ក្រុមហ៊ុនម៉ាសអ៊ីស្រាអែល Sonovia បានបញ្ចេញរបាយការណ៍ពីមន្ទីរពិសោធន៍តេស្តវាយនភ័ណ្ឌអ៊ីតាលីឈានមុខគេដែលបង្ហាញថា ម៉ាសក្រណាត់របស់ខ្លួន អាចកម្ចាត់ភាគល្អិតវីរុសកូវីដបំប្លែងខ្លួន Delta បាន៩៩,៩៥ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាបនិកក្រុមហ៊ុនលោក Shuki Hershcovich បានប្រាប់កាសែត The Jerusalem Post កាលពីថ្ងៃអាទិត្យអំឡុងកិច្ចប្រជុំនៅទីស្នាក់ការរបស់គាត់ក្នុងទីក្រុង Ramat Gan ថា បន្ទាប់ពីការប្រកាសអំពីលទ្ធផលនេះ ភាគហ៊ុនរបស់ក្រុមហ៊ុនបានកើនឡើងជិត ៣០ភាគរយ។

ម៉ាសនេះ ត្រូវបានសាកល្បងដោយមន្ទីរពិសោធន៍ VisMederi Textyle ដែលបានរាយការណ៍មុននេះថា ម៉ាសក្រណាត់ ស្រោបដោយសារធាតុណាណូស័ង្កសី ក៏អាចការពារប្រឆាំងនឹងវីរុសបំប្លែងខ្លួនអង់គ្លេសនិងមេរោគ H1N1 ឬត្រូវបានគេស្គាល់ថាជាជំងឺផ្តាសាយជ្រូកផងដែរ។

VisMederi គឺជាមន្ទីរពិសោធន៍ស្រាវជ្រាវពាណិជ្ជកម្ម ដែលមានទីតាំងនៅក្នុងប្រទេសអ៊ីតាលី។ មន្ទីរពិសោធន៍នេះបាននិយាយនៅលើគេហទំព័ររបស់ខ្លួនថា បច្ចុប្បន្ន ក្រុមហ៊ុនទទួលបានការបញ្ជាទិញទូទាំងពិភពលោក ចំពោះម៉ាសប្រភេទនេះ។

បច្ចេកវិទ្យារបស់ក្រុមហ៊ុន Sonovia គឺប្រើរលកសំឡេងដើម្បីចាក់ភាគល្អិតប្រាក់ និងស័ង្កសីចូលទៅក្នុងក្រណាត់ដែលសម្លាប់បាក់តេរីនិងមេរោគ។ បច្ចុប្បន្នបច្ចេកវិទ្យានេះ កំពុងត្រូវបានអនុវត្តចំពោះផលិតផលជាច្រើនប្រភេទ រួមទាំងស្រោមកៅអីរថយន្តដឹកជញ្ជូនសាធារណៈ និងកៅអីយន្តហោះ កម្រាលពូកនិងស្រោមខ្នើយសម្រាប់ផ្នែកបដិសណ្ឋារកិច្ចនិងសម្លៀកបំពាក់ផងដែរ។

គួរបញ្ជាក់ថា Delta បច្ចុប្បន្នគឺជាវីរុសកូវីដបំប្លែងខ្លួន ដែលលេចធ្លោនៅទូទាំងពិភពលោក។ វាបានសាយភាយអស់រយៈពេលជាច្រើនខែមកហើយនៅក្នុងប្រទេស អ៊ីស្រាអែល។ ត្រឹមមួយខែនេះ មនុស្សដល់ទៅជាង ៥៣០ នាក់ទៅហើយ បានស្លាប់ដោយសារ Delta៕

ប្រែសម្រួល៖ Vann Vann

ប្រភព៖ JP Post

ចុចអាន៖ ពាក់ហើយចោលៗ ម៉ាស កំពុងដាក់បន្ទុកកាន់តែធ្ងន់ដល់បញ្ហាមួយទៀតនៅ ហ្វីលីពីន