សិប្បកម្មវៀតណាមមួយកន្លែង យកម៉ាសប្រើរួចរាប់តោន ទៅកែច្នៃ ហើយដាក់លក់លើទីផ្សារវិញ

សិប្បកម្មមួយកន្លែងនៅខេត្ត Dong Nai ភាគខាងត្បូងប្រទេសវៀតណាម ត្រូវបានគេរកឃើញថា បានកែច្នៃម៉ាសដែលប្រើរួច ហើយយកទៅដាក់លក់នៅលើទីផ្សារវិញ ដើម្បីរកប្រាក់ចំណេញ។

តំណាងអង្គភាពឃ្លាំមើលទីផ្សារខេត្តបានបញ្ជាក់ថា អំពើខុសច្បាប់នេះ ត្រូវបានរកឃើញនៅទីតាំងមួយកន្លែង ក្នុងសង្កាត់ Long Binh ទីក្រុង Bien Hoa កាលពីព្រឹកថ្ងៃអាទិត្យ។

ម៉ាសមួយចំនួនធំ កំពុងត្រូវបានកែច្នៃនៅទីតាំងនោះ អំឡុងពេលសមត្ថកិច្ចចុះត្រួតពិនិត្យ។

ក្រុមមន្រ្តីក៏បានរកឃើញបាវជាង ៨០ ដែលច្រកម៉ាសកែច្នៃរួចជាង ២៣៧,០០០ មានទម្ងន់រាប់តោន នៅឯសិប្បកម្មខាងលើនិងផ្ទះក្បែរនោះផងដែរ។

លោក Nguyen Dang Giang អាយុ ៤៩ ឆ្នាំជាម្ចាស់សិប្បកម្មនេះ មិនបានបង្ហាញវិក្កយបត្រនិងឯកសារពាក់ព័ន្ធនឹងម៉ាសទាំងនោះទេ។

លោក Giang និយាយថា គាត់បានទិញម៉ាសដែលគេប្រើហើយ ពីកន្លែងជាច្រើនក្នុងទីក្រុងហូជីមិញក្នុងតម្លៃ ១,៥០០ ដុង (០,០៦ ដុល្លារអាមេរិក) ក្នុងមួយគីឡូក្រាម។

បន្ទាប់ពីដឹកម៉ាសទៅ Dong Nai គាត់បានជួលអ្នកស្រុកនិងកម្មករឲ្យលាងសម្អាតនិងស៊កដែកព្រមទាំងភ្ជាប់ខ្សែឡើងវិញ មុននឹងលក់ទៅខេត្តនានានៅតំបន់ដីសណ្តទន្លេមេគង្គ ក្នុងតម្លៃ ៨,៥០០ ដុង (០,៣ ដុល្លារ) ក្នុងមួយគីឡូក្រាម៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ វៀតណាម ចាប់បានក្រុមផលិតថ្នាំ ព្យាបាលកូវីដ ក្លែងក្លាយ