អាមេរិក អនុញ្ញាត វ៉ាក់សាំងកូវីដ លើកដំបូងសម្រាប់កុមារតូចៗ

កាលពីថ្ងៃសុក្រទី២៩ ខែតុលា (ត្រូវថ្ងៃសៅរ៍ទី៣០ នៅកម្ពុជា) រដ្ឋបាលចំណីអាហារនិងឪសថអាមេរិក (FDA) បានអនុញ្ញាតឲ្យវ៉ាក់សាំងការពារជំងឺកូវីដ-១៩ Pfizer-BioNTech សម្រាប់កុមារអាយុពី ៥ ទៅ១១ឆ្នាំ ដែលធ្វើឲ្យវាក្លាយជាវ៉ាក់សាំងកូវីដដំបូងគេ សម្រាប់កុមារតូចៗនៅសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ វ៉ាក់សាំងនេះ នឹងមិនទាន់ចាប់ផ្តើមចាក់ភ្លាមៗសម្រាប់ក្រុមអាយុនេះទេ។ មជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក (CDC) នៅតែត្រូវការការណែនាំអំពីរបៀបចាក់វ៉ាក់សាំង ដែលនឹងត្រូវសម្រេចបន្ទាប់ពីក្រុមទីប្រឹក្សាខាងក្រៅ ពិភាក្សាគ្នាអំពីផែនការនៅថ្ងៃអង្គារខាងមុខ។

ក្រុមហ៊ុន Pfizer និយាយថា នៅថ្ងៃសៅរ៍នេះ ខ្លួននឹងចាប់ផ្តើមដឹកជញ្ជូនវ៉ាក់សាំងកុមារ ទៅកាន់ឱសថស្ថាន ការិយាល័យគ្រូពេទ្យកុមារ និងកន្លែងផ្សេងទៀតដែលជាកន្លែងអាចចាក់ថ្នាំបង្ការបាន។

ការសម្រេចចិត្តរបស់ FDA ត្រូវបានគេរំពឹងថា នឹងធ្វើឲ្យកុមារអាមេរិកចំនួន ២៨ លាននាក់ទទួលបានវ៉ាក់សាំង។

គួរបញ្ជាក់ថា មកទល់ពេលនេះ មិនមានប្រទេសច្រើនទេ ដែលបានចាក់វ៉ាក់សាំងការពារជំងឺកូវីដលើកុមារសម្រាប់ក្រុមអាយុនេះ ឬក្មេងជាងនេះ ដោយក្នុងនោះរួមមានទាំងចិន គុយបា និងអារ៉ាប់រួមផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ កម្ពុជា វ៉ៃផ្ដាច់អត្រាចាក់វ៉ាក់សាំងកូវីដខ្ពស់បំផុតនៅ អាស៊ាន