ព័ត៌មានអន្ដរជាតិ

កូរ៉េខាងជើងចង់ចរចារជាមួយអាមេរិកដើម្បីនាំចូលទំនិញល្អៗ និងអង្ករ១លានតោន

បានផុស

៥ years មុន

នៅ

ថ្ងៃពុធ ៤ សីហា ២០២១

ដោយ

ប្រទេសកូរ៉េខាងជើងចង់ឲ្យទណ្ឌកម្មអន្តរជាតិលើការនាំចេញលោហធាតុ និងនាំចូលប្រេងឥន្ធនៈ ក៏ដូចជាតម្រូវការចាំបាច់ផ្សេងៗរបស់ខ្លួនត្រូវបានបញ្ចប់ដើម្បីចាប់ផ្តើមកិច្ចពិភាក្សាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិក។ នេះជាការលើកឡើងរបស់សមាជិកសភាខាងត្បូងកាលពីថ្ងៃអង្គារ៍ ទី៣ ខែសីហា។

សមាជិកសភាកូរ៉េខាងត្បូងបាននិយាយ បន្ទាប់ពីមានសេចក្តីរាយការណ៍ពីលោក Park Jie-won ប្រធានសេវាស៊ើបការណ៍សម្ងាត់ជាតិរបស់កូរ៉េខាងត្បូងថា កូរ៉េខាងជើងក៏ទាមទារឲ្យបន្ធូរបន្ថយទណ្ឌកម្មលើការនាំចូលទំនិញប្រណីតរបស់ខ្លួនដើម្បីនាំស្រា និងសម្លៀកបំពាក់ល្អៗចូល។

ដំណឹងនេះបានកើតឡើងមួយសប្តាហ៍ បន្ទាប់ពីកូរ៉េទាំងពីរបានស្តារបណ្តាញទំនាក់ទំនងទាន់ហេតុការណ៍ឡើងវិញដែលត្រូវបានកូរ៉េខាងជើងផ្អាកកាលពីមួយឆ្នាំមុន។

ប្រព័ន្ធផ្សព្វផ្សាយរដ្ឋកូរ៉េខាងជើងមិនបាននិយាយទេកាលពីថ្ងៃអង្គារ៍អំពីសំណើថ្មីណាមួយសម្រាប់ដកទណ្ឌកម្មដើម្បីវិលទៅកាន់តុចរចារ។

សមាជិកសភាកូរ៉េខាងត្បូងបាននិយាយថា មេដឹកនាំកូរ៉េខាងជើង លោក គីម ជុងអ៊ុន និងលោកប្រធានាធិបតីកូរ៉េខាងត្បូង ម៉ូន ចេអ៉ីន បានសម្តែងឆន្ទៈក្នុងការស្តារទំនុកចិត្ត និងធ្វើឲ្យប្រសើរឡើងនូវចំណង់ទំនាក់ទំនង ចាប់តាំងពីខែមេសាមក ហើយលោក គីម ក៏បានស្នើឲ្យភ្ជាប់បណ្តាញទំនាក់ទំនងទាន់ហេតុការណ៍ឡើងវិញ។

ពួកគេក៏បាននិយាយថា កូរ៉េខាងជើងត្រូវការអង្ករប្រហែលជា១លានតោន ដោយសារសេដ្ឋកិច្ចប្រទេសនេះជួបវិបត្តិកូវីដ-១៩ និងអាកាសធាតុដ៏អាក្រក់កាលពីឆ្នាំមុន។

ធនាគារកណ្តាលរបស់កូរ៉េខាងត្បូងកាលពីសប្តាហ៍មុនបាននិយាយថា សេដ្ឋកិច្ចរបស់កូរ៉េខាងជើងបានធ្លាក់ចុះដុនដាបយ៉ាងខ្លាំងបំផុតក្នុងរយៈពេល២៣ឆ្នាំចុងក្រោយនេះនៅឆ្នាំ២០២០ ខណៈទទួលរងទណ្ឌកម្មពីអង្គការសហប្រជាជាតិ វិធានការទប់ស្កាត់កូវីដ-១៩ និងគ្រោះធម្មជាតិ។

លោក ម៉ូន បានកំពុងធ្វើឲ្យប្រសើរឡើងនូវទំនាក់ទំនងការទូត និងសេដ្ឋកិច្ចជាមួយកូរ៉េខាងជើងជាអាទិភាពកំពូល ខណៈសហរដ្ឋអាមេរិកបានទទួចយូរមកហើយថា ទំនាក់ទំនងជាមួយកូរ៉េខាងជើងមិនអាចប្រសើរឡើងបានទេ ប្រសិនបើមិនបោះបង់ចោលកម្មវិធីអាវុយនុយក្លេអ៊ែរ និងមីស៊ីលរបស់ខ្លួននោះ៕

ប្រែសម្រួល៖ វីរបុត្រ
ប្រភព៖ reuters

Related Topics:ទណ្ឌកម្ម