គ្មានអ្នកណានឹកស្មានដល់ទេថា ប្រទេសនេះ មានអត្រាស្លាប់ខ្ពស់ជាងគេបំផុត ដោយសារ កូវីដ

ប្រទេស ប៉េរូ មានអត្រាមរណភាពដោយសារជំងឺកូវីដ-១៩ ខ្ពស់ជាងគេបំផុតនៅលើពិភពលោក ដោយមានមនុស្សជាង ៦,០០០ នាក់ក្នុងមួយលាននាក់ បានបាត់បង់ជីវិតដោយសារវីរុសនេះ។

យោងតាមតួលេខថ្មីបានបង្ហាញថា មនុស្សប្រហែល ១៩៩,៦៣២ នាក់បានស្លាប់អំឡុងពេលជំងឺរាតត្បាត នៅក្នុងប្រទេសដែលមានប្រជាជនចំនួន ៣២.៩៧ លាននាក់មួយនេះ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួលេខនេះស្ទើរតែស្មើនឹងទ្វេដង បើធៀបទៅនឹងប្រទេសដែលរងផលប៉ះពាល់ធ្ងន់ធ្ងរបំផុតបន្ទាប់ ដែលមានអ្នកស្លាប់ចំនួន ៣,២៥៦ នាក់ក្នុងមួយលាននាក់។

ជំងឺរាតត្បាតបានជះឥទ្ធិពលមិនស្មើភាពគ្នាឡើយ លើប្រទេសផ្សេងៗនៅទូទាំងពិភពលោក ដោយប្រទេសចិន ដែលជាកន្លែងវីរុសផ្ទុះឡើង មានអ្នកស្លាប់ត្រឹមតែ ៣០ នាក់ប៉ុណ្ណោះក្នុងមួយលាននាក់។

បើប្រៀបធៀបទៅ ចក្រភពអង់គ្លេសគឺជាប្រទេសដែលរងផលប៉ះពាល់ធ្ងន់ធ្ងរបំផុតលំដាប់ទី២៤នៅលើពិភពលោក ដោយមានមនុស្សស្លាប់ចំនួន ២,០៤៧ នាក់ក្នុងមួយលាននាក់ ខណៈសហរដ្ឋអាមេរិកគឺជាប្រទេសទី ២០ មានអ្នកស្លាប់ ២,១៦១ នាក់ក្នុងមួយលាននាក់។

តួលេខខ្ពស់នេះបានកើតឡើង បើទោះបីប្រទេសប៉េរូ កត់ត្រាការឆ្លងត្រឹម ២,១៨២,១០៦ ករណីក៏ដោយ ដែលនេះមានន័យថា វីរុសបានសម្លាប់មនុស្ស ៩,១៤ ភាគរយដែលធ្វើតេស្តវិជ្ជមាននៅក្នុងប្រទេស។

គួរបញ្ជាក់ថា គិតត្រឹមពេលនេះ ប្រជាជនប៉េរូប្រមាណ ១២.៣ លាននាក់បានទទួលវ៉ាក់សាំងពេញលេញ ពោលគឺស្មើ ៣៧,៩ ភាគរយនៃប្រជាជនសរុប៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អូស្រ្តាលីដកការបិទខ្ទប់ បើកប្រទេស រស់នៅជាមួយ កូវីដ