លេចចេញវីរុសបំប្លែងខ្លួនក្លាយពូជថ្មីមួយទៀត ជាប់សែស្រឡាយ Delta (មានវីដេអូ)

ពូជមួយទៀតនៃវីរុសបំប្លែងខ្លួន Delta កំពុងរីករាលដាលនៅចក្រភពអង់គ្លេស ខណៈវីរុសផ្សេងៗទៀតដែលជាប់សែស្រឡាយជាមួយ Delta កំពុងបន្តរីកសាយភាយ។

វីរុសក្លាយពូជថ្មីឈ្មោះ AY.43 ត្រូវបានគេប្រទះឃើញ ៨,១៣៨ ដងរួចមកហើយនៅក្នុងប្រទេសអង់គ្លេស។ នេះបើយោងតាមទិន្នន័យចុងក្រោយពីមជ្ឈមណ្ឌលឃ្លាំមើលដ៏ធំបំផុតមួយរបស់ប្រទេស។

វារួមចំណែកប្រហែលមួយករណីក្នុងចំណោម២៤ករណីនៅក្នុងប្រទេស បន្ទាប់ពីត្រូវបានរកឃើញជាលើកដំបូងនៅពាក់កណ្តាលខែកក្កដា ហើយបានកើនឡើងជាបន្តបន្ទាប់ចាប់តាំងពីពេលនោះមក។

ទោះបីជាយ៉ាងណាក៏ដោយ អ្នកវិទ្យាសាស្ត្របានទទូចថា ពេលនេះ គ្មានអ្វីត្រូវព្រួយបារម្ភអំពីមេរោគនេះឡើយ ដោយនិយាយថា មិនទាន់មានភស្តុតាងណាមួយដែលបង្ហាញថា វាឆ្លងខ្លាំងជាង ឬអាចគេចផុតពីវ៉ាក់សាំងនោះទេ។

ប៉ុន្តែវាបានលេចឡើង បន្ទាប់ពីការកើនឡើងយ៉ាងឆាប់រហ័សនៃករណីវីរុសក្លាយពូជពី Delta មួយទៀតឈ្មោះ AY.4.2 ដែលកំពុងស្ថិតក្រោមការត្រួតពិនិត្យយ៉ាងដិតដល់ពីសំណាក់អ្នកវិទ្យាសាស្ត្រអង់គ្លេសនិងអន្តរជាតិ។

គួរបញ្ជាក់ថា មានត្រកូល AY ច្រើនជាងមួយរយផ្សេងគ្នា ដែលជាពូជពង្សរបស់វីរុសបំប្លែងខ្លួន Delta ហើយភាគច្រើនមិនមានអ្វីត្រូវព្រួយបារម្ភទេ។

AY.43 ត្រូវបានគេប្រទះឃើញជាលើកដំបូងនៅក្នុងខែកក្កដា បន្ទាប់ពី Delta បានរីករាលដាលនៅជុំវិញពិភពលោក ហើយឥឡូវនេះមានករណីចំនួន ៨៤,០០០ ត្រូវបានរកឃើញនៅក្នុង១០៨ប្រទេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ វីរុសកូវីដបំប្លែងខ្លួន ធន់នឹងវ៉ាក់សាំងបន្ថែមទៀត នឹងលេចចេញក្នុងពេលឆាប់ៗ