អូមីក្រុង ពួតដៃ ដែលតា បង្កើតវីរុសកូនកាត់ ចេញមកអុកឡុកទៀតហើយ (មានវីដេអូ)

ឥឡូវនេះ ក្រុមអ្នកវិទ្យាសាស្រ្តអង់គ្លេស បានបញ្ជាក់ជាផ្លូវការអំពីការរកឃើញវីរុសកូវីដបំប្លែងខ្លួន ដែលជាប្រភេទកូនកាត់រវាង អូមីក្រុង និងដែលតា។

“ដែលតាក្រុង” ដែលមានសមត្ថភាពឆ្លងកាន់តែខ្លាំង ត្រូវបានគេគិតថា វិវត្តនៅក្នុងខ្លួនអ្នកជំងឺដែលឆ្លងវីរុសបំប្លែងខ្លួនទាំងពីរក្នុងពេលតែមួយ ប៉ុន្តែគេមិនច្បាស់ទេថាតើមេរោគនេះត្រូវបាននាំចូលពីក្រៅ ឬមានប្រភពនៅក្នុងប្រទេសអង់គ្លេស។

ស្របពេលជាមួយគ្នានោះ មន្ត្រីទីភ្នាក់ងារសន្តិសុខសុខភាពរបស់ចក្រភពអង់គ្លេស (UKHSA) ក៏មិនទាន់ដឹងដែរថា មេរោគដែលទើបនឹងវិវត្តថ្មីនេះមានសមត្ថភាពឆ្លងខ្លាំង ឬធ្ងន់ធ្ងរកម្រិតណា ឬថាតើវានឹងប៉ះពាល់ដល់ប្រសិទ្ធភាពវ៉ាក់សាំងដែរឬអត់។

ប្រភពមួយនៅ UKHSA បានលើកឡើងថា ពេលនេះ ក្រុមមន្ត្រីមិនមានការព្រួយបារម្ភចំពោះវីរុសកូនកាត់នេះទេ ព្រោះចំនួនករណីឆ្លង នៅមានកម្រិតទាបនៅឡើយ។

យ៉ាងណាក្តី ទីភ្នាក់ងារនេះ​មិន​បាន​បង្ហាញ​ថា​តើ រកឃើញប៉ុន្មានករណីហើយនោះទេ។

សាស្ត្រាចារ្យ Paul Hunter អ្នកជំនាញខាងជំងឺឆ្លងនៅសាកលវិទ្យាល័យ East Anglia បានប្រាប់ MailOnline ថា វាមិនគួរបង្កការគំរាមកំហែងខ្លាំងពេកទេ ពីព្រោះចក្រភពអង់គ្លេសមានកម្រិតភាពស៊ាំដ៏ធំប្រឆាំងនឹងប្រភេទ ដែលតា និង អូមីក្រុង ទម្រង់ដើម។

រឿងនេះកើតឡើង បន្ទាប់ពីរបាយការណ៍នៃករណីវីរុសកូនកាត់ ដែលតាក្រុង ពីប្រទេស ស៊ីប កាលពីខែមុន ត្រូវបានច្រានចោល។

ស្របពេលជាមួយគ្នានេះដែរ ប្រធានផ្នែកវេជ្ជសាស្រ្ដអង់គ្លេសប្រចាំនៅក្រុមហ៊ុនផលិតវ៉ាក់សាំង Moderna បានព្រមានអំពីវីរុសកូនកាត់ នៅពេលដែលករណី អូមីក្រុង កំពុងតែកើនឡើងទូទាំងពិភពលោក ហើយចាប់ផ្តើមប្រកួតប្រជែងជាមួយ ដែលតា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ WHO៖ អូមីក្រុង ក្លាយពូជ BA.2 ទំនងមិនធ្ងន់ធ្ងរជាងវីរុសទម្រង់ដើមទេ