ក្រុមតាលីបង់ អាចមានអាវុធនុយក្លេអ៊ែរ ១៥០ គ្រាប់នៅក្នុងដៃ

លោក John Bolton ដែលជាអតីតទីប្រឹក្សាសន្តិសុខរបស់អតីតប្រធានាធិបតី ដូណាល់ ត្រាំ បានព្រមានថា ក្រុមតាលីបង់ អាចទទួលបានអាវុធនុយក្លេអ៊ែររហូតដល់ ១៥០ គ្រាប់ បន្ទាប់ពីអាមេរិកដកទ័ពចេញពីប្រទេសអាហ្វហ្គានីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយកម្មវិធី WABC 770 កាលពីថ្ងៃអាទិត្យ លោក Bolton និយាយថា វាអាចទៅរួចដែលថា អាវុធនុយក្លេអ៊ែរអាចស្ថិតនៅក្នុងកណ្តាប់ដៃរបស់ក្រុមតាលីបង់ ប្រសិនបើក្រុមឥស្លាមនិយមមួយនេះ កាន់កាប់ប្រទេសប៉ាគីស្ថាន។

លោកនិយាយថា “ការគ្រប់គ្រងអាហ្វហ្គានីស្ថានរបស់ តាលីបង់ បានគំរាមកំហែងដល់លទ្ធភាពដែលថា ក្រុមភេរវករអាចគ្រប់គ្រងប៉ាគីស្ថាន។ នោះមានន័យថា ប្រហែលជាអាវុធនុយក្លេអ៊ែរចំនួន ១៥០ គ្រាប់ស្ថិតនៅក្នុងដៃក្រុមភេរវករ”។

សហរដ្ឋអាមេរិកបានបញ្ចប់ការដកទ័ពដ៏វឹកវរ ចេញពីអាហ្វហ្គានីស្ថាននៅថ្ងៃទី ៣១ ខែសីហា ដោយបន្សល់ទុកនូវឧបករណ៍យោធាដែលត្រូវបានក្រុមតាលីបង់រឹបអូសយក បន្ទាប់ពីពួកឥស្លាមនិយមនេះ ដណ្តើមបានអំណាចនៅក្នុងការវាយលុកលឿនដូចរន្ទះ។

ប្រទេសប៉ាគីស្ថាន មានឃ្លាំងអាវុធនុយក្លេអ៊ែរប្រមាណជា ១៦០ រួមទាំងមីស៊ីលបាញ់ពីដីចំនួន ១០២ គ្រាប់ និងយន្តហោះចម្បាំងធុន F-16 ដែលមានជើងបាញ់នុយក្លេអ៊ែរចំនួន ២៤ គ្រាប់ផងដែរ។

ការព្រមានរបស់លោក Bolton បានកើតឡើង បន្ទាប់ពីក្រុមតាលីបង់ រឹបអូសឧបករណ៍ជាច្រើនដែលអាមេរិកបោះបង់ចោលក្នុងអំឡុងពេលបញ្ចប់ភាពវឹកវរចំពោះសង្គ្រាមរយៈពេល ២០ ឆ្នាំនៅអាហ្វហ្គានីស្ថាន។

ប៉ុន្មានថ្ងៃបន្ទាប់ពីការដកទ័ពបានបញ្ចប់ ក្រុមតាលីបង់បានដង្ហែក្បួនរថពាសដែកផលិតដោយអាមេរិករាប់សិបគ្រឿង និងអាវុធដែលរឹបអូសបានពីកងកម្លាំងអាហ្វហ្គានីស្ថាន អំឡុងការកាន់កាប់របស់ក្រុមនេះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ខេត្ត តាលីបង់ Helmand ហាមបុរស កោរ ពុក មាត់ – ចង្ការ និងចាក់ បទ ចម្រៀង