អាមេរិក ចាប់ខ្លួនពលរដ្ឋមីយ៉ាន់ម៉ាពីបទប៉ុនប៉ងសម្លាប់ឯកអគ្គរដ្ឋទូតរបស់ខ្លួនប្រចាំ UN

សហរដ្ឋអាមេរិកនិយាយថា ពលរដ្ឋមីយ៉ាន់ម៉ា ២ នាក់ត្រូវបានចាប់ខ្លួននៅទីក្រុងញូវយ៉ក ពីបទបង្ករបួស ឬសម្លាប់ឯកអគ្គរដ្ឋទូតរបស់ប្រទេសអាស៊ីអាគ្នេយ៍មួយនេះ ប្រចាំនៅអង្គការសហប្រជាជាតិ ។

ការិយាល័យមេធាវីអាមេរិក និងការិយាល័យស៊ើបអង្កេតសហព័ន្ធ (FBI) បានប្រកាសពីការចាប់ខ្លួនបុរសទាំងពីរនាក់ដែលរស់នៅទីក្រុងញូវយ៉ក ដោយម្នាក់មានអាយុ ២០ ឆ្នាំ ហើយម្នាក់ទៀតអាយុ ២៨ ឆ្នាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរបាននិយាយថា ក្នុងអំឡុងខែកុម្ភៈ បុរសម្នាក់បានទាក់ទងជាមួយឈ្មួញលក់អាវុធនៅប្រទេសថៃ ដែលលក់អាវុធទៅឲ្យយោធាមីយ៉ាន់ម៉ា ។

នៅក្នុងការសន្ទនារបស់ពួកគេ អ្នកទាំងពីរបានយល់ព្រមលើផែនការជួលអ្នកវាយប្រហារ ក្នុងការប៉ុនប៉ងធ្វើឲ្យលោកឯកអគ្គរដ្ឋទូត Kyaw Moe Tun ចុះចេញពីតំណែង ។

អ្នកទាំងពីរបានឯកភាពថា ប្រសិនបើឯកអគ្គរដ្ឋទូតមិនចុះចេញពីតំណែងទេ អ្នកវាយប្រហារនឹងសម្លាប់គាត់ ។

ទន្ទឹមនោះ អ្នកស៊ើបអង្កេតអាមេរិកបានដឹងអំពីផែនការនេះពីការសន្ទនាតាមទូរស័ព្ទ និងបញ្ជាក់ពីការផ្ទេរប្រាក់ពីអ្នកចែកចាយអាវុធទៅបុរសនោះ ។

គួររំឭកថា ឯកអគ្គរដ្ឋទូតរបស់ UN ត្រូវបានយោធាមីយ៉ាន់ម៉ាបណ្តេញចេញកាលពីខែកុម្ភៈ បន្ទាប់ពីលោកបានរិះគន់យោធាថាបានដណ្តើមអំណាចនៅក្នុងរដ្ឋប្រហារមួយ ។

ប៉ុន្តែឯកអគ្គរដ្ឋទូតរូបនេះបានរក្សាជំហររបស់ខ្លួនក្នុងការប្រឆាំងនឹងរបបយោធា ដោយអំពាវនាវរកការគាំទ្រពីសហគមន៍អន្តរជាតិ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ យោធាមីយ៉ាន់ម៉ា រឹបអូសធុងអុកស៊ីសែននាំចូលពី ថៃ តែប្រាប់ថា ខ្ចីប្រើក្នុងមន្ទីរពេទ្យព្យាបាលអ្នកជំងឺកូវីដសិន