អត្រាគាំទ្រលោក Biden ធ្លាក់ចុះដល់កម្រិតទាបបំផុត 

អត្រាពេញចិត្តចំពោះលោក Joe Biden បានធ្លាក់ដល់កម្រិតទាបបំផុត ខណៈមានជនជាតិអាមេរិកត្រឹមតែជាង៤នាក់ប៉ុណ្ណោះ ក្នុងចំណោម១០នាក់ដែលនិយាយថា ពួកគេមានអារម្មណ៍ថា លោកប្រធានាធិបតីកំពុងធ្វើការងារបានល្អនៅក្នុងការស្ទង់មតិថ្មីមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្ទង់មតិរបស់ ABC News និង Washington Post បង្ហាញថា លោក Biden ទទួលបានមិនពេញចិត្តចំនួន៥៣% និងពេញចិត្ត៤១% ពោលគឺធ្លាក់ចុះ ១១ពិន្ទុពីការស្ទង់មតិដូចគ្នា កាលពីខែមេសា។

ការធ្លាក់ចុះយ៉ាងឆាប់រហ័សនេះ កើតឡើងចំពេលមានការបរាជ័យជាបន្តបន្ទាប់ដែលភាគច្រើនទាក់ទងនឹងសេដ្ឋកិច្ច រួមទាំងអត្រាអតិផរណាខ្ពស់រយៈពេល៣១ឆ្នាំ ចំនួនអ្នកអត់ការងារធ្វើនៅតែខ្ពស់ និងវិបត្តិខ្សែសង្វាក់ផ្គត់ផ្គង់ទាន់ពេលសម្រាប់រដូវកាលវិស្សមកាលផងដែរ។

ចាប់តាំងពីខែតុលាឆ្នាំ២០២០មក ប្រាក់ឈ្នួលបានកើនឡើង៤,៩% ប៉ុន្តែអតិផរណាបានកើនឡើង៦,២%។

ក្នុងចំណោមមនុស្សពេញវ័យចំនួន១,០០១នាក់ ដែលត្រូវបានស្ទង់មតិចន្លោះថ្ងៃទី៧ដល់១០ខែវិច្ឆិកា មនុស្ស៧នាក់ក្នុងចំណោម១០នាក់បាននិយាយថា សេដ្ឋកិច្ចកំពុងស្ថិតក្នុងស្ថានភាពមិនល្អ។ អត្រានេះកើនឡើងពី៥៨ភាគរយដែលបាននិយាយដូចគ្នា នៅក្នុងការស្ទង់មតិកាលពីនិទាឃរដូវ។

ខណៈពេលដែល៤៨%នៃអ្នកឆ្លើយសំណួរនិយាយថាពួកគេបានស្តីបន្ទោសលោក Biden ដោយផ្ទាល់ចំពោះអតិផរណា, លោក Biden ទទួលបានការមិនពេញចិត្ត៥៥ភាគរយ ហើយមានការពេញចិត្តត្រឹមតែ៣៩%ប៉ុណ្ណោះ សម្រាប់ការដោះស្រាយសេដ្ឋកិច្ចរបស់គាត់។

ម្យ៉ាងវិញទៀត ប្រសិនបើការបោះឆ្នោតពាក់កណ្តាលអាណត្តិត្រូវបានធ្វើឡើងនៅថ្ងៃនេះនោះ ការស្ទង់មតិបានរកឃើញថា ៥១ភាគរយនៃអ្នកបោះឆ្នោតដែលបានចុះឈ្មោះ នឹងគាំទ្របេក្ខជនមកពីគណបក្សសាធារណរដ្ឋនៅក្នុងមណ្ឌលរបស់ពួកគេ ខណៈមានតែ៤១ភាគរយប៉ុណ្ណោះដែលនិយាយថា ពួកគេនឹងគាំទ្រគណបក្សប្រជាធិបតេយ្យ។

តួលេខនេះគឺជាការនាំមុខដ៏ធំបំផុតសម្រាប់គណបក្សសាធារណរដ្ឋ ក្នុងរយៈពេល៤០ឆ្នាំ ចាប់តាំងពីការស្ទង់មតិរបស់ ABC និង Washington Post បានចាប់ផ្តើមសួរសំណួរនេះក្នុងខែវិច្ឆិកា ឆ្នាំ១៩៨១។

ហើយវាក៏ជាលើកទីប្រាំបួនប៉ុណ្ណោះនៅក្នុងការស្ទង់មតិចំនួន១១០ដង ដែលគណបក្សសាធារណរដ្ឋមានប្រៀបជាងគណបក្សប្រជាធិបតេយ្យ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រោយជួបលោកស៊ី ពេលនេះលោក បៃដិន និយាយថា បញ្ហាឯករាជ្យតៃវ៉ាន់ ទុកឲ្យតៃវ៉ាន់ ដោះស្រាយដោយខ្លួនឯង