ក្រុមតាលីបង់ ឆែកឆេរតាមផ្ទះ ស្វែងរកសត្រូវ ដើម្បីប្រហារជីវិត

ក្រុមសិទ្ធិមនុស្សបានអះអាងថា ពួកតាលីបង់ កំពុងឆែកឆេរពីផ្ទះមួយទៅផ្ទះមួយ ដើម្បីស្វែងរកអ្នកដែលប្រឆាំងពួកគេកាលពីមុន។

របាយការណ៍ពីប្រទេសអាហ្វហ្គានីស្ថានបានបង្ហាញថា ក្រុមសកម្មប្រយុទ្ធនេះ បានក្បត់សន្យារបស់ខ្លួនដែលថានឹងបើកការសម្លាប់ការសងសឹកទេ បន្ទាប់ពីរដ្ឋាភិបាលដួលរលំ។

មនុស្សរាប់ពាន់នាក់ កំពុងព្យាយាមរត់គេចខ្លួនបន្ទាប់ពីក្រុមតាលីបង់ គ្រប់គ្រងរដ្ឋធានី កាប៊ុល កាលពីថ្ងៃអាទិត្យសប្តាហ៍មុន។

រូបភាពថ្មីបានបង្ហាញពីយុទ្ធជនកំពុងកាន់កាំភ្លើង M-16 របស់អាមេរិក ហើយអង្គការសហប្រជាជាតិបានព្រមានថា ក្រុមនេះហាក់ដូចជាកំពុងស្វែងរកអ្នកដែលធ្វើការជាមួយអាមេរិកឬអង្គការណាតូ។

អង្គភាពព័ត៌មានអាល្លឺម៉ង់ Deutsche Welle (DW) បានផ្សាយថា ពួកតាលីបង់ បានសម្លាប់សាច់ញាតិជិតស្និទ្ធរបស់អ្នកកាសែតរបស់ខ្លួនម្នាក់ បន្ទាប់ពីការឆែកឆេរពីផ្ទះមួយទៅផ្ទះមួយ។

សមាជិកគ្រួសារផ្សេងទៀតត្រូវបានគេនិយាយថា កំពុងរត់គេចខ្លួន។

របាយការណ៍របស់អង្គការសហប្រជាជាតិបានព្រមានថា ក្រុមតាលីបង់ ក៏កំពុងដាក់ទណ្ឌកម្មសាច់ញាតិរបស់អ្នកដែលពួកគេកំពុងស្វែងរកផងដែរ។

ក្រុមនេះ បានរើកកាយរកឯកសារនៅក្រសួងការពារជាតិនិងមហាផ្ទៃអាហ្វហ្គានីស្ថាន ព្រមទាំងទីស្នាក់ការកណ្តាលនៃទីភ្នាក់ងារចារកម្មរបស់ប្រទេសនេះ ផងដែរ។ ពួកគេបានរៀបចំបញ្ជីឈ្មោះគូប្រជែងដែលពួកគេកំពុងស្វែងរក៕

ប្រែសម្រួល៖ Vann Vann

ប្រភព៖ Mirror

ចុចអាន៖ តាលីបង់ ប្រាប់មនុស្សដែលចង់ជម្លៀសចេញតម្រង់ជួរឲ្យមានសណ្ដាប់ធ្នាប់នៅក្រៅខ្លោងទ្វារអាកាសយានដ្ឋានក្រុងកាប៊ុល