Update៖ រញ្ជួយដីនៅហៃទី អ្នកស្លាប់កើនដល់ ៣០៤នាក់ និងរបួសជិត ២,០០០នាក់

ទីភ្នាក់ងារការពារស៊ីវិលរបស់ប្រទេសហៃទី បានបញ្ជាក់ប្រាប់ទីភ្នាក់ងារសារព័ត៌មាន ABC ថា មនុស្សចំនួន ៣០៤ នាក់បានស្លាប់និងជាង ១,៨០០ នាក់រងរបួស ដោយសារគ្រោះរញ្ជួយដីកម្រិត ៧.២ រ៉ិចទ័រ វាយប្រហារកាលពីព្រឹកថ្ងៃសៅរ៍ (យប់ថ្ងៃអាទិត្យនៅកម្ពុជា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រុមស្ទង់ភូគព្ភសាស្រ្តសហរដ្ឋអាមេរិក បានឲ្យដឹងថា គ្រោះរញ្ជួយដីនេះ បានវាយប្រហារនៅចម្ងាយប្រហែល ៨ គីឡូម៉ែត្រ ភាគខាងជើងទីក្រុង Petit Trou de Nippes។

ក៏មានក្តីព្រួយបារម្ភផងដែរថា ការរញ្ជួយដីនេះ អាចធ្វើឲ្យអត្រាឆ្លងជំងឺកូវីដ-១៩ នៅលើកោះនេះ កាន់តែធ្ងន់ធ្ងរឡើង ប្រសិនបើប្រជាជនដែលត្រូវផ្លាស់ទីលំនៅ ត្រូវបង្ខំចិត្តជ្រកកោននៅកន្លែងណែនតាន់តាប់។

លោក Bocchit Edmond ឯកអគ្គរដ្ឋទូតប្រចាំនៅសហរដ្ឋអាមេរិក បាននិយាយក្នុងសេចក្តីថ្លែងការណ៍មួយកាលពីរសៀលថ្ងៃសៅរ៍ថា រដ្ឋាភិបាលហៃទីជឿជាក់ថា ចំនួនអ្នកស្លាប់និងរបួសអាចនឹងកើនឡើងខ្ពស់ ដោយសារទំហំនៃការរញ្ជួយដី។

នៅទីក្រុង Sud មានអ្នកស្លាប់ចំនួន១៦០នាក់, Grand’Anse ១០០នាក់ និង Nord-Ouest ចំនួន២។ នេះបើតាមការឲ្យដឹងពីទីភ្នាក់ងារ ការពារស៊ីវិល។ 

គួរបញ្ជាក់ថា ការរញ្ជួយដីនេះ បានកើតឡើងត្រឹមតែប៉ុន្មានថ្ងៃប៉ុណ្ណោះ មុនពេលព្យុះត្រូពិក Grace ត្រូវបានព្យាករណ៍ថា នឹងទៅដល់ប្រទេសហៃទីនៅយប់ថ្ងៃចន្ទឬព្រឹកព្រឹកថ្ងៃអង្គារ៕

ប្រែសម្រួល៖ Vann Vann

ប្រភព៖ ABC

ចុចអាន៖ ក្ដៅៗ ហៃទី កំពុងបង្កើតរដ្ឋាភិបាលថ្មី ដោយមានតែនាយករដ្ឋមន្ត្រីប៉ុណ្ណោះ ក្រោយការធ្វើឃាតប្រធានាធិបតី