ថ្ងៃបិទបញ្ចប់ចុះឈ្មោះបោះឆ្នោត កូនស្រីលោក Duterte បែរដកខ្លួនជាបេក្ខភាព ប្រធានាធិបតី ហ្វីលីពីន

ថ្ងៃសុក្រគឺជាថ្ងៃចុងក្រោយនៃការចុះឈ្មោះបោះឆ្នោតប្រធានាធិបតីហ្វីលីពីននាខែឧសភាខាងមុខ ។ លោកស្រី Sara Duterte កូនស្រីរបស់ប្រធានាធិបតីបច្ចុប្បន្នលោក Rodrigo Duterte ដែលត្រូវបានគេមើលឃើញថាជាបេក្ខជនដ៏មានសក្ដានុពលមួយរូបននោះ បាននិយាយថា លោកស្រីនឹងមិនឈរឈ្មោះនោះទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទុយទៅវិញលោកស្រីនិយាយថា លោកស្រីនឹងស្វែងរកអាណត្តិមួយទៀតជាចៅហ្វាយក្រុង Davao ភាគខាងត្បូងប្រទេស ។ ប៉ុន្តែនៅតែមានឱកាសដែលលោកស្រីអាចចូលរួមប្រកួតប្រជែងប្រធានាធិបតីនៅពេលក្រោយ ហើយលោកស្រីអាចចូលធ្វើជាតំណាងសម្រាប់បេក្ខជនម្នាក់ទៀតដូចឪពុករបស់លោកស្រីធ្លាប់ធ្វើកាលពីឆ្នាំ ២០១៦ ។

ទន្ទឹមនោះ អ្នកដែលបានចុះឈ្មោះជាបេក្ខជនប្រធានាធិបតីរួចហើយនោះ ក៏មានសមាជិកព្រឹទ្ធសភា Manny Pacquiao ដែលជាជើងឯកប្រដាល់លំដាប់ពិភពលោកចូលនិវត្តន៍ ។

លោកអះអាងថា រដ្ឋាភិបាលរបស់លោក Rodrigo Duterte បានប្រើប្រាស់លុយដ៏ច្រើនសន្ធឹកសន្ធាប់ក្នុងគោលបំណងប្រយុទ្ធប្រឆាំងនឹងជំងឺរាតត្បាតសកល ។

រដ្ឋធម្មនុញ្ញរបស់ប្រទេសនេះរារាំងលោកប្រធានាធិបតី Duterte មិនឲ្យស្វែងរកអាណត្តិទីពីរ ។ លោកធ្លាប់បាននិយាយថា លោកនឹងឈរឈ្មោះជាបេក្ខជនអនុប្រធានាធិបតី ប៉ុន្តែបន្ទាប់មកបានប្រកាសភ្លាមៗថា លោកនឹងមិនឈរឈ្មោះវិញ ហើយនឹងចូលនិវត្តន៍ពីនយោបាយតែម្ដង ។

គួរបញ្ជាក់ថា យុទ្ធនាការឃោសនាបោះឆ្នោតរបស់បេក្ខជនប្រធានាធិបតីប្រទេសហ្វីលីពីន នឹងចាប់ផ្តើមជាផ្លូវការនៅខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ Pacquiao ឈរឈ្មោះប្រជែង តំណែងប្រធានាធិបតី ហ្វីលីពីន ជាផ្លូវការ