ក្រោយធ្វើតេស្តមនុស្ស ២ ក្រុម វ៉ាក់សាំង Pfizer ដូសទី ៣ បង្ហាញប្រសិទ្ធភាពខ្លាំងក្លាការពារវីរុសបំប្លែងខ្លួន Delta

ក្រុមហ៊ុនឱសថអាមេរិក Pfizer បានប្រកាសថា វ៉ាក់សាំងការពារជំងឺកូវីដ ១៩ ដូសទី ៣ របស់ខ្លួនមានប្រសិទ្ធភាពខ្លាំងក្លាប្រឆាំងនឹងវីរុសបំប្លែងខ្លួន ជាពិសេសវីរុសបំប្លែងខ្លួនឥណ្ឌា “Delta” ។

ទិន្នន័យពីក្រុមហ៊ុននេះបានបញ្ជាក់ថា កម្រិតអង់ទីគ័រចំពោះវីរុសបំប្លែងខ្លួនឥណ្ឌា “Delta” សម្រាប់មនុស្សអាយុពី ១៨ ទៅ ៥៥ ឆ្នាំ ដែលបានចាក់វ៉ាក់សាំង Pfizer-BioNTech ដូសទី ៣ គឺខ្ពស់ជាងការចាក់ទាំង ២ ដូសដំបូងចំនួន ៥ ដង ។

ចំណែកកម្រិតអង់ទីគ័រចំពោះវីរុសបំប្លែងខ្លួនឥណ្ឌា “Delta” សម្រាប់មនុស្សអាយុពី ៦៥ ទៅ ៨៥ ឆ្នាំដែលបានចាក់វ៉ាក់សាំងដូសទី ៣ គឺខ្ពស់ជាងការចាក់ទាំង ២ ដូសដំបូងរហូតដល់ទៅ ១១ ដងឯណោះ ។

ទន្ទឹមនោះ ដោយដកស្រង់សម្ដីពីទូរទស្សន៍ CNN លោក Mikael Dolsten អ្នកដឹកនាំការស្រាវជ្រាវ ការអភិវឌ្ឍ និងអ្នកដឹកនាំផ្នែកវេជ្ជសាស្ត្រសកលរបស់ក្រុមហ៊ុន បានថ្លែងថា បន្ទាប់ពីឃើញពីប្រសិទ្ធភាពដ៏ខ្លាំងក្លាប្រឆាំងវីរុសបំប្លែងខ្លួនឥណ្ឌា ក្រុមហ៊ុននឹងដាក់ពាក្យសុំការអនុម័តប្រើប្រាស់ជាបន្ទាន់សម្រាប់ការចាក់វ៉ាក់សាំង Pfizer ដូសទី ៣ ក្នុងខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ Sanook

ចុចអាន ៖ ក្រុមហ៊ុន Pfizer៖ ការចាក់វ៉ាក់សាំងបន្ថែមដូស បង្កើនអង់ទីគ័រខ្ពស់ជាងការចាក់ទាំង២ដូសដំបូង ពី៥ទៅ ១០ដងឯណោះ