ព័ត៌មានអន្ដរជាតិ

អ្នកជំនាញ UN ជំរុញយូណេស្កូមិនត្រូវដាក់ឧទ្យានជាតិថៃមួយជាបេតិកភណ្ឌពិភពលោក

បានផុស

៥ years មុន

នៅ

ថ្ងៃសៅរ៍ ២៤ កក្កដា ២០២១

ដោយ

អ្នកជំនាញសិទ្ធិមនុស្សអង្គការសហប្រជាជាតិ (UN) បានជំរុញឲ្យអង្គការយូណេស្កូ (UNESCO) មិនត្រូវដាក់បញ្ចូលឧទ្យានជាតិរបស់ប្រទេសថៃជាសម្បត្តិបេតិកភណ្ឌពិភពលោកឡើយដោយអះអាងថា ជនជាតិដើមភាគតិចកំពុងត្រូវបានចាប់ខ្លួន និងបណ្តេញចេញពីដីប្រពៃណីរបស់ពួកគេ។

អ្នកជំនាញ UN និយាយក្នុងសេចក្តីថ្លែងការណ៍មួយថា ៖«នេះជាករណីកំណត់មុនដ៏សំខាន់ និងអាចមានឥទ្ធិពលលើគោលនយោបាយពីរបៀបសិទ្ធិជនជាតិដើមភាគតិចដែលត្រូវបានគោរពនៅទូទាំងតំបន់អាស៊ីដែលត្រូវការពារ»។

ពួកគេនិយាយថា ៖«ជនជាតិដើម Karen នៅក្នុងឧទ្យានជាតិនៅបន្តត្រូវបានបណ្តេញចេញដោយបង្ខំ ហើយផ្ទះសម្បែងរបស់ពួកគេត្រូវបានដុតបំផ្លាញ»។

ការអំពាវនាវរបស់អ្នកជំនាញឯករាជ្យបានធ្វើឡើងមុនពេលគណៈកម្មាធិការយូណេស្កូត្រូវពិនិត្យមើលនាថ្ងៃចន្ទខាងមុខនេះ ខណៈរដ្ឋាភិបាលថៃកំពុងប្រឹងប្រែងដាក់ឧទ្យានជាតិ Kaeng Krachan ជាសម្បត្តិបេតិកភណ្ឌពិភពលោកជាលើកទី៣ចាប់តាំងពីឆ្នាំ២០១៦មក។

យោងតាមសំណើរួមរបស់ពួកគេដែលមិនសំដៅទៅលើសហគមន៍ជនជាតិដើម Karen កំពុងរស់នៅក្នុងឧទ្យានដ៏ធំក្បែរព្រំដែនមីយ៉ាន់ម៉ា បង្ហាញថា ប្រទេសចិន និងរុស្ស៊ីស្ថិតក្នុងចំណោមប្រទេសកំពុងគាំទ្រថៃ។

សេចក្តីថ្លែងការណ៍របស់អ្នកជំនាញ UN បញ្ជាក់ថា ជនជាតិដើមភាគតិច Karen ជាង៨០នាក់ត្រូវបានចាប់ខ្លួនក្នុងឆ្នាំនេះ ក្នុងនោះមាន២៨នាក់ត្រូវបានចោទប្រកាន់ពីការរំលោភលើដីរបស់ពួកគេនៅក្នុងឧទ្យាន រាប់ទាំងកុមារម្នាក់ផង។

សេចក្តីថ្លែងការណ៍បន្ថែមថា មិនមានការពិគ្រោះយោបល់ដោយស្មោះត្រង់ដែលអនុញ្ញាតឲ្យជនជាតិដើម Karen ចូលរួមក្នុងដំណើរការដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកឡើយ។

សហភាពអន្តរជាតិសម្រាប់ការអភិរក្សធម្មជាតិបាននិយាយថា UNESCO គួរតែបញ្ឈប់ការដាក់ឈ្មោះឧទ្យាននេះសម្រាប់ជាសម្បត្តិបេតិកភណ្ឌពិភពលោកទៅ។ ក្រុមដែលមានមូលដ្ឋាននៅប្រទេសស្វីសបាននិយាយថា រដ្ឋាភិបាលថៃគួរតែបង្ហាញពីការគាំទ្រចំពោះផែនការពីជនជាតិដើមភាគតិចដែលរងផលប៉ះពាល់ទាំងអស់ដោយផ្តល់សន្តិសុខដល់សិទ្ធិកាន់កាប់ដីធ្លី និងជីវភាពរស់នៅរបស់ពួកគេ៕

ប្រែសម្រួល៖ វីរបុត្រ
ប្រភព៖ theguardian