ឡាវ ឲ្យប្រារព្ធពិធីបុណ្យសពមែន តែអ្នករៀបចំ និងភ្ញៀវត្រូវអនុវត្តវិធានការទាំងនេះដាច់ខាត

អាជ្ញាធរឡាវបានចេញសេចក្តីណែនាំសម្រាប់ការចូលរួមបុណ្យសពនៅទូទាំងប្រទេស ដោយបញ្ជាក់ថា វិធានការបង្ការជំងឺកូវីដ ១៩ ត្រូវតែអនុវត្តយ៉ាងតឹងរ៉ឹង ។

គោលការណ៍ណែនាំថ្មីនេះកើតឡើង បន្ទាប់ពីពិធីបុណ្យសពដែលបានរៀបចំឡើងនៅខេត្ត Luang Prabang និងខេត្ត Champsack បានរួមចំណែកដល់ការរីករាលដាលនៃករណីឆ្លងថ្មី ។

តាមគោលការណ៍ណែនាំថ្មី អ្នកចូលរួមទាំងអស់ត្រូវត្រួតពិនិត្យសីតុណ្ហភាព ពាក់ម៉ាសគ្រប់ពេល និងប្រើទឹកលាងដៃ ឬអាល់កុលជាដើម ។

ទន្ទឹមនោះ ពិធីបុណ្យសពគួរតែត្រូវបានកាត់បន្ថយ ដោយផ្តោតលើអនាម័យ និងការការពារជំងឺកូវីដ ១៩ ខណៈការរក្សាគម្លាតសង្គមយ៉ាងតិច ១ ម៉ែត្រត្រូវរក្សាគ្រប់ពេល ហើយអ្នករៀបចំត្រូវធានាឲ្យបាននូវការចោលសំរាមប្រកបដោយប្រសិទ្ធភាព ។

បន្ថែមពីនេះ អ្នករៀបចំពិធីបុណ្យត្រូវធានាថា មិនមានមនុស្សចូលរួមច្រើនកកកុញ ខណៈមឈូសត្រូវតែរៀបចំនៅក្នុងបន្ទប់ដែលមានខ្យល់ចេញចូលបានល្អ ។

យោងតាមគោលការណ៍ណែនាំនេះ ភ្ញៀវគួរតែចៀសវាងការប្រើចានឆ្នាំងរួមគ្នា ខណៈល្បែងស៊ីសងខុសច្បាប់ណាមួយត្រូវហាមឃាត់ដាច់ខាត ។

ចំណែកមនុស្សចាស់ និងអ្នកដែលមានជំងឺពីកំណើតអាចត្រូវបានអនុញ្ញាតឲ្យចូលរួមក្នុងពិធីនេះ ក្នុងរយៈពេលកំណត់ ប៉ុន្តែត្រូវអនុវត្តតាមវិធានការបង្ការជំងឺកូវីដ ១៩ យ៉ាងតឹងរ៉ឹង ។

ស្របពេលជាមួយគ្នានេះ អ្នកដែលវាស់សីតុណ្ហភាពមានលើសពី ៣៧.៥ អង្សាសេ ឬអ្នកដែលធ្វើដំណើរពីតំបន់ក្រហម នឹងមិនត្រូវបានអនុញ្ញាតឲ្យចូលរួមក្នុងពិធីបុណ្យសពឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ The Laotian Times

ចុចអាន ៖ ឡាវ ចាប់ផ្ដើមផលិតថ្នាំគ្រាប់ចម្រាញ់ពីរុក្ខជាតិ ៣ ប្រភេទសម្រាប់ ព្យាបាលកូវីដ