុកជាមុនទេ និងកើតឡើងដោយសារតែកំហឹងចំពោះការធ្លាក់ចុះសេដ្ឋកិច្ច របស់ប្រទេស បារាំង៕

ប្រែសម្រួល៖ Vann Vann

ប្រភព៖ Sky

ចុចអាន៖ វីដេអូស្ដែងៗ ប្រធានាធិបតីបារាំង ត្រូវគេទះកំផ្លៀង ពេលដើរទៅកាន់ហ្វូងមនុស្សដែលរង់ចាំស្វាគមន៍