WHO ៖ ប្រទេសដែលត្រៀមបើកសាលារៀនគួរចាក់វ៉ាក់សាំងដល់ គ្រូបង្រៀន និងកុមារ ហើយត្រូវធ្វើតេស្តរកកូវីដជាប្រចាំ

អង្គការសុខភាពពិភពលោក (WHO) និង UNICEF បាននិយាយនៅថ្ងៃចន្ទនេះថា គ្រូបង្រៀន និងបុគ្គលិកសាលាគួរតែត្រូវបានរួមបញ្ចូលនៅក្នុងក្រុមដែលផ្តល់អាទិភាពដល់ការចាក់វ៉ាក់សាំងការពារជំងឺកូវីដ ១៩ ដើម្បីឲ្យសាលារៀននៅអឺរ៉ុប និងអាស៊ីកណ្តាលបើកទ្វារឡើងវិញ ។

បើយោងតាមទីភ្នាក់ងារអង្គការសហប្រជាជាតិ (UN) នៅក្នុងសេចក្តីថ្លែងការណ៍មួយបាននិយាយថា វិធានការណ៍ដើម្បីធានាថា សាលារៀនដែលត្រូវបើកដំណើរការអំឡុងរោគរាតត្បាត គឺការចាក់វ៉ាក់សាំងការពារដល់គ្រូ និងបុគ្គលិកដទៃទៀត ។

ទីភ្នាក់ងារ UN និយាយទៀតថា ជាពិសេសប្រទេសទាំងនោះគួរតែចាក់វ៉ាក់សាំងដល់កុមារដែលមានអាយុលើសពី ១២ ឆ្នាំដែលមានហានិភ័យខ្ពស់នៃការឆ្លងជំងឺកូវីដ ១៩ ។

លោក Hans Kluge ប្រធានអង្គការសុខភាពពិភពលោកប្រចាំតំបន់អឺរ៉ុប បាននិយាយនៅក្នុងសេចក្តីថ្លែងការណ៍មួយថា “នេះគឺជារឿងសំខាន់បំផុតសម្រាប់ការអប់រំសុខភាពផ្លូវចិត្តរបស់កុមារ និងដើម្បីជួយសាលារៀនរៀបចំកូនៗរបស់ពួកគេ ឲ្យក្លាយជាផ្នែកមួយនៃសង្គមរីករាយ និងពោរពេញដោយផលិតភាព” ។

លោកបានបន្ថែមថា “ជំងឺរាតត្បាតបានបណ្តាលឲ្យមានភាពច្របូកច្របល់ផ្នែកអប់រំយ៉ាងធ្ងន់ធ្ងរបំផុតក្នុងប្រវត្តិសាស្ត្រ ។ ខ្ញុំសូមរំឭកឡើងវិញអំពីសារៈសំខាន់នៃវិធានការកែលម្អមួយចំនួនដូចជា បរិយាកាសសាលារៀនអំឡុងពេលជំងឺរាតត្បាត ត្រូវមានខ្យល់ចេញចូលល្អក្នុងទំហំថ្នាក់រៀនតូច រក្សាគម្លាតសង្គម ក៏ដូចជាការតាមដាន និងធ្វើតេស្តរកកូវីដជាប្រចាំសម្រាប់កុមារ និងបុគ្គលិកជាដើម” ៕

ប្រែសម្រួលដោយ ៖ ជីវ័ន្ត

ប្រភព ៖ California News Times

ចុចអាន ៖ WHO ថា វ៉ាក់សាំងរបស់ចិន ៣ លានដូសនឹងផ្ដល់ទៅប្រទេសដែលគ្មានឆ្លងកូវីដសូម្បីមួយករណី