ព័ត៌មានអន្ដរជាតិ

ស្វាមីអធិការបតីអាល្លឺម៉ង់រិះគន់ចាស់ដៃថា ពលរដ្ឋអត់ចាក់វ៉ាក់សាំង«ខ្ជិលច្រអូស»

បានផុស

៥ years មុន

នៅ

ថ្ងៃពុធ ២៤ វិច្ឆិកា ២០២១

ដោយ

ស្វាមីរបស់លោកស្រីអធិការបតីអាល្លឺម៉ង់ Angela Merkel បានរិះគន់ចាស់ដៃពីពលរដ្ឋអាល្លឺម៉ង់ដែលមិនព្រមចាក់វ៉ាក់សាំងបង្ការកូវីដ-១៩គឺខ្ជិលច្រអូស ដែលការរិះគន់នេះចំពេលមានសេចក្តីអំពាវនាវឲ្យបង្កើនវិធានការចាក់វ៉ាក់សាំងដើម្បីប្រយុទ្ធនឹងកូវីដដែលកំពុងកើនឡើងជាថ្មី។

ស្ថានភាពកូវីដនៅប្រទេសអាល្លឺម៉ង់បានវិលត្រឡប់មកអាក្រក់វិញដោយសារតែអត្រាចាក់វ៉ាក់សាំងទើបបាន៦៩%ប៉ុណ្ណោះដែលទាបជាងប្រទេសនៅអឺរ៉ុបខាងលិចដូចជា បារាំង អ៉ីតាលី និងអេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Joachim Sauer ជាស្វាមីរបស់លោកស្រីអធិការបតីបាននិយាយក្នុងបទសម្ភាសជាមួយកាសែតអ៉ីតាលីថា ៖«វាគួរឲ្យភ្ញាក់ផ្អើលណាស់ដែល១ភាគ៣នៃប្រជាជនអាល្លឺម៉ង់មិនគោរពតាមការរកឃើញបែបវិទ្យាសាស្ត្រ»។

លោកថា ៖«ផ្នែកមួយគឺដោយសារភាពខ្ជិលច្រអូស និងមិនពេញចិត្តរបស់ពលរដ្ឋអាល្លឺម៉ង់។ ផ្នែកមួយទៀតគឺជាមនុស្សដែលធ្វើតាមការកាត់ទោសខ្លួនឯង ជាប្រភេទមនោគមវិជ្ជាដែលពួកគេចាត់ទុកថា ការចាក់វ៉ាក់សាំងគឺផ្តាច់ការ»។ លោកបានបញ្ជាក់ថា ក្រុមនេះមានទាំងវេជ្ជបណ្ឌិត និងអ្នកវិទ្យាសាស្ត្រមួយចំនួនទៀតផង។

ដូចភរិយារបស់ខ្លួនដែរ លោកគឺជាអ្នកឯកទេសគីមីវិទ្យា ហើយលោកបានទៅប្រទេសអ៉ីតាលីក្នុងដំណើរទស្សនកិច្ចសិក្សាមួយ។

ការរិះគន់របស់លោក Sauer បានកើតឡើងមួយថ្ងៃ បន្ទាប់ពីលោកស្រីអធិការបតី Merkel បានព្រមានថា អាល្លឺម៉ង់នឹងចាត់វិធានការទប់ស្កាត់កូវីដ-១៩មិនគ្រប់គ្រាន់ឡើយសម្រាប់រលកទី៤។

លោកស្រីអធិការបតីដែលនឹងចាកចេញពីតួនាទីរបស់ខ្លួន និងត្រូវជំនួសដោយរដ្ឋមន្ត្រីក្រសួងហិរញ្ញវត្ថុលោក Olaf Scholz នាខែធ្នូខាងមុខនេះបានទទួចហើយទទួចទៀតឲ្យពលរដ្ឋអាល្លឺម៉ង់ទៅចាក់វ៉ាក់សាំងឲ្យបានគ្រប់គ្នា៕

ប្រែសម្រួល៖ វីរបុត្រ
ប្រភព៖ theguardian