អូស្ត្រាលី ​ទិញ​កាំភ្លើងធំពីកូរ៉េខាងត្បូង ចំពេលមានភាពតានតឹងជាមួយ ចិន

អូស្ត្រាលីបានយល់ព្រមទិញកាំភ្លើងធំ K9 ពីកូរ៉េខាងត្បូង ក៏ដូចជាបង្កើនទំនាក់ទំនងរវាងឧស្សាហកម្មការពារជាតិរបស់ពួកគេ ខណៈដែលប្រទេសទាំងពីរបានពង្រឹងភាពជាដៃគូសន្តិសុខដ៏ទូលំទូលាយថ្មីមួយ ចំពេលមានភាពតានតឹងកើនឡើងជាមួយប្រទេសចិន ។

ប្រទេសទាំងពីរក៏បានសន្យាផងដែរក្នុងការជំរុញពាណិជ្ជកម្មរ៉ែសំខាន់ៗ និងថាមពលស្អាតនៅ ក្នុងកតិកាសញ្ញាដែលបានចុះហត្ថលេខាដោយប្រធានាធិបតី Moon Jae-in និងនាយករដ្ឋមន្ត្រីអូស្ត្រាលី Scott Morrison នៅ ទីក្រុង Canberra នៅ ថ្ងៃចន្ទនេះ ខណៈវាគឺជាដំណើរទស្សនកិច្ចលើកដំបូងរបស់មេដឹកនាំអន្តរជាតិទាំងពីរ ចាប់តាំងពីបានចាប់ផ្តើមបើកព្រំដែនរបស់ខ្លួនឡើងវិញក្នុងខែនេះ ។

លោក Morrison បានប្រាប់អ្នកយកព័ត៌មាន បន្ទាប់ពីបានចុះហត្ថលេខាលើកិច្ចព្រមព្រៀងទាំង ៤ ថា “យើងសូមចែករំលែកទស្សនៈអំពីតួនាទីនៃលទ្ធិប្រជាធិបតេយ្យសេរីនៅ ក្នុងពិភពលោកបច្ចុប្បន្ន និងជាពិសេសនៅ ក្នុងឥណ្ឌូ-ប៉ាស៊ីហ្វិក” ។

លោកបាននិយាយថា “យើងដឹងវាមានសារៈសំខាន់ប៉ុណ្ណាសម្រាប់នីតិរដ្ឋ សម្រាប់អង្គការពហុភាគីដែលផ្អែកលើសណ្តាប់ធ្នាប់ពិភពលោកដែលអនុគ្រោះដល់សេរីភាព ដែលប្រទេសក្នុងតំបន់របស់យើងអាចមានជម្រើស ជម្រើសក្នុងសេដ្ឋកិច្ច ជម្រើសសម្រាប់សន្តិភាព និងសន្តិសុខរបស់ពួកគេ” ។ .

គួរបញ្ជាក់ថា កិច្ចពិភាក្សានេះធ្វើឡើង នៅ ពេលដែលលោក Morrison ស្វែងរកទំនាក់ទំនងសន្តិសុខកាន់តែរឹងមាំជាមួយប្រទេសលទ្ធិប្រជាធិបតេយ្យដែលមានគំនិតដូចគ្នាក្នុងគោលបំណងដើម្បីធ្វើសកម្មភាពប្រឆាំងនឹងអ្វីដែលលោកមើលឃើញថាជាការបង្កើនការអះអាងរបស់ចិននៅ ក្នុងឥណ្ឌូ-ប៉ាស៊ីហ្វិក ។

ទន្ទឹមនោះ ទីក្រុងប៉េកាំងក៏បានខឹងសម្បារយ៉ាងខ្លាំងចំពោះកិច្ចព្រមព្រៀងរបស់អូស្រ្តាលីជាមួយសហរដ្ឋអាមេរិក និងចក្រភពអង់គ្លេសដែលបានប្រកាសកាលពីខែកញ្ញា ដើម្បីជួយសាងសង់កងនាវាមុជទឹកនុយក្លេអ៊ែរថ្មី ដោយនិយាយថា ភាពជាដៃគូថ្មីនឹងធ្វើឲ្យមានការប្រកួតប្រជែងអាវុធនៅ ក្នុងតំបន់ ៕

ប្រែសម្រួលដោយ ៖ ជីវ័ន្ត

ប្រភព ៖ Alarabiya News

ចុចអាន ៖ បែកធ្លាយ លោក ត្រាំ បានឲ្យកាសែតចម្រៀងមួយបទត្រូវនឹងរឿងរបស់ គីម ជុងអ៊ុន មុនកិច្ចប្រជុំកាល ៦ ឆ្នាំមុន